IMAAMATI 17
17
Wuu̒du pasali loduhu
1 Eeya lopoa̒hu mao̒ olei Musa 2mongohi wuwuu-uduwaalo botie odelei Haruna, mongo walai̒o wau ngoilanggubu bangusa lo Isirai̒lu. 3-4Wonu bolo ngotaalio lo Isirai̒lu mopodewo sapi, himba meaalo batade ode Eeya, binatangi boito musi olotolio totalu lohuhebu Kema lo Eeya. Wonu tio mongolotao̒ totambati uwewo, yi tio molambanga wuu̒du sababu moluatao̒ duhu. Tio diilalo anggapuolo pongawaa̒ umati lo Allahu Taa̒ala. 5Palenta boito milakusudu mao̒ alihu bangusa lo Isirai̒lu modelo mota ode Kema lo Eeya ngoa̒amila binatangi podewo u biasaalio heo̒loto limongolio to halabolu. Timongolio wajibu modelo mota dewo odeli iimamu totalu lohuhebu Kema lo Eeya wau mongolotao̒ mota teto ode bake lo polodame. 6Ti iimamu musi momuhutao̒ duhu lobinatangi boito totimii̒du mesba totalu lohuhebu Kema lo Eeya lapatao̒ molalango tabolio alihu boolio moo̒sanangi hilaa lo Eeya. 7Bangusa lo Isirai̒lu musi debo molotolo hilao to Eeya wau sama-samaata diila mowali mongolota binatangi to hahaa-laboluwalo ode dewo to lalaa-tiyaalo u moleeto. Wuu̒du boito musi dungohelo u ohiheo-hiheolo mao̒.
8Wonu bolo ngotaalio lo Isirai̒lu meaalo ngotaalio lotau deli tadebo bilu-biluloa̒ towolota taulo Isirai̒lu mopodewo bake yilalango meaalo bake wewo 9ode Eeya, yi tio musi mopodewo mao̒ totalu lohuhebu Kema lo Eeya. Wonu tio mopodewo totambati uwewo, yi tio diilalo anggapuolo pongawaa̒ umati lo Allahu Taa̒ala.
10Wonu ngotaalio lo Isirai̒lu meaambo ngotaalio lotau deli tadebo bilu-biluloa̒ towolota taulo Isirai̒lu molamela duhu, yi tio mahukuumanio lo Eeya wau diilalo anggapuolo pongawaa̒ umati-Lio. 11Timii̒du nyawa lo mahaluku woluo todelomo duhulio. Sababu uito Eeya lomalentai alihu ngoa̒amila duhu potoohulo odeitaato mesba alihu duduu-sawaalo umati lulutolo-Lio. Duhu yito nyawa, molulutao̒ dusa. 12Uitolo sababuulio bangusa lo Isirai̒lu meaalo tau deli tadebo bilu-biluloa̒ towolota limongolio dinidini molamela duhu.
13Wonu bolo ngotaalio lo Isirai̒lu meaalo ngotaalio lotau deli tadebo bilu-biluloa̒ towolota bangusa lo Isirai̒lu moheu̒pa bulungi meaalo binatangi wewo udiila haramu, tio musi mopolualao̒ duhu lo binatangi boito wau molambula wolo huta. 14Nyawa lotimii̒du mahaluku woluo todelomo duhulio, sababu uito Eeya modini bangusa lo Isirai̒lu molamela duhu. Timii̒du taa umohutu mao̒ huhutu udini-dini boito diilalo anggapuolo pongawaa̒ umati lo Allahu Taa̒ala.
15Timii̒du taulo Isirai̒lu meaalo tau deli tamo lamela tapu lo binatangi uilate lohilaalio meaalo yilate dilanggapo binatangi mongantau, musi momoboa̒a pakeyangilio lapatao̒ molihu wau mohima dilumutu dulahee tumolopaa mota, deu̒ito tio mowali belesi. 16Wonu tio diila mohutu mao̒ uito, yi tio musi momanta akiibatilio.
Currently Selected:
IMAAMATI 17: LAIGOR
Highlight
Copy
Compare
Share
Want to have your highlights saved across all your devices? Sign up or sign in
