YIA̒APO 10
10
Totoo-rompetiyalo monto talaa̒
1 Eeya lotahuda mai odelei Musa, 2“Pohutua mao̒ torompeti duluo monta talaa̒ dilupa u motianga ulipu motia̒mbu meaala u mopoa̒hu olimongolio momonggato. 3Wonu duduuluolo hiipalo haya-haya, boliilio mao̒ ngoilanggubu umati musi motia̒mbu mai to palitumu totalu huhebu lo Kema-U̒. 4Bo wonu tuwau wambao̒ u hiipalo, boliilio mao̒ bo tahimuloa lolipu tamusi motia̒mbu mai to palitumu. 5Wonu torompeti hiipalo limbu-limbu, uito tuotio susuu-kuwaalo talotikema to ambahu tiimuru musi momonggato. 6Wonu hiipalo limbu-limbu u oluolio, yi susuu-kuwaalo to ambahu huliaalio musi momonggato, 7hiambola tingohe uhaya-haya boliilio mao̒ umati musi motia̒mbu. 8Totoo-rompetiyalo boito musi hiipaa mao̒ lomongo iimamu, mongo walae̒e Haruna. Ui-uitolo wuu̒du u musi dungohe limongoli u ohiheo-hiheolo mao̒.
9Wau wonu bolo timongoli mopaatea tolipu limongoli u momintengi mao̒ batanga tomusu tamoluhu mai, hiipalo mola totoo-rompetiyalo boito. Yi Wau̒, Eeya Allahu Taa̒ala limongoli, mamo tulungi wau mopoa̒ahu mai olimongoli to mumuu-suwaalo limongoli. 10Wau olo to duduu-laheyaalo timongoli motiwengahu, deu̒yito-yito to popoo-tihungguwalo Hulala Bohu wau to lalaa-meyangiyalo limongoli uwewolio, torompeti boito musi hiipalo tou̒ timongoli mopodewo bake yilalango wau bake lo polodame ode ola-U̒. Yi Wau̒ mamo tulungi mai olimongoli. Wau̒lo Eeya Allahu Taa̒ala limongoli.”
Taulo Isirai̒lu lomonggato
11Todelomo taunu oluolio lapatao̒ bangusa lo Isirai̒lu lololaa mao̒ Masiri, todulahu odulopulu hulalo oluolio, lolaia̒a mola heenga lonto yitaato Kema lo Eeya. 12Lapatao̒ taulo Isirai̒lu totooyunuta mola lomonggato lololaa mao̒ huta datahu wau luasi udelita lo Sinai, wau heenga boito lohuheli tou̒ timongolio malei dungga mola tohuta datahu wau luasi udelita lo Paran.
13Ui-uitolo bohulo timongolio lomonggato to palenta lo Eeya lotimbulude olei Musa. 14Leimulo lomonggato suludadu uwolu-wolungo totibawa bandela otuwau lei Yehuda, pasuukani domi pasuukani: tei Nahason, walae̒e Aminadab lodelo baliisani suku Yehuda, 15Tei Nataneel walae̒e Juar lodelo baliisani suku Isakhar, 16wau tei Eliab walae̒e Helon lodelo baliisani suku Jebulon.
17Lapatao̒ Kema lo Eeya yilonggalio, wau malo monggato kaumu Gerson wau Merari talo motaalao̒ Kema boito.
18Lapatao̒ malo monggato suludadu uwolu-wolungo totibawa bandela otuwau lei Ruben, pasuukani domi pasuukani: tei Elijur walae̒e Syedeur lodelo baliisani suku Ruben. 19Tei Selumiel walae̒e Jurisyadai lodelo baliisani suku Simeon, 20wau tei Elyasap walae̒e Rehuel lodelo baliisani suku Gad.
21Lapatao̒ uito malo monggato tau-tauwalo Kehat talo motaalao̒ babaa-langiyalo umantali. Wonu bolo timongolio meidungga mota ode tambati potikemaalo u lapatio mao̒, Kema lo Eeya maluli pilopohuli.
22Lapatao̒ lohunuheo̒ suludadu uwolu-wolungo totibawa bandela otuwau suku Epraim, pasuukani domi pasuukani: tei Elisama walae̒e Amihud lodelo baliisani suku Epraim, 23tei Gamalieli walae̒e Pedajur lodelo baliisani suku Manasye, 24wau tei Abidan walae̒e Gideon lodelo suku Benyamin.
25Pulitio mao̒ malo monggato suludadu uwolu-wolungo totibawa bandela otuwau suku Dan. Timongolio yito tamoo-kawalia to dibalaka lou̒ ngoa̒amila otuwau. Timongolio lonao̒ pasuukani domi pasuukani: tei Ahiejer walae̒e Amisyadai lodelo baliisani suku Dan. 26Tei Pagiel walae̒e Okhran lodelo baliisani suku Asyer, 27wau tei Ahira walae̒e Enan lodelo baliisani suku Naputali. 28Ui-uitolo toyunutio lo baliisani taulo Isirai̒lu, pasuukani domi pasuukani, timii̒du timongolio momonggato u molimbato.
29Tei Musa loloi̒ya mao̒ ode wipahio, tei Hobab walae̒e Rehuel taulo Midian, “Ami mamonao̒ ode tambati umodudua̒ tahuda lo Eeya mawohi-Lio mai ode olami. Eeya malodanti mai u mopiohe ode taulo Isirai̒lu. Oditolio dudui̒lo mai, ami mamohutu mao̒ u mopiohe ode limongoli.”
30Tametao̒ lei Hobab, “Oduo̒lo, bo watia ohilaa muli mohualinga mota ode kambungu pilohuluta loduhu laatia.”
31“Diila mao̒ tolai ami,” ualei Musa, “yio̒ tamowali mopotunu mao̒ dalalo olami, sababu otaawamu tou̒toonu ito mowali motikema tohuta datahu wau luasi udelita. 32Wonu yio̒ moduduo̒, yi totoonulalo umopiohe u pilohutu mai lo Eeya ode olami, mapohutuo lami olo ode limongoli.”
Bangusa lo Isirai̒lu lomonggato
33Lapatao̒ bangusa lo Isirai̒lu lololaa mao̒ Sinai, hui̒dee upiloti biluloa̒ lo Eeya, timongolio lononao̒ tolo hui mola hiheolio. Bulua Daantia lo Eeya laito delodelo meimulo woli mongolio u mololoheo̒ tambati potikemawa limongolio. 34Wonu bolo timongolio momonggata monto tambati u potikemaalo, heengo lo Eeya laito woluo toitaato limongolio tou̒ dulahu.
35Timii̒du Bulua Daantia boito mabintao̒lo, tei Musa moloi̒ya, “Pobongulo, yaa Eeya, pobubuu-alaalo mao̒ musu lo Eeya tilinggula taa u molonuo̒ to Eeya mopolahi lobatanga.” 36Wau timii̒du Bulua Daantia boito meidungga totambati pohuheliyalo, tei Musa moloi̒ya, “Pohualingolo mai, yaa Eeya, ode hilihu-lihua ngaalaa̒ lo Isirai̒lu.”
Currently Selected:
YIA̒APO 10: LAIGOR
Highlight
Copy
Compare
Share
Want to have your highlights saved across all your devices? Sign up or sign in
