YIA̒APO 15
15
Wuu̒du pasali lobake
1 Eeya longohi mai odelei Musa 2wuwuu-uduwaalo botie u musi pohutuo mao̒ lobangusa Isirai̒lu tolipu u mawohi mao̒ lo Eeya ode limongolio. 3Duo̒lo bake meaalo bake pomayali danti meaalo bake iloheela lohilao meaalo to lalaa-mengiyalo biasa, timongoli mowali mopodewo mao̒ ode Eeya: sapi ulai̒, himba ulai̒, himba meaalo batade. Boolo babaa-keyaalo boito moo̒sanangi hilaa lo Eeya. 4-5Titaalo tita tamo podewo himba meaalo batade ode bake yilalango ode Eeya, musi modelo olo pee̒-pee̒enta wolo timii̒du tuwau bibiahe boito, ngokilo labu ilulau wolo ngoliiteri winulo jaitun ode bake pohinta, wau olo ngoliiteri taluhu angguru. 6Wonu u pobakeelo boito himba ulai̒ tuwau, musi podewolo olo dulo kilo labu ilulau wolo ngoliiteri wau ngoputu winulo jaitun ode bake pohinta, 7wau ngoliiteri wau ngoputu taluhu angguru. Boolo bake boito moo̒sanangi hilaa lo Eeya. 8Wonu u pobakeelo boito sapi ulai̒ tuwau ode bake yilalango meealo bake pomayali danti meaalo bake lo polodame, 9musi podewolo olo tolokilo labu ilulau wolo dulo liiteri winulo jaitun ode bake pohinta, 10wau dulo liiteri taluhu angguru. Boolo bake boito moo̒sanangi hilaa lo Eeya.
11Ui-uitolo u musi podewolo pee̒-pee̒enta wolo timii̒du sapi ulai̒ tuwau, himba ulai̒, himba meaalo batade. 12Wonu pobakeelo boito lebe lou̒ bibiahe tuwau, yi dewo lolabu, winulo wau taluhu angguru boito olo musi duhengalo moduduo̒ bandingilio. 13Sua̒li boito musi pohutuo mao̒ lotimii̒du taulo Isirai̒lu tou̒ tio mopodewo bake. Boolo bake boito moo̒sanangi hilaa lo Eeya. 14Tau deli ngota tabilu-biluloa̒ towolota limongoli, mopio bo wakutu ngopee̒ mola meaalo u motitatapu, musi modungohe ngoa̒amila wuu̒du boito wonu tio mopodewo bake lou̒ aalo u boolio moo̒sanangi hilaa lo Eeya. 15-16Ngoa̒amila butoo̒ wau wuu̒du yito tutuuwauwa ode limongoli wau ode tau deli tahi biluloa̒wa towolota limongoli, sababu timongoli wau timongolio yito tutuuwauwa todelomo bibilohu lo Eeya. Wau sua̒li boito pohu-pohutu u ohiheo-hiheolo mao̒.
17 Eeya longohi mai odelei Musa 18wuwuu-uduwaalo botie u musi pohutuo mao̒ lobangusa Isirai̒lu tolipu u mawohi mai lo Eeya ode limongolio. 19Wonu bolo timongoli malo lumulao̒ lolamela wolo ulowali tilapulo lipu boito, timongoli musi mopowiwi mao̒ ngotayade duo̒lo dewo poheetu ode Eeya. 20Wonu timongoli molalanga roti monto pale ubohulo tilotobei, roti boito musi podewolo odelo bake poheetu ode Eeya. Dudelo u mopodewo mao̒ tutuuwauwa wolo dudelo mopodewo pale ubohulo hililingao̒ limongoli. 21U ohiheo-hiheolo mao̒ timii̒du roti monto pale ubohulo tilotobei boito musi wohi limongoli odelo dewo poheetu ode Eeya.
22-24Wonu bolo timongoli lou̒ diila sangaja momalongo tala tuwau towolota lowuu̒du u mailohi mai lo Eeya odelei Musa, tumulalo mao̒ monto dulahu Eeya mongohi wuu̒du boito wau wumbutio mola wawaalia mai, wau totala boito pilohutu sababu umati diila motota lowuu̒du, yi ngoilanggubu umati musi mopodewo sapi ulai̒ tuwau ode bake yilalango. Pee̒-pee̒enta woleeto musi podewolo bake pohinta wau taluhu lo angguru debo odelo utilantu mao̒. Boolo bake boito moo̒sanangi hilaa lo Eeya. Wewolio leeto musi pobakeelo himba ulai̒ tuwau ode bake pongambungualo dusa. 25Lapatao̒ ti iimamu musi mohutu upacala pongambungualo dusa ode umati. Yi timongolio maa ambunguo-Lio sababu totala boito pilohutu lou̒ diila sangaja, wau sababu timongolio malodelo bake pongambungualo dusa wau bake yilalango ode Eeya. 26Ngoilanggubu umati lo Isirai̒lu wau tau deli tahi biluloa̒wa towolota limongolio maa ambunguola, sababu ngoa̒amilalo ilodedea̒lio todelomo totala udiila silangaja boito.
27Wonu bolo tau ngota wambao̒ odusa lou̒ diila sangaja, yi tio musi mopobake mao̒ batade bilango tuwau u ou̒umulu ngotaunu ode bake pongambungualo dusa. 28Ti iimamu musi mohutu upacala pongambungualo dusa totalu lo Eeya, alihu tau boito ambunguolo dusaalio. 29Wuu̒du boito pohu-pohutu olo penu boli tatoonu wambai̒o tamohutu dusa lou̒ diila sangaja, mopio tio boito taulo Isirai̒lu meealo tau deli tamoti tatapu towolota limongolio.
30Bo wonu ngotaalio lo Isirai̒lu meaalo ngotaalio deli wolo sangaja mohutu dusa, tio diila momandungi to Eeya. Tau boito musi hukuu-maniyolo mate, 31sababu tio moluwali to Eeya wau wolo sangaja molambanga palenta lo Eeya. Tau boito mate sababu totalaalio lohihilao.
Taa u molambanga wuu̒du dulahu Saabati
32Tou̒ taulo Isirai̒lu mola tohuta datahu wau luasi udelita, talolai̒ ngota ilodungaalio donggo hemo himoa̒a ayu podiio̒ todulahu Saabati. 33Tau boito dilelolio odelei Musa wolei Haruna wau ode ngoilanggubu umati, 34lapatao̒ tilaahangia sababu diipo mopatato tio musi pongoola. 35Eeya lotahuda mao̒ odelei Musa, “Tau botie musi hukuu-maniyolo mate. Tio musi deloolo ode bulemengo kema wau mola teto ngoilanggubu umati musi momai̒ wolo botu tunggula mate.” 36Yi ngoilanggubu umati lodelo wolo pakusa olio ode bulemengo kema wau helomai̒ olio wolo botu tunggula yilate, debo odelo upilo malentao̒ lo Eeya.
Wuu̒du pasali lo ruruu-mbaiyaalo
37 Eeya lopoa̒hu olei Musa 38mopo tunggulao̒ ode bangusa lo Isirai̒lu, “Pohutua mao̒ ruruu-mbaiyaalo tohuudu pakeyangimu wau pohutua mao̒ tali wahue̒nte to timii̒du rumbai. Uito musi pohutuo mao̒ limongoli wawaalia mola. 39Ruruu-mbaiyaalo yito duo̒lo poe̒ela: Timii̒du timongoli moo̒onto mao̒, maa oe̒ela mola limongoli totoonulalo palentaa-U̒ wau modungoheo̒. Wau sababu uito timongoli diila tamo lipata ola-U̒ u modudua̒ otohilaa wau niyati limongoli lohihilao. 40Ruruu-mbaiyaalo boito mamo poe̒ela olimongoli u modungoheo̒ ngoa̒amila palentaa-U̒, tilinggula timongoli otu-otutuulo mao̒ mowali milikii-U̒. 41Wau̒lo Eeya Allahu Taa̒ala limongoli; Wau̒ malodelo mai olimongoli yilumualao̒ lonto Masiri alihu Wau̒ mowali Allahu Taa̒ala limongoli, Wau̒lo Eeya.”
Currently Selected:
YIA̒APO 15: LAIGOR
Highlight
Copy
Compare
Share
Want to have your highlights saved across all your devices? Sign up or sign in
