IMAAMATI 5
5
Omolua palalu podewolo bake pongambunguala dusa?
1Bake pongambunguala dusa palalu podewolo: Wonu bolo tahingota-ngotaawa lou̒ pidu-piduduto pohileaala sakusi to bubutoo̒, bo diila mongohi katalangani pasali wolo umaa iloontonga meaalo ilodungohelio tilinggula tio musi momanta mao̒ akiibatilio.
2Wonu bolo tahingota-ngotaawa ototala sababu diila tilunggai mowali najisi, sababu maloo̒ dedeta hitua-hituawua unajisi, humayaalo mao̒ milate lo binatangi, wau lapatao̒ helo ngalati mao̒ huhutuulio.
3Wonu bolo tahingota-ngotaawa ototala sababu lou̒ diila tilunggai loo̒ dedetao̒ balangi najisi u asaliilio lonto manusia, wau lapatao̒ helo ngalati mao̒ huhutuulio.
4Wonu bolo tahingota-ngotaawa ototala, sababu motadia wolo majanunu u mohutu boli wolo wambai̒o, wau lapatao̒ helo ngalati mao̒ huhutuulio.
5Todelomo timii̒du palakala boito, taa u ototala boito musi mongaku mao̒ totalaalio. 6Wau duo̒lo potoloto dusalio, tio musi modelo mao̒ himba tuwau meaalo batade bilango ode Eeya. Ti iimamu musi mopodewo mao̒ bake boito alihu dusa lotau boito ambunguolo.
7Bo wonu bolo taa u ototala boito diila mambo mopo dapato himba meaalo batade u motoloto dusalio, yi tio musi modelo mao̒ ngopange bulungi tarakuku meaalo bulungi poombo muda, tuwau duo̒lo bake pongambungualo dusa, wau tuwau poli duo̒lo bake yilalango. 8Bubuu-lungiyalo boito musi deloolo odeli iimamu. Ti iimamu tamusi meimulo mopodewo bulungi utilantu mao̒ duo̒lo bake pongambungualo dusa. Buloo̒ bulungi boito musi bibidulo, bo diila mowali tunggulo moputu lunggongio. 9Duhu lobulungi boito musi pomolotia̒ao̒ tobiihu mesba, wau lebelio pitiloola ode bulemengio towumbato mesba duo̒lo bake pongambungualo dusa. 10Lapatao̒ uito ti iimamu mopodewo mao̒ bulungi u oluolio duo̒lo bake yilalango, tutuuu̒de wolo wuu̒du. Odi-odieelo mola pohuli li iimamu mopodewo bake duo̒lo dusa lotau boito, yi tio maa ambunguo lo Eeya.
11Wonu taa u ototala diila mambo mopo dapato bulungi tarakuku ngopange meaalo bulungi poombo duo̒lo bake pongambungualo dusa, yi tio musi modelo mao̒ labu ngokilo. Labu boito diila mowali ulauwola wolo winulo jaitun meaalo wolo alama, sababu bake boito yito bake pongambungualo dusa wau diila bake pohinta. 12Labu boito musi deloolo odeli iimamu. Ti iimamu musi mohama mao̒ ngaau̒po monto labu boito odelo tuoto deu̒ ngoa̒amilalo mapilodewo ode Eeya. Labu u ngaau̒po boito musi lalangolo toitaato mesba odelo bakelio lou̒ aalo. Ui-uitolo bakelio duo̒lo pongambungualo dusa. 13Odi-odieelo mola dudelo li iimamu mopodewo bake duo̒lo dusa lotau boito, yi tio maa ambunguo lo Eeya. Labu ulebelio yito tayadu li iimamu, debo odelo tobake lopale.
Bake poluloo̒ uiluhi
14 Eeya longohi mao̒ olei Musa wuwuu-uduwaalo botie. 15Wonu tahingota-ngotaawa lou̒ diila tilunggai helohutu dusa sababu lomalonga tou̒ mohudu mao̒ dedee-wowaalo u pilowajibu ode Eeya, yi tau boito musi modelo mao̒ bake poluloo̒ uiluhi. Bake boito musi himba tuwau meaalo batade ulai̒ udiila otailolio, wau wohiyalo halaga modudua̒a halaga upohu-pohutu to Kema lo Eeya. 16Tau boito musi momayali mao̒ wolo u omoo̒molu pilalongio, duhengalo dulo pulu porseni. Lapatao̒ tio musi mohudu mao̒ binatangi boito ode iimamu, wau ti iimamu mopobake mao̒ duo̒lo dusa lotau boito, yi tio maa ambunguo lo Eeya.
17Wonu tahingota-ngotaawa wolo diila tilunggai helohutu dusa sababu lolambanga tala tuwau palenta lo Eeya, yi tau boito ototala wau musi momanta akiibatilio. 18Duo̒lo bake poluloo̒ uiluhi tio musi modelo mao̒ himba tuwau meaalo batade ulai̒ udiila otailolio wau wohiyalo halaga modudua̒a halaga upohu-pohutu to Kema lo Eeya. Ti iimamu mopobake mao̒ duo̒lo dusa lotau boito, yi tio maa ambunguo lo Eeya. 19Ui-uitolo bake poluloo̒ uiluhi duo̒lo totala u pilohutulio ode Eeya.
Currently Selected:
IMAAMATI 5: LAIGOR
Highlight
Copy
Compare
Share
Want to have your highlights saved across all your devices? Sign up or sign in
