YIA̒APO 16
16
Polo malakala lei Kora, Datan wolei Abiram
1-2Tei Kora walae̒e Yijhar lonto kaumu Kehat, suku Lewi, helo malakala to olei Musa. Tio bilantua lo tatoulota lonto suku Ruben, deu̒yito-yito tei Datan wolei Abiram mongo walae̒e Eliab, wau tei On walae̒e Pelet, wau tadulo hetuto limo lopulu lota tau̒wa tamasa-masaahulu u tilulaotao̒ lo ulipu. 3Timongolio pee̒-pee̒enta lonao̒ mota lotaalua wolei Musa wau lei Haruna wau loloi̒ya mao̒, “Malo tuuheta uito, Musa! Ngoilanggubu umati lo Isirai̒lu pohetuwolo ode Eeya, wau Eeya woluo to huungonto ngoa̒amilalo. Bo yilongola yio̒ monganggapu batangamu lebe lailaio̒ wolo umati lo Eeya?”
4Loo̒dungohe uito, tei Musa losujudu lomola tohuta wau lodua̒ ode Eeya. 5Lapatao̒ tio loloi̒ya mao̒ odelei Kora wau tahidudua̒ oilo, “Loombu dumodupo Eeya mamopo bilohei olanto tatoonu milikii-Lio, wau tatoonu tapohetuwola Olio. Taa u tilulao-Tio mapoluasia-Lio mohimbideo̒ Olio. 6-7Loombu dumodupo yio̒ wau tahidudua̒ olemu musi mohama mao̒ tataa-mbatiyala lotulu, moluangao̒ wolo bohu lotulu wau dupa, modelo mota ode mesba. Mopiohulo de bilohento tatoonu to wolotanto tamaa tulaoto lo Eeya. Malo tuuheta uito, wuu tau-tauwalo Lewi!”
8Wumbutio mola tei Musa loloi̒ya mao̒ odelei Kora, “Dungohilo, wuu tau-tauwalo Lewi! 9Wolo to pikiilangi limongoli utie sua̒li kikiio̒ deu̒ Allahu Taa̒ala lo Isirai̒lu lolulaotao̒ olimongoli lonto wolota tau-tauwalo Isirai̒lu alihu timongoli mowali mohimbideo̒ Olio, wau motuugasi to Kema-Lio, boli mokalaja duo̒lo umati lo Isirai̒lu wau momaya olimongolio? 10Yio̒, Kora, wau ngoa̒amila taulo Lewi maloo̒ toduo mai hulumati boito lonto Eeya – wau botia timongoli hemo hinggile u mowali iimamu olo! 11Wonu yio̒ wolo tahidudua̒ olemu mobiihu to olei Haruna, tutuulio tutu timongoli moluwali to Eeya!”
12Lapatao̒ tei Musa lei̒ tiangai olei Datan wolei Abiram, bo timongolio loloi̒ya, “Ami diila mohuto monao̒ mai! 13Debo diipo lotuuheta yio̒ malodelo mai olami yilumualao̒ lonto huta lo Masiri u molomiyodu boito wau momate olami mate-mateelo mao̒ tohuta datahu wau luasi udelita botie? Wolo yio̒ musi momalenta olami olo? 14Tutuulio tutu yio̒ diila modelo olami ode huta u molomiyodu, meaalo mongohi mao̒ olami hahaa-laboluwalo wau ii̒i-lengiyalo angguru mowali miliki pusaka lami! Botia yio̒ ohilaa mohimbulo olami! Diila, ami diila mohuto monao̒ mai!”
15Tei Musa loingo daa̒ wau loloi̒ya ode Eeya, “Yaa Eeya, ambunguolo diila mao̒ tolimowa dewo limongolio. Diila pee̒enta mao̒ watotia loo̒luhi penu boli ngotaa mao̒ limongolio; tumbao̒ penu boli kolodai tuwau diila pee̒enta mao̒ hilama lowatotia lonto olimongolio.”
16-17Lapatao̒ ualei Musa odelei Kora, “Ponao̒lo mai loombu ode Kema lo Eeya wolo tadulo hetuto limo lopulu lota tahiidudua̒ olemu. Tei Haruna olo mawoluo mola teto. Timongoli musi modelo mola tambati lotulumu ngota-ngota. Podutua mao̒ dupa todelomio, lapatao̒ podewowa mola ode Eeya.” 18Yi ngota-ngota lohama mao̒ tambati lotululio, loluangao̒ wolo bohu lotulu wau dupa, lapatao̒ tilimihula tohuhebu Kema lo Eeya wolei Musa wau lei Haruna. 19Lapatao̒ tei Kora malo ngambu mai ngoilanggubu umati wau timongolio tilimihulao̒ lotaalua wolei Musa wau lei Haruna tohuhebu Kema lo Eeya. Debolo ngoilanggubu umati loo̒onto tinelo ila-ilatai lo Eeya. 20Lapatao̒ Eeya lotahuda mao̒ odelei Musa wolei Haruna, 21“Potoulilo monto tau-tauwalo boito; Wau̒ ohilaa mopobinasa mai olimongolio botiyaalo olo.”
22Bo tei Musa wolei Haruna losujudu lolubo wau loloi̒ya, “Yaa Allahu Taa̒ala, Eeyaalo talongohi mai tutumulo ode totoonulalo u hitumula. Wonu bo ngotaalio wambao̒ tao̒dusa, ambunguolo wolo Eeya momuluka mai ode ngoilanggubu umati?”
23 Eeya lotahuda odelei Musa, 24“Ahuli mao̒ tau-tauwalo molahi monto kekee-mawaalo lei Kora, Datan wolei Abiram.”
25Lapatao̒ tei Musa lou̒ tilunuhe lomongo tau̒wa lo Isirai̒lu, lonao̒ mota ode tambati lei Datan wolei Abiram. 26Tei Musa loloi̒ya mao̒ ode tau-tauwalo Lewi, “Pohalahulo monto tahileeta botie wau diila mao̒ podedeta penu boli wolo monto haku limongolio. Wonu timongoli diila modungohe, timongoli mopo binasaalo woli mongolio sababu dusa limongolio.” 27Lapatao̒ tau-tauwalo Isirai̒lu boito lohalahu lonto kekee-mawaalo lei Kora, Datan wolei Abiram.
Tei Datan wolei Abiram mailumualao̒ wau ngota-ngota donggo hitihula tohuhebu lokema, wolo walao̒ wau dile limongolio. 28Lapatao̒ tei Musa loloi̒ya mao̒, “Woleea botie timongoli mamotota mao̒ deu̒ Eeya malolao mai olaatia u lohutu ngoa̒amilalo botie wau uito diila hilaa lowatia lohihilao. 29Wonu tau-tauwala boito mate wolo dudelo u biasa, wau diila ohukuumani wolo-wolo monto Allahu Taa̒ala, yi ui-uitolo tuotio Eeya diila molao mai olaatia. 30Bo wonu Eeya mohutu mai hitua-tuawua udiipo pee̒enta mao̒ ilodungohe limongoli ngotilonggadu botie, wau wonu huta mobutao̒ u moloololao̒ olimongolio wolo totoonulalo miliki limongolio, tilinggula timongolio tumuwota mola hitumula ode delomo dunia lotaa mate, yi otaawa mao̒ limongoli deu̒ tau-tauwala boito helo lawali to Eeya.”
31Lolamemeta lapatio mao̒ tei Musa yilapato lobisala, huta towalungo oa̒ato limongolio lobutao̒lo mola, 32wau loloololao̒ olimongolio wolo ngaalaa̒ limongolio wau ngoa̒amila tahidudua̒ olei Kora, wau totoonulalo halata upango limongolio. 33Yi malei padungolo mola timongolio hitumula ode delomo dunia lo taa lopuunungo wolo totoonulalo u mililiki limongolio. Huta u lobutao̒ boito luli lotaau̒be wau timongolio yilooli lomola tiloololo huta. 34Ngoa̒amila taulo Isirai̒lu tawoluo mota teto matilumeteo̒ tou̒ loo̒dungohe olimongolio hiwuwaatia̒, “Teteo̒! De ito toloolo lohuta!”
35Lapatao̒ Eeya lopodungga mai tulu uloo̒pobu tadulo hetuto limo lopulu lo tahemo podewo dupa boito.
Tambati lotulu
36Lapatao̒ Eeya lotahuda odelei Musa, 37-38“Ahuli mao̒ tei Eleajar walai̒ Iimamu Haruna momintaa̒a tataa-mbatiyala lotulu monto lalaa-bitowaalo ulopobu boito wau mopo mua̒yadeo̒ wahu lodui̒tio ode tambati wewo, sababu tambati lotulu boito yito mantali. Babaa-langiyalo boito yito dewo lotau-tauwalo tamaa hilukuumani mate sababu dusa limongolio. Babaa-langiyalo boito mantali sababu mapilodewo totalu lo Eeya, sababu uito musi dupaalo mowali hipaya-payaade molipa duo̒lo woludu bulemengo lomesba. Sua̒li boito madebo odelo poe̒ela ode Bangusa lo Isirai̒lu.” 39Yi ti Iimamu Eleajar malohama mao̒ tataa-mbatiyalo lotulu boito wau lopoa̒hu tau helodupa mao̒ lowali hipaya-payaade molipa duo̒lo woludu bulemengo lomesba. 40Uito debo odelo poe̒ela ode bangusa lo Isirai̒lu deu̒ ngopohia wali lei Haruna, diaaluo penu boli ngotaa mao̒ tamowali monao̒ mai ode mesba u momobu mao̒ dupa ode Eeya. Taa u molambanga wuu̒du boito mapo binasaalo debo odelo tei Kora wau tahidudua̒ olio. Ngoa̒amilalo boito pilohutu mao̒ debo odelo upilo malentai lo Eeya odelei Eleajar lotimbulude olei Musa.
Tei Haruna lopoa̒ahu bangusa lo Isirai̒lu
41Loloombulio mola ngoilanggubu umati lo Isirai̒lu heloingo olei Musa wolei Haruna. Uali mongolio mao̒, “Timongoli malomate umati lo Eeya yila-yilateelo mao̒.” 42Tou̒ timongolio donggo hia̒mbua helo luwali olei Musa wolei Haruna, timongolio loili mota ode Kema lo Eeya, wau loo̒onto mota heengo lolau̒bei Kema boito, tulusi iloontonga tinelo owoluo lo Eeya. 43Tei Musa wolei Haruna lohimbideo̒ ode talu Kema lo Eeya, 44lapatao̒ Eeya lotahuda mai odelei Musa, 45“Potoulilo monto tau-tauwala boito. Wau̒ mamopo binasa mao̒ olimongolio totambati boito olo!”
Timongolio duulota losujudu lomola wau lolubo, 46lapatao̒ tei Musa loloi̒ya mao̒ odelei Haruna, “Hamaawa mao̒ tambati lotulumu, tuangi mao̒ wolo bohu lotulu monto mesba wau dutua mao̒ dupa toitaatio. Hua̒a delowalo ode umati wau pohutua mao̒ upacala pongambungualo dusa ode limongolio. Aliheo̒! Omuluka lo Eeya mawali-walihuhu wau wembolo malo toduo mai.” 47Tei Haruna helohutu mao̒ wolo uiloi̒ya lei Musa. Tio tilumetea̒ mota ode huungo umati tadonggo hia̒mbua wau ilotuhata lowembelo. Yi tei Haruna lopodutu mao̒ dupa toitaato bohu lotulu, wau helohutu upacala polulutalo dusa duo̒lo umati. 48Wembelo boito lohuheli, wau tei Haruna woluo towolota lotau-tauwalo tadonggo tumu-tumulo wau tamailate. 49Tailate tou̒ boito maito mopulaa patolihu pitu lohetuto lota, diila leituwoto timongolio tailate todelomo polo malakala lei Kora. 50Lapatao̒ wembelo boito lohuheli, tei Haruna luli lohualingao̒ odelei Musa tohuhebu Kema lo Eeya.
Currently Selected:
YIA̒APO 16: LAIGOR
Highlight
Copy
Compare
Share
Want to have your highlights saved across all your devices? Sign up or sign in
