IMAAMATI 16
16
Dulahu buka u pongambungualo dusa
1Lapatao̒ walae̒e Haruna duduulota yilate mao̒ tou̒ hemo podewo tulu udiila kilahandaki lo Eeya, Eeya lotahuda mai odelei Musa, 2tahudaa-Lio, “Potunggula mao̒ odelei Haruna wutatumu, deu̒ bo tou̒ wakutu utantu-tantu tio mowali tumuwotao̒ ode Huwali Leidaa̒ Laba Mantali ubilua̒ lopodehu, sababu teteetolo Wau̒ mamopo bilohei batanga-U̒ todelomo heengo toitaato tau̒bu lo Bulua Daantia. Wonu tei Haruna molambanga palenta boito, yi tio maamate. 3Bo wolo dudelo mopodewo mao̒ sapi ulai̒ buboto duo̒lo bake pongambungualo dusa wau himba ulai̒ buboto tuwau duo̒lo bake yilalango, tei Haruna mowali tumuwotao̒ ode Huwali Leidaa̒ Laba-labaalo mantali.”
4Wumbutio mola tei Haruna musi mopoo̒ tuotao̒ wuwuu-uduwalo botie. Tou̒ diipo tumuwotao̒ ode Huwali Leidaa̒ Laba-labaalo mantali tio musi molihupo lapatao̒ momake mao̒ pakeyangi li iimamu, deu̒yito-yito boo̒, talaala limbu-limbuo̒, biintolo wohuta wau sulubani, ngoa̒amilalo monto lineni.
5Lapatao̒ umati lo Isirai̒lu musi mohudu mao̒ odelei Haruna batade ulai̒ duluo duo̒lo bake pongambungualo dusa wau himba ulai̒ tuwau duo̒lo bake yilalango. 6Tei Haruna musi mopodewo sapi ulai̒ tuwau duo̒lo pongambungualo dusa ode batangalio lohihilao wau ngaalaa̒lio. 7Batade ulai̒ duluo monto umati lo Isirai̒lu musi deloolio mota ode talu lohuhebu Kema lo Eeya. 8Mota teto tio musi momahutao̒ undi wolo mopohuna botu duluo, u tuwau tuotaala “ode Eeya”, wau uwewo “ode Ajajel”. 9Batade u otulaota ode Eeya musi podewolo ode bake pongambungualo dusa. 10Batade u otulaota ode Ajajel musi potambatiyolo tumu-tumulo totalu lo Eeya lapatao̒ lamiyala ode huta udatahu ode Ajajel, alihu dusa bangusa lo Isirai̒lu lulutolo.
11Lapatao̒ tei Haruna mopodewo wau mongolotao̒ sapi ulai̒ ode bake pongambungualo dusa duo̒lo batangalio lohihilao wau duo̒lo ngaalaa̒lio, 12tio musi mohama mao̒ polutube monto mesba wau moluangao̒ polupolu wolo bohu lotulu wau dulo onggomo dupa moa̒aluti, lapatao̒ modelo mota ode Huwali Leidaa̒ Laba-labaalo mantali. 13Dupa boito musi pobuwolo totalu lo Bulua Daantia, dilumutu poloi̒o mohenggube tau̒bu Bulua boito wau tei Haruna diila mowali momiloheo̒, sababu wonu tio momiloheo̒, tio maamate. 14Lapatao̒ tei Haruna musi mohama mao̒ ngoi̒di duhu losapi, wau wolo tingongoa lo uluu̒lio mopo molotio̒ duhu boito towimbihu talu lotau̒bu Bulua Daantia wau poo̒opitu ode talu lo Bulua.
15Lapatao̒ uito tei Haruna musi mongolotao̒ batade ode bake pongambungualo dusa umati lo Isirai̒lu. Duhu lobatade boito musi deloolio mota ode Huwali Leidaa̒ Laba-labaalo mantali, lapatao̒ pomolotio̒olo towimbihu talu lotau̒bu Bulua Daantia wau ode talu lo Bulua, debo odelo umaa pilohutulio wolo duhu losapi ulai̒. 16Wolo dudelo boito tio mopomantali mao̒ Huwali Leidaa̒ Laba-labaalo mantali monto najisi bangusa lo Isirai̒lu wau monto totoonulalo dusa limongolio. Kema lo Eeya musi pomantaliyolo sababu woluo tohuungo Kema bangusa lo Isirai̒lu wau ilotuhata onajisi limongolio. 17Tumulalo mai tei Haruna tumuwotao̒ ode Huwali Leidaa̒ Laba-labaalo mantali u mohutu upacala pomantaliyalo dilumutu tio lumualao̒, penu boli ngota mao̒ diila mowali woluo todelomo Kema boito. Tou̒ lapato mohutu mao̒ upacara ode batangalio lohihilao, ode ngaalaa̒lio wau ode bangusa lo Isirai̒lu, 18tei Haruna musi lumualao̒ wau monao̒ mota ode mesba lobake yilalango mopo mantali mao̒ mesba boito. Tio musi mohama mao̒ duhu losapi ngoi̒di wau duhu lobatade, wau mopo maideo̒ to tutuu-ngeyaalo wau totimii̒du tutulo mesba. 19Wolo tingongoa lo uluu̒lio tio musi mopo molotio̒ duhu ngoi̒di boito poo̒opitu ode yitaato mesba. Wolo dudelo boito tio mopo mantali mao̒ mesba monto onajisi bangusa lo Isirai̒lu, alihu mowali mantali.
Batade dihe
20Lapatao̒ mohutu mao̒ upacala pomantaliyalo Huwali Leidaa̒ Laba-labaalo mantali wau to wiwii-mbihuwaalo uwewo Kema lo Eeya wau mesbalio, tei Haruna musi mopodewo ode Eeya batade tumu-tumulo u tilulaotao̒ ode Ajajel. 21Tio musi mopodutu uluu̒lio duuduluo toitaato lunggongo batade boito sambela mongaku mao̒ ngoa̒amila totala, dusa wau huhutu u yilambanga bangusa lo Isirai̒lu. Lou̒ odito ngoa̒amila totala bangusa lo Isirai̒lu yilimbatio odeitaato lunggongo batade boito. Lapatao̒ ngotaalio lo tatilugasia mao̒ musi molami batade boito ode huta datahu wau luasi udelita. 22Batade boito modelo mota ngoa̒amila dusa bangusa lo Isirai̒lu ode madala udiila opilomulo sama-samaata wau batade boito musi huliyalo tohuta udatahu wau luasi udelita.
23Lapatao̒ uito tei Haruna musi tumuwotao̒ ode delomo Kema, mohinggi mao̒ pakeyangi lo iimamu u pilomakelio tou̒ tilumuwota ode Huwali Leidaa̒ Laba-labaalo mantali, wau mololaa mao̒ pakeyangi boito mola teto. 24Lapatao̒ tio musi molihu totambati tuwau u pilopohetu wau momake mao̒ pakeyangilio lohihilao. Lapatao̒ tio musi lumualao̒ wau mopodewo bake yilalango ode pongambungualo dusalio lohihilao wau dusa bangusa lo Isirai̒lu. 25Tabo lo binatangi ode pongambungualo dusa musi lalangolo tomesba.
26Taa umomuli mao̒ batade ode Ajajel tohuta udatahu wau luasi udelita musi momoboa̒a pakeyangilio wau molihu tou̒ diipo mohualinga mota ode kema. 27Sapi ulai̒ wau batade ode pongambungualo dusa, u duhulio deloolo tumuwotao̒ ode Huwali Leidaa̒ Laba-labaalo mantali duo̒lo pongambungualo dusa, musi deloolo ode bulemengo Kema wau lalangolo. Walito, tapu wau tuango ombongo lo oluo binatangi boito musi lalangolo ngoa̒amilalo. 28Taa u molalangao̒ musi momoboa̒a pakeyangilio wau molihu tou̒ diipo mohualinga mota ode kema.
Dudelo mopolame dulahu pongambungualo dusa
29-31Wuwuu-uduwaalo botie musi dungohelo u ohiheo-hiheolo mao̒. Todulahee opululio hulalo opitulio, taulo Isirai̒lu wau tau deli tahi tatapua towolota limongoli musi mopuasa wau diniyolo mokalaja, sababu todulahee botie dulahee umantali daa̒. Todulahee boito musi pohutuwola upacala u mopo mantali mao̒ bangusa lo Isirai̒lu monto totoonulalo dusa limongolio alihu timongolio belesi. 32Ti Iimamu Daa̒, tamaa pilopo mantali wau pilohetu ode Allahu Taa̒ala u mobuulota woliyamolio, musi mohutu mao̒ upacala pomantaliyalo boito. Tio musi momake mao̒ pakeyangi poheetu, 33lapatao̒ mohutu upacala pomantaliyalo Huwali Leidaa̒ Laba-labaalo mantali, to wiwii-mbihuwalo wewo monto Kema lo Eeya, mesba, mongo iimamu wau ngilanggubu bangusa lo Isirai̒lu. 34Upacala boito musi pohutuwolo pee̒enta ngotaunu duo̒lo pomantaliyalo bangusa lo Isirai̒lu monto totoonulalo dusa limongolio. Ui-uitolo wuwuu-uduwalo umusi dungohelo u ohiheo-hiheolo mao̒.
Tei Musa lohutu mao̒ debo odelo upilo malentao̒ lo Eeya olio.
Currently Selected:
IMAAMATI 16: LAIGOR
Highlight
Copy
Compare
Share
Want to have your highlights saved across all your devices? Sign up or sign in
