IMAAMATI 4
4
Bake ode duduu-sawaalo udiila tilunggai
1 Eeya lopoa̒hu olei Musa 2mopo malalumu mao̒ ode bangusa lo Isirai̒lu deu̒ boli tatoonu wambai̒o tadiila wolo tilunggai odusa sababu molambanga tala tuwau monto papaa-rentaalo Eeya, musi modudua̒ wuu̒du botie.
3Wonu bolo tao̒dusa boito ti Iimamu Daa̒, tilinggula bangusa lo Isirai̒lu modudua̒ ilototala, tio musi mopobake mao̒ sapi ulai̒ buboto tuwau udiila o tailolio ode Eeya alihu dusaalio ambunguo-Lio. 4Sapi boito musi deloolio mota ode huhebu Kema lo Eeya. Ti Iimamu Daa̒ musi mopodutu uluu̒lio toitaato lunggongo binatangi boito, lapatao̒ mongolotao̒ totalu lo Kema. 5Ngotayadu monto duhulio musi deloolio mota potuwotolo ode delomo Kema. 6Lapatao̒ tio musi mopolomo mao̒ tingongoa lo uluu̒lio ode delomo duhu boito wau mopo molotia̒ao̒ poo̒opitu totalu lopodehu ulopo walahe Huwali Leidaa̒ Mantali. 7Ngotayadu monto duhu boito musi pomaideo̒ to tutuu-ngeyaalo totimii̒du tutulo mesba lodupa umoonu todelomo Kema, wau lebelio musi pomuhuta mao̒ towumbato mesba lobake yilalango uwoluo totalu huhebu lo Kema. 8Ti iimamu musi mohama mao̒ ngoa̒amila tabo losapi ulai̒ boito, deu̒yito-yito tabo u momolu tuango ombongio, 9oile wolo tabolio wau wimbihu u mopiohe daa̒ monto wantohio. 10Ngoa̒amila boito musi lalangolio toitaato mesba lobake yilalango debo odelo tobake lo polodame. 11Bo tapu losapi boito, walitio, lunggongio, oa̒atio, lebelio lotuango ombongio, leituwoto toniyaalo, 12oditolio ngoa̒amilalo mao̒ ngopohia wimbihu umaa pilopowiwi, musi deloo mota ode bulemengo Kema. Mota teto sapi boito musi lalangolo toitaato ayu podiio̒ totambati polapilalo wahu, deu̒yito-yito tambati u pilohetu mao̒ woleeto.
13Wonu bolo tao̒dusa boito ngoilanggubu umati lo Isirai̒lu, sababu diila sangaja lolambanga tala tuwau palenta lo Eeya, 14yi hua̒a lapatio mao̒ dusa boito mailotaawa, umati boito musi modelo mota sapi ulai̒ buboto tuwau ode talu Kema lo Eeya. Binatangi boito musi podewolo duo̒lo bake pongambunguala dusa. 15Mongo tau̒wa lobangusa musi mopodutu mao̒ uluu̒ limongolio toitaato lunggongo binatangi boito, lapatao̒ mongolotao̒ totambati boito. 16Ti Iimamu Daa̒ musi modelo mao̒ ngotayade duhu lo binatangi boito tumuwoto ode delomo Kema. 17Mota teto tio musi mopolomo mao̒ lo tiongongoa lo uluu̒lio ode delomo duhu boito lapatao̒ mopo molotia̒ao̒ poo̒opitu totalu lopodehu ulopo walahe Huwali Leidaa̒ Mantali. 18Ngotayadio poli musi pomaide mao̒ to tutuu-ngeyaalo totimii̒du tutulo mesba lodupa todelomo Kema, wau lebelio musi pomuhuta mao̒ to wumbato mesba tambati lobake yilalango u woluo totalu huhebu lo Kema. 19Ngoa̒amila tabo lo binatangi boito musi hamaalo lapatao̒ lalangolo tomesba. 20Dudelolio debo odelo todewo sapi ulai̒ duo̒lo bake pongambungualo dusa. Odieelo mola pohuli li Iimamu Daa̒ mopodewo mao̒ bake duo̒lo duduu-sawaalo lo umati, yi duduu-sawaalo boito maa ambunguo lo Eeya. 21Lapatao̒ sapi ulai̒ boito musi deloolo ode bulemengio, wau lalangolo to bulemengo Kema, debo odelo todewo sapi ulai̒ duo̒lo bake pongambungualo dusa li Iimamu Daa̒ boito lohihilao. Odi-odieelo mola pohuli lo mopodewo bake pongambungualo dusa lo umati.
22Wonu bolo tao̒dusa boito ngotaalio lotaa okawasa sababu diila sangaja lolambanga tala tuwau palenta lo Eeya, 23yi hua̒a lapatio mao̒ tio mongalati mai, tio musi mopobake mao̒ batade ulai̒ tuwau udiila o tailolio duo̒lo pongambungualo dusalio. 24Tio musi mopodutu mao̒ uluu̒lio toitaato lunggongo binatangi boito, lapatao̒ mongolotao̒ to ambahu tilayo lomesba, tambati pongolotalo binatangi duo̒lo bake yilalango. 25Ti iimamu musi mopolomo mao̒ tiongongoa lo uluu̒lio ode delomo duhu lobinatangi boito lapatao̒ mopo maideo̒ to tutuu-ngeyaalo totimii̒du tutulo mesba wau mopo muhutao̒ labitio ode wumbato mesba. 26Lapatao̒ ngoa̒amilalo tabo lobinatangi boito musi lalangolo toitaato mesba, debo odelo tobake lo polodame. Odi-odieelo mola pohuli li iimamu mopodewo mao̒ lobake duo̒lo ngotaalio lotao̒ o kawasa, yi tau boito maa ambunguo lo Eeya.
27Wonu bolo ngotaalio lo ulipu biasa mohutu dusa sababu diila sangaja molambanga tala tuwau palenta lo Eeya, 28yi hua̒a lapatio mao̒ tio mongalati mai, tio musi mopobake mao̒ batade bilango udiila otailolio. 29Tio musi mopodutu mao̒ uluu̒lio toitaato lunggongo binatangi boito, lapatao̒ mongolotao̒ to ambahu tilayo lomesba tambati hepo ngolotalo binatangi duo̒lo bake yilalango. 30Ti iimamu musi mopolomo mao̒ tingongoa lo uluu̒lio ode delomo duhu lobinatangi boito, lapatao̒ mopo maideo̒ to tutuu-ngeyaalo totimii̒du tutulo mesba wau mopo muhutao̒ labitio towumbato mesba. 31Ngoa̒amila tabo lo binatangi boito musi hamaalo debo odelo tobake lo polodame. Tabo boito musi lalanga mao̒ li iimamu toitaato mesba, alihu boolio moo̒sanangi hilaa lo Eeya. Odi-odieelo mola pohuli li iimamu mopodewo mao̒ lobake duo̒lo dusa lo ulipu biasa, yi tau boito maa ambunguo lo Eeya.
32Wonu bolo ngotaalio mopodewo mao̒ himba tuwau duo̒lo pongambungualo dusalio, himba boito musi bilango wau diila otailolio. 33Tio musi mopodutu mao̒ uluu̒lio toitaato lunggongo binatangi boito, lapatao̒ mongolotao̒ to ambahu tilayo lo mesba, tambati hepo ngolotalo binatangi duo̒lo bake yilalango. 34Ti iimamu musi mopolomo mao̒ tingongoa lo uluu̒lio ode delomo duhu lobinatangi boito, lapatao̒ mopo maideo̒ to tutuu-ngeyaalo to timii̒du tutulo mesba, wau mopo muhutao̒ labitio towumbato mesba. 35Lapatao̒ ngoa̒amila tabo lo binatangi boito musi hamaalo debo odelo tobake lo polodame. Tabo boito musi lalangolo toitaato mesba, pee̒-pee̒enta wolo bake lou̒ aalo upilodewo ode Eeya. Odi-odieelo mola pohuli li iimamu mopodewo lobake duo̒lo dusa lotau boito, yi tio maa ambunguo lo Eeya.
Currently Selected:
IMAAMATI 4: LAIGOR
Highlight
Copy
Compare
Share
Want to have your highlights saved across all your devices? Sign up or sign in
