YIA̒APO 13
13
Opulaa duulota taa u tiluugasia motulete lou̒ poo̒-poooyo
(Tin. 1:19-33)
1 Eeya lotahuda mai odelei Musa, 2“Monto timii̒du suku lo Isirai̒lu utoliyaalo ngotaalio towolota lomongo tau̒walio mola motolo hehulao̒ huta lo Kanaa̒n u mawohi-U̒ mai ode Bangusa lo Isirai̒lu.” 3-15Tutuuu̒de wolo palenta lo Allahu Taa̒ala boito, tei Musa malo ngutolia olimongolio lonto huta datahu wau luasi udelita lo Paran. Ngoa̒amila tau boito yito mongo tau̒wa towolota taulo Isirai̒lu:
| Suku | Tau̒wa |
|---|---|
| Ruben | Syamua walae̒e Jakur |
| Simeon | Sapat walae̒e Hori |
| Yehuda | Kale walae̒e Yepune |
| Isakhar | Yigal walae̒e Yusu |
| Epraim | Hosea walae̒e Nun |
| Benyamin | Palti walae̒e Rapu |
| Jebulon | Gadiel walae̒e Sodi |
| Manasye | Gadi walae̒e Susi |
| Dan | Amiel walae̒e Gemali |
| Asyer | Setur walae̒e Mikhael |
| Naputali | Nahbi walae̒e Wopsi |
| Gad | Guel walae̒e Makhi |
16Ui-uitolo taa u tiluugasia motulete lou̒ poo̒-poo̒oyo tai̒lutolia lei Musa mola mongimato lipu boito. Tei Hosea walae̒e Nun tiluloo̒ lei Musa tanggulio lowali Yosua.
17Tou̒ tei Musa lopoa̒hu olimongoli lomonggato, tio lolahuli mao̒ olimongolio, “Polibaya mola to ambahu tilayo, motidulunga ode wimbihu huliaalio huta lo Kanaa̒n, lapatao̒ tulusi ode madala ohuludio. 18Tuletea mao̒ woloolo mola lipu boito, wolo ulipulio dadaata meaalo ngoi̒di, wolo timongolio molotolo meaalo molulupuhu. 19Palakisai mao̒ wolo lipu boito mopiohe meaalo diila, wau wolo ulipulio hibiluloa̒wa to kakaa-mbunguwalo u huo̒-huo̒ meaalo todelomo kokoo-tawaalo u obintengi. 20Poo̒lotola mola hilaamu. Bilohi mao̒ wolo hutalio molomiodu wau dadaata bubuu-ngowaalo ayulio. Diila mao̒ lipata modelo mai ngoi̒di huhuu-ngowaalo u lobutu mola teto.” Tou̒ boito bohulo sembo lo angguru.
21Yi malonao̒ tau-tauwala boito ode ambahu tilayo wau lotulete lipu boito tumulalo mao̒ lonto huta datahu wau luasi udelita lo Jin towimbihu huliaalio ode tilayo demola kota Rehob membideo̒ lodalalo ode Hamat. 22Bohu-bohulio timongolio lonao̒ ode wimbihu huliaalio lolipu boito wau leidungga mola tokota lo Hebron, tambati piloti biluloa̒ lotau-tauwalo Ahiman, Sesai wau Talmai, wali mai lei Enak. Hebron bilongulio pitu lotaunu mola tou̒ diipo kota Joan to Masiri. 23Lapatao̒ malei dungga mola timongolio to Lumbaya lo Eskol. Mota teto timongolio lomangge mao̒ ngopangge hungo lo angguru u odito buheetio, tilinggula musi potaalolo wolo ayu ngoputu lo taduulota. Timongolio lodelo olo dengolo hungo lodalima wau hungo lo ara. 24Tambati boito ilunteelio Lumbaya Eskol sababu pangge hungo lo angguru u pilangge lotau Isirai̒lu mota teto.
25Lapatio mao̒ lotulete lipu boito wopato pulu hui mola hiheolio, taa u tiluugasia motulete lou̒ poo̒-poo̒oyo boito luli lohualingai 26wau lopo duloheo̒ odelei Musa, Haruna wau ngoilanggubu umati lo Isirai̒lu tadonggo hia̒mbua to Kades, tohuta datahu wau luasi udelita lo Paran. Timongolio helo hungguli mao̒ wolo umaa iloontonga limongolio wau lopo biloheo̒ huhuu-ngowaalo u dilelo mai limongolio. 27Uali mongolio odelei Musa, “Amiaatia malo tulete mao̒ lipu boito wau iloontonga lamiaatia deu̒ hutalio kaya wau molomiodu, wau botie ngoi̒di huhuu-ngowaalo mola lonteeto mai. 28Bo tuango lipu boito hilootola. Kokoo-tawaalo limongolio duduulaa̒ wau obintengi. Donggo poli, amiaatia loo̒onto mao̒ tau-tauwalo wali mai lo lakisasa mola teto. 29Taulo Amalek hibiluloa̒wa towimbihu huliaalio lolipu boito; taulo Het, Yebus wau Amori hibiluloa̒wa tomadala u ohuludu; hiambola taulo Kanaa̒n hibiluloa̒wa tomadala to ngohilayaa̒ lodeheto wau to ngohilayaa̒ Dutulaa Yordan.”
30Bo tei Kale helo poduo̒otao̒ hilaa lotau-tauwalo tahemo poi̒laalo suusa odelei Musa. Ualei Kale, “Lipu boito musi tuhuwonto, wau hamaanto botia olo, sababu motuuheta lotoloonto u mopoo̒laaheo̒.”
31Bo tau-tauwalo taluli lohualingai wolei Kale boito malo loi̒ya, “Diila, ito diila mambo moluhu olimongolio. Tuango lipu boito lebe molotolao̒ wolaanto.” 32Lapatao̒ timongolio helo poloo̒po silita wimbulo towolota taulo Isirai̒lu pasali lolipu u matilulete limongolio boito. Uali mongolio mao̒, “Lipu boito moo̒topotala daa̒, tumbao̒ duo̒lo tuango lipulio lohihlao. Taa u he iloontonga lamiaatia mola teto duduulaa̒ daa̒ wawaai̒o. 33Tumbao̒ iloontonga lamiaatia tau-tauwalo tadebo odelo lakisasa, deu̒yito-yito wali mai taulo Enak. Wonu pobadingio mola woli mongolio, amiaatia molaasa debo odelo bulita, wau tantulo mao̒ odito olo to anggapu limongolio olamiaatia.”
Currently Selected:
YIA̒APO 13: LAIGOR
Highlight
Copy
Compare
Share
Want to have your highlights saved across all your devices? Sign up or sign in
