IMAAMATI 18
18
Polou̒ulauwa udini-dini
1 Eeya lopoa̒hu olei Musa 2mopo tunggulao̒ ode bangusa lo Isirai̒lu palenta botie, “Wau̒ Eeya Allahu Taa̒ala limongoli. 3Diila mao̒ podudua̒ huhutu taulo Masiri, tambati u mapee̒enta pilo tibiluloa̒ limongoli, meaalo taulo Kanaa̒n, ode utoonu Wau̒ botia modelo mota olimongoli. 4Dungohe mao̒ butoo̒o-U̒ wau pohutua mao̒ wolo upilo malentaa-U̒ mai. Wau̒ Eeya Allahu Taa̒alamu. 5Dungohe mao̒ wuwuu-uduwaalo wau butoo̒o-U̒ uwohi-U̒ mai olemu. Wonu timongoli mohutu mao̒ odito, tutumulumu moa̒ahu. Wau̒ Eeya.”
6 Eeya longohi mai wuwuu-uduwaalo botie. Diila mao̒ pou̒ulauwa wolo tala ngota lo ilaatamu. 7Diila mao̒ pou̒ulauwa woliilamu, dile liyamamu, sababu tio haku liyamamu. 8Diila mao̒ pohina oliyamamu lou̒ mou̒ulauwa wolo tala ngota lodilelio uwewo. 9Diila mao̒ pou̒ulauwa wolo wutatumu taabua meaalo wutatumu watoo̒, mopio tapilo udaa̒ ngobele wolemu meaalo tapilo udaa̒ tobele wewo. 10Diila mao̒ pou̒ulauwa wolo wombumu; uito mamoo̒olito batangamu lohihilao. 11Diila mao̒ pou̒ulauwa wolo wutatumu taabua u ngotiyamo wewo tiilo meaalo ngotiilo wewo tiyamo, sababu tio wutatumu olo. 12-13Diila mao̒ pou̒ulauwa wolo titantemu, mopio tio wutato liyamamu meaalo wutato liilaamu. 14Diila mao̒ pou̒ulauwa wolo dile lo pou̒wamamu, sababu tio pou̒laamu olo. 15Diila mao̒ pou̒ulauwa wolo walao̒ moluhengumu 16meaalo wolo dile lo tahulangumu. 17Diila mao̒ pou̒ulauwa wolo walao̒ meaalo wombu lotaabua ngota tamaa pee̒enta pilodilemu. Tanu timongolio waitumu, wau uito huhutu udiila patuti. 18Diila podiilea wolo wutato dilemu ngotilonggadu dilemu lohihilao donggo tumu-tumulo.
19Diila pou̒ulauwa wolo taabua ngota ngotilinggadu tio donggo dula-dulahu, sababu tio todelomo owowoluwoa unajisi. 20Diila mao̒ pou̒ulauwa wolo dile lotaa wewo; huhutu boito mopowali mao̒ olemu najisi. 21Diila mao̒ tala ngota lowalau̒mu u pobakeelo todelomo pomujaalo Molokh, sababu huhutu boito mohina tanggulo Allahu Taa̒ala Eeyaamu. 22Talolai̒ diila mowali mou̒ulauwa wolo talolai̒; Allahu Taa̒ala molonuo̒ huhutu boito. 23Talolai̒ meaambo taabua, sama-samaata diila mowali mou̒ulauwa wolo binatangi; huhutu moleeto boito mopo najisi olimongoli.
24Diila mao̒ ponajisia batangamu wolo huhuu-tuwaalo boito, sababu wolo dudelo boito babaa-ngusawalo tahi biluloa̒awa to Kanaa̒n tou̒ diipo timongoli, malo ponajisi mao̒ batanga limongolio. Sababu uito timongolio pilopolahi lo Eeya, alihu timongoli mowali motibiluloa̒ tolipu boito. 25-27Timongolio malohutu ngoa̒amila huhutu umoo̒jijio̒ boito, tilinggula huta limongolio lowali najisi. Yi Eeya lohukuumani olimongolio wau diila lopoluasi olimongolio lotibiluloa̒ mola teto. Bo timongoli sama-samaata diila mao̒ pohutu huhuu-tuwaalo boito. Timongoli ngoa̒amila, taulo Isirai̒lu wau tau deli tadebo pee̒-pee̒enta woli mongoli, musi modungoheo̒ wuu̒du wau palenta lo Eeya, 28alihu timongoli diila mao̒ hukuu-maniyo lo EEYA wau polahio-Lio monto huta boito debo odelo tau-tauwalo tahi totaawa to Eeya, tabilu-biluloa̒ mola teto tou̒ diipo timongoli. 29Otaawa limongoli deu̒ titaalo tita tamohutu mao̒ huhutu umoo̒jijio̒ boito diilalo anggapuolo pongawaa̒ umati lo Allahu Taa̒ala.
30Yi Eeya lotahuda mai, “Dungohi mao̒ wuwuu-uduwaalo uilohi-U̒ mai wau diila mao̒ podudua̒a huhutu lotau-tauwalo tahi biluloa̒awa tohuta lo Kanaa̒n tou̒ diipo timongoli. Diila mao̒ ponajisia batangamu lohihilao wolo mohutu huhuu-tuwaalo boito. Wau̒ Eeya Allahu Taa̒alamu.”
Currently Selected:
IMAAMATI 18: LAIGOR
Highlight
Copy
Compare
Share
Want to have your highlights saved across all your devices? Sign up or sign in
