YIA̒APO 12
12
Ti Miriyama hilukuumani
1Tei Musa malohama taabua ngota lo Kus lowali dilelio, wau sua̒li boito lowali alaasani li Miriyama wolei Haruna u helo hentea̒ olei Musa. 2Uali mongolio mao̒, “Wolo bo motimbulude olei Musa wamabao̒ Eeya motahuda mai? Wolo diila motimbuludei olanto olo Eeya motahuda mai?” Ilodungohe lo Eeya wolo uiloi̒ya limongolio. 3Tei Musa yito taa udapa-dupapa daa̒ lohilao, mongilaboto lo ngoa̒amila taa u hitumula todunia botie.
4Debolo Eeya lotahuda mai odelei Musa, olei Haruna woli Miriyama, “Timongoli toulota ponao̒lo mota ode Kema-U̒.” Lapatao̒ timongolio malonao̒ mota odito 5wau Eeya lotuhutai todelomo patoo̒ heengo. Eeya tilimihulao̒ tohuhebu lo Kema-Lio wau lotianga olei Haruna woli Miriyama. Taduulota boito malomaju mota, 6wau Eeya lotahuda mao̒, “Dungohilo tahuda-U̒ botie! Wonu towolota limongoli woluo ngotaalio lonabi, Wau̒ mamopo ilaalo batanga-U̒ olio todelomo bibii-loheyaalo, wau mamo tahuda mai olio todelomo tohiilopo. 7Bo diila odito wolo wato-U̒ tei Musa. Tio-tiolo taa utatapu wau molotolo hilao towolota lo umati-U̒. 8Wau Wau̒ helo bisala wolio tataalua baya, wolo mopatato wau diila wolo tataapulawa. Tumbao̒ baya-U̒ maa iloontongalio! Yilongola timongoli buheli moluwali olei Musa, wato-U̒ boito?”
9 Eeya lomuluka daa̒ olimongolio duulota, wau Tio lonao̒. 10Tou̒ heengo boito lololaa mao̒ Kema lo Eeya, iloontonga ti Miriyama ilotuhata ngongoto lo alipo umoo̒ topotala; alipio lanta debo odelo pini. Tou̒ tei Haruna loili mao̒ odeli Miriyama wau loo̒nto deu̒ tio mai̒lo tuhata lo ngongoto boito, 11malo loi̒ya tio odelei Musa, “Tulungia mai, Tuaniu̒, diila mao̒ polulia amiaatia sikisaalio sababu dusa u pilohutu lamiaatia todelomo ohuulodu lamiaatia. 12Diila mao̒ polulia tio mowali debo odelo tau̒nge tapotutu mai mailate, wolo tapulio ngotayade mohutodu.”
13Yi malo ngiibode mola tei Musa ode Eeya, “Yaa Eeya, watotia momolohone, ambunguolo poo̒lulia mai tio!”
14 Eeya lolametai, “Humayaalio bayalio ponula loiyohu liyamolio, wolo diila pituhui mola tio momanta moolito? Polahia mao̒ tio monto kema ngotilonggadu pituhui mola, wau lapatao̒ uito tio mowali muli tumuwotao̒.” 15Lapatao̒ ti Miriyama yiluwalio lonto kema ngotilonggadu pituhui mola, wau bangusa boito diila lolimbato lonteeto tunggula ti Miriyama poluasialio muli mohualingao̒ ode kema. 16Lapatao̒ timongolio lololaa mao̒ Hejerot wau lotikema to auhu delita lo Paran.
Currently Selected:
YIA̒APO 12: LAIGOR
Highlight
Copy
Compare
Share
Want to have your highlights saved across all your devices? Sign up or sign in
