YIA̒APO 11
11
Tambati u iluntee Tabera
1Todulahee tuwau bangusa boito malo poilaalo suusa ode Eeya tomimbu osusuu-kaliyaalo limongolio. Loo̒dungohe poilaalo suusa boito, Eeya malo muluka wau lopodungga mai tulu ode yitaati mongolio. Tulu boito lotia̒lapolo mola towolota limongolio wau loo̒pobu ngotayadio lokema. 2Tau-tauwalo boito mahi wuwaatia̒ lei̒ tulungi olei Musa. Tulusi tei Musa malodua̒ mola ode Eeya, yi mailateelo mola tulu boito. 3Sababu uilowali mai boito, yi tambati boito iluntelio Tabera, sababu mota teto tulu lo Eeya wali-walihuhu tohuungi mongolio.
Tei Musa lolulaoto tau̒wa pitu lopulu lota
4Todelomo nonao̒ tau-tauwalo Isirai̒lu boito woluo olo tau-tauwalo deli talo duduo̒. Timongolio boito ohilaa daa̒ molamela tapu, wau taulo Isirai̒lu olo malo poilaalo suusa. Uali mongolio, “Aa, nte woluo tapu ode olanto! 5Ito loo̒ eela mola to uponula u mapilo lamelonto lou̒ beebasi to Masiri, to katimu, samangga, orei, pialaatula meela wau pialaatula moputio̒! 6Botia ito ilopulita lo lotolo sababu diaaluo ua̒alo ngopohia bo manna wambao̒ u oontonganto.”
7Rupa lo manna boito debo odelo hibotu-botua kekeei̒, lakulio moputio̒ monto lalaahe. 8-9Tou̒ hui manna boito modehu mai pee̒-pee̒enta wolo wambulo ode tambati lokema. Didimodupo tau-tauwala mononao̒ oditomota odiamai u mohimoa̒ao̒, lapatao̒ mohilinga meaalo molobua̒ mowali labu, wau mohutu mao̒ mowali kuukisi hihulula u molipa. Rasaalio debo odelo kuukisi u pilanggangi wolo winulo jaitun.
10Tei Musa loo̒dungohu tau-tauwalo Isirai̒lu boito hipobiihea, sambela hitihula ngopo-ngopolemboa̒ totalu huhebu lo Kema limongolio. Tulusi malo walihuhulo mola omuluka lo Eeya tilinggula tei Musa masiluukali. 11Yi maloloiya tio ode Eeya, “Ambunguolo yilongola Eeya lopoo̒suusa mai odie olo watotia? Ambunguolo wolo Eeya diila sanangi to watotia? Ambunguolo yilongola Eeya lohudu mai titihula ode ngoa̒amila tau boito to watotia? 12Ambunguolo wolo watotia talo bantaala meaalo lopotutu mai olimongolio boito? Ambunguolo yilongola Eeya mopoa̒hu olo watotia mowali debo odelo ngotaalio tamoo-laalawa umomuduo̒ walao̒ kikiio̒ tilinggula watotia musi molaala olimongolio mololaalaaita ngohilayao̒ lononao̒ ode huta u pilodanti lo Eeya ode loluhuru limongolio? 13Bilohilo, timongolio bibiihe tulusi mohile tapu. Wau tou̒toonu musi pololohe lowatotia tapu ode taa ngoa̒amila boito? 14Diila mambo watotia momanta mao̒ sua̒li u odito udaa̒ boito; mailaba buheetio tuugasi boito ode watotia! 15Wonu Eeya debo mohutu mai olo watotia odie, ambunguolo ponuwalo mai watotia; lebe mopioheo̒ hua̒a pateyalo mai mate-mateelo mao̒ olo watotia alihu watotia diilalo momanta polodutolo botie.”
16Lapatao̒ lotahuda mai Eeya odelei Musa, “Ambuwa mao̒ towolota bangusa lo Isirai̒lu pitu lopulu lota mongo panggola tai̒laaku mao̒ odelo tau̒wa lobangusa. Delowa mai timongolio ode talu-U̒ todelomo Kema-U̒, lapatao̒ aluhi mao̒ timongolio timihula teto totilimu. 17Wau̒ mamolaahei wau motahuda olemu totambati boito, wau ngotayadu monto kawasa u mailohi-U̒ mai olemu, mawohi-U̒ mao̒ ode limongolio. Yi timongolio mamoo̒ bantu olemu momanta titihula tobangusa botie, wau diilalo palalu bantaamu lohihilao. 18Botia polelea mao̒ utie ode bangusa boito: Pomantaliya mao̒ batangamu tou̒ loombu mola; timongoli mamo lamela tapu. Eeya malo dungohei olimongoli hilumoyongo wau lopoilaalo suusa deu̒ timongoli ohilaa molamela tapu, wau deu̒ paladi mongoli lebe mopioheo̒ tou̒ to Masiri. Botia Eeya mamongohi mai olimongoli tapu, wau matamelo mao̒ limongoli. 19Timongoli mamolamela uito diila bo wambao̒ ngotilonggadu ngohui meaalo duuhui, meaalo limo hui meaalo mopulu hui, tumbao̒ diila bo wambao̒ dulopulu hui, 20bo ngohula polupolu hiheolio timongoli molamela uito, dilumutu timongoli mowali mongongoto wau motuo̒tuo̒ sababu ua̒alo boito. Sua̒li boito motoduo sababu timongoli diila mololimo to Eeya tohuungi mongoli. Wau olo sababu timongoli mahilu moyongo totalu-Lio wau hemo poi̒laalo suusa deu̒ timongoli malo lolaa mao̒ huta lo Masiri.”
21Lapatao̒ tei Musa loloi̒ya ode Eeya, “Bangusa u tilau̒wa lo watotia botie ngojumula wolomo hetuto lihu lota. Woloolo mola Eeya moo̒ tahuda mai deu̒ Eeya mamongohi olimongolio tapu tutuuhetalo mao̒ ngotilonggadu ngohula mola? 22Malo tou̒toonu o sapi wau himba u odito daatalio umusi olotolo u mopo butuheo̒ olimongolio? Wolo ngoa̒amila tola todeheto tuheeto wonu wohi mao̒ mowali ua̒alo limongolio?”
23Tametai lo Eeya, “Yilongola okokuwasaa-U̒ ee̒enggade? Yio̒ mahua̒a moo̒onto mao̒ wolo upilo tahuda-U̒ mai boito otutu motoduo meaalo diila!”
24Yi mailumulao̒ tei Musa wau pilo tunggulio mao̒ ode bangusa boito wolo u matilahuda mai lo Eeya. Tei Musa malo ngambu mai pitu lopulu lota tau̒wa boito wau lopoa̒hu olimongolio tilimihula topalito Kema lo Eeya. 25Lapatao̒ Eeya lolaahei todelomo heengo wau lotahuda odelei Musa. Eeya lohama ngotayadu kawasa u mailohi-Lio odelei Musa wau yiludu-Lio ode tau̒wa pitu lopulu lota boito. Tou̒ Rohullah boito lolaahei ode yitaati mongolio, yi malo ngiibodu timongolio debo odelo nabi, bo diila lohiheo.
26Duulota towolota pitu lopulu lota tau̒wa boito, tei Eldad wolei Medad, lotitolaa mao̒ to kema wau diila lonao̒ pee̒-pee̒enta wolo tawewo ode Kema lo Eeya. To kema boito Rohu malolaahei ode yitaati mongolio, wau timongolio duulota olo malo ngibo-ngiibodu debo odelo nabi. 27Lapatao̒ ngotaalio bohulotau tilumetea̒ mota ode bulemengio u lopoo̒taa mao̒ odelei Musa wolo uilowali to olei Eldad wolei Medad.
28Tei Yosua walae̒e Nun tamalo mantu olei Musa tumulalo mai donggo mudalio, loloi̒ya mao̒ odelei Musa, “Pei̒ otonga mao̒ timongolio, Paaa̒!”
29Tei Musa malo lametao̒, “Yilongola yio̒ hemo mikiilangi olau̒? Wau̒ tumbao̒ mohalapu alihu Eeya mongohi mai Rohu-Lio ode ngoilanggubu bangusaa-Lio, wau mohutu mao̒ olimongolio ngoa̒amila mowali nabi!” 30Lapatao̒ tei Musa luli lohualinga mota ode kema pee̒-pee̒enta wolo pitu lopulu lota tau̒wa lo Isirai̒lu boito.
Eeya lopodungga mai bulungi bilubilulu
31Debolo Eeya malo podungga mai dupoto lonto deheto; dupoto boito helodelo bubuu-lungiyalo bilubilulu u hitombota moopa daa̒, tunggula ngomeeteri toitaato tudu lohuta. Bubuu-lungiyalo boito hitombota toitaato kema tunggula ngoilaminga dengolo kilo meeteri topalitio. 32Ilo-ilolaanga boito, ilo-iloonuwa wau ilo-ilolaanga wumbutio mola, tau-tauwalo aasiki helo heu̒paa bulungi bilubilulu. Ngota-ngota helo heu̒paao̒ pulito ngoi̒dilio ngolihu lokilo. Bubuu-lungiyalo boito pilopo pulepe limongolio totili lokema alihu mowali mohengu. 33Ngotilonggadu donggo otapu dadaata u aaloolo, Eeya malo muluka ode bangusa lo Isirai̒lu wau lopo dungga mai baala tuwau towolota limongolio. 34Yi tambati boito ilunteelio “Kuubulu Pololanggamu”, sababu mota teto yilobungo tau-tauwalo taheilate sababu langgamu.
35Lonteeto bangusa boito lolimbata ode lipu lo Hajerot, lapatao̒ lotikema totambati boito.
Currently Selected:
YIA̒APO 11: LAIGOR
Highlight
Copy
Compare
Share
Want to have your highlights saved across all your devices? Sign up or sign in
