IMAAMATI 19
19
Butoo̒ omantali ua̒adili
1 Eeya lopoa̒hu olei Musa 2lopo tunggulao̒ ode bangusa lo Isirai̒lu palenta botie, “Mamusi timongoli mantali, sababu Wau̒ Eeya Allahu Taa̒ala limongoli yito mantali. 3Timii̒du tau musi mohulumati oliyamo wau oliilolio wau mopolame mao̒ dulahu Saabati debo odelo upilo malentaa-U̒ mai. Wau̒ Eeya Allahu Taa̒ala limongoli.
4Diila mao̒ polubo balaahala. Diila mao̒ pohutu bui̒ monto logamu wau molubo olio. Wau̒ Eeya Allahu Taa̒ala limongoli.
5Wonu timongoli mopodewo binatangi ode bake lo polodame, dudui̒ mao̒ wuwuu-uduwaalo uilohi-U̒ mai, alihu bake boito tolimoo-U̒. 6Tapulio musi tamelolo todulahee binatangi boito olotolo meaalo loombulio mola. Tapu udonggo olabita todulahee u otolulio musi pobuwolo tunggula maahu, 7sababu tapu boito haramu. Wonu tapu boito debo tamelolo, bake boito diila tolimoo-U̒. 8Titaalo tita tamo lamela tapu boito ototala sababu diila momaduli wolo u pilopohetu mao̒ ola-U̒. Tau boito diilalo anggapuolo pongawaa̒ lo umati-U̒.
9Wonu timongoli mongotolo, diila mao̒ otolaa pale ulobutu mai tobiihio lo halabolumu, wau diila mao̒ pohualinga mota mohimoa̒a pale u ilolabita lapatao̒ ilotolo. 10Diila mao̒ pohualinga ode ilengi lo anggurumu mota mohimoa̒a huhuu-ngowaalo angguru u meitolaa lapatao̒ timongoli bohulo molipu mao̒. Wau olo huhuu-ngolio umalo duduulahu diila mao̒ hamaawa limongoli. Polulia mao̒ uito ode taa mosikini wau tau deli. Wau̒ Eeya Allahu Taa̒ala limongoli.
11Diila mao̒ potao̒, mongaakali meaalo mohimbulo. 12Diila mao̒ podanti domi tanggulu-U̒ wonu timongoli diila omakusudu mopoo̒polu mao̒ danti boito, sababu woleeto timongoli mohina tanggulu-U̒. Wau̒ Eeya Allahu Taa̒ala limongoli. 13Diila mao̒ pohama untungi daa̒ ode timongotamu meaalo molambata barangilio. Wuupa lo ngotaalio tahemo kalaja to olemu diila mao̒ otonga limongoli penu boli bo ngohui. 14Diila mao̒ polaa̒anati taa u talodu wau diila mao̒ podutu botu u otedua̒ totalu lotaa pitoo̒. Mamusi timongoli mohulumati wau moohe to Olau̒, sababu Wau̒ Eeya Allahu Taa̒ala limongoli.
15Timongoli musi motulidu hilao wonu momutoo̒; diila mao̒ potiwambao̒ totaa mosikini wau diila mao̒ oohe totaa kaya. 16Diila mao̒ popoloo̒po pitana towolota lotau-tauwalo ngobangusamu, alihu timongoli diila moo̒sababu opopate lo timongotamu. Wau̒ Eeya Allahu Taa̒ala limongoli.
17Diila poniyati penu boli olita. Pobelesia mao̒ polohihede huhama penu boli wolita, alihu timongoli diila odusa sababu taawewo. 18Diila mao̒ pomalasi niyati wau diila mao̒ polonuo̒ totaa wewo, bo tolia̒nga mao̒ timongotamu debo odelo timongoli motolia̒nga batanga limongoli lohihilao. Wau̒lo Eeya.
19Dungohi mao̒ totoonulalo palentaa-U̒. Diila mao̒ popoohiyala bibiahe u hihiihede pangelio. Diila mao̒ pomulowa bili dulo dalaala tohuta ngopita. Diila mao̒ pomakea pakeyangi u hiliyolo monto pitolo dulo dalaala.
20Wonu bolo talolai̒ ngota modanti mamo potali watolio taabua ode talolai̒ wewo u pohutulio dile tohuni, wau taa u mohuto motali mao̒ wato boito diipo lomayali olio, lapatao̒ malo uulauwa ubohulio maa lou̒ulauwa wolo wato boito, yi timongolio duduulota musi hukuu-maniyolo, bo diila mowali hukuu-maniyola mate, sababu penu boli woloolo mola olo taabua boito donggo watolio. 21Talolai̒ boito musi modelo mao̒ himba ulai̒ tuwau ode talu huhebu lo Kema-U̒ duo̒lo bake poluloo̒ uiluhi. 22Ti iimamu musi mopobake mao̒ himba boito todelomo upacala pomantaliyalo, alihu dusa lotau boito ambunguolo. Yi Wau̒, Allahu Taa̒ala mamo ngambungu mao̒ olio.
23Wonu bolo timongoli maa tilumuwota mola ode lipu lo Kanaa̒n wau mopomulo mao̒ hidala-dalaala bungo lo ayu momungoa mola teto, yi ngotilonggadu tolo taunu mola ubohulo hungolio musi anggapuo mao̒ limongoli haramu wau diila mowali tamelo limongoli. 24Todelomo taunu opatio ngoa̒amila hungolio musi podewolo u mopoi̒laalo oduo̒olo limongoli ode ola-U̒, Eeya. 25Todelomo taunu u olimolio bolo timongoli mowali molamelao̒ hungolio. Wonu timongoli mohutu mao̒ ngoa̒amila wuu̒du boito, bungo lo ayu u momomungoa limongoli boito mamomungo lebe dadaata mao̒ poli.
26Diila mao̒ polamela duhu. Diila mao̒ pomake ilimi mongisimu. 27Diila mao̒ huntinga huwoo̒ tobiihu lunggongumu meaalo monguluhe danggumu. 28Diila mao̒ tatoowa alipumu u mohutu tutuuotalo meaalo momali wawaau̒mu odelo tuoto limilimi totaa yilate. Wau̒lo Eeya.
29Diila mao̒ podupapawa daraajati lomongo walau̒mu taabua lou̒ mopowali olimongolio tasuuntali tokuili. Lou̒ mohutu u odito timongoli moponajisi lipumu, wau huhuu-tuwaalo udiila patuti mamo rajalela mota teto. 30Polamea mao̒ dulahu Saabati wau hurumatia mao̒ tambati upiloheetu u polubowalo ola-U̒. Wau̒lo Eeya.
31Diila mao̒ ponao̒ mei̒ naseehati tohulango tahemo wumbuta wolo roroo-huwaalo lotaa mailate. Wonu timongoli mohutu mao̒ uito timongoli mowali najisi. Wau̒lo Eeya Allahu Taa̒ala limongoli.
32Moomua mao̒ wau hulumatia mao̒ mongo panggola. Mamusi timongoli mohulumati wau moohe ola-U̒, sababu Wau̒lo Eeya.
33Diila mao̒ pohutu udiila mopiohu totaa deli tabilu-biluloa̒ tolipumu. 34Pohutua mao̒ timongolio debo odelo timongoli mopohutu mao̒ tau-tauwalo ngobangusa limongoli wau tolia̒ngi mao̒ timongolio debo odelo timongoli motolia̒ngo batanga limongoli lohihilao. Eelai mola deu̒ timongoli olo mapee̒enta tilumumulo odelo tau deli to Masiri. Wau̒lo Eeya Allahu Taa̒ala limongoli.
35Diila mao̒ pohimbulo totaa wewo lou̒ momake tuuu̒du, titimenga meealo takaarani upaluti. 36Pomakea mao̒ meeteri, titimenga meaalo takaarani u otutu. Wau̒lo Eeya Allahu Taa̒ala limongoli, wau Wau̒ malodelo olimongoli yilumualao̒ lonto Masiri. 37Dungohi mao̒ ngoa̒amila butoo̒ wau palentaa-U̒. Wau̒lo Eeya.”
Currently Selected:
IMAAMATI 19: LAIGOR
Highlight
Copy
Compare
Share
Want to have your highlights saved across all your devices? Sign up or sign in
