IMAAMATI 15
15
Unajisi to manusia
1 Eeya longohi odelei Musa wolei Haruna wuwuu-uduwaalo botie 2ode bangusa lo Isirai̒lu. Wonu bolo talolai̒ ngota hepoluala mai loheeheto sababu ongongota lotilalua, yi heeheto boito najisi, 3mopio uito u lumualai eleponu umei ootongo. 4Tambati u pilotihuloa̒ meaalo u pilotuluhe lotau boito mowali najisi. 5-8Titaalo tita tamoo dedetao̒ totaa hepoluala loheeheto meaalo tambati pilotuluhelio, meaalo motihuloo̒ totambati ubakasi pilo tihuloa̒lio, meaalo upilonula loiyohe lotau boito, musi momoboa̒a pakeyangilio wau molihu, wau tio najisi dilumutu dulahu tumolopaa mota. 9Polana meaalo boli wolo wambai̒o upilo tihulaa̒a lotaa u hepoluala loheeheto mowali najisi. 10Titaalo tita tamoo̒ dedetao̒ hitua-tuawua ubakasi pilo tihuloa̒a lotau boito, mowali najisi dilumutu dulahu tumolopaa mota. Timii̒du taa u momintaa̒a balangi boito musi momoboa̒a pakeyangilio wau molihu, wau tio najisi dilumutu dulahu tumolopaa mota. 11Wonu bolo taa u hepoluala loheeheto diila mongulo mao̒ uluu̒lio meimulo moo̒dedetao̒ tau wewo, yi taa u ilodedetalio boito musi momoboa̒a pakeyangilio wau molihu, wau tio najisi dilumutu dulahu tumolopaa mota. 12Ulongo huta u ilodedeta lotau boito musi poo̒olo wau pakaakasi u ilodihumalio musi wulowalo.
13Wonu bolo tau boito moluli, tio musi mohima pitu hui mola poli. Lapatao̒ uito tio musi momuboa̒a pakeyangilio wau molihu tobutu lotaluhu, yi tio malo belesilo mola. 14Todulahee u owalulio tio musi modelo bulungi poombo muda duluo meaalo bulungi tarakuku muda ode talu lohuhebu Kema lo Eeya lapatao̒ mohudu mao̒ odeli iimamu. 15Ti iimamu musi mopodewo bulungi tuwau duo̒lo pongambungualo dusa, wau u tuwau poli duo̒lo bake yilalango. Lou̒ odito ti iimamu mopowoluo mao̒ upacala pomantaliyalo tau boito totalu lo Eeya.
16Wonu bolo talolai̒ ngota poluala lomani, tio musi molihu bo debo najisi dilumutu dulahu tumolopaa mota. 17Upango wolo wambai̒o monto kaingi meaalo walito u otuhata lomani boito musi wulowalo; upango boito najisi diumutu dulahu tumolopaa mota. 18Lapatao̒ mou̒ulauwa mopio talolai̒ meaalo taabua musi molihu, bo timongolio debo najisi dilumutu dulahu tumolopaa mota.
19Taabua ngota tadonggo dula-dulahu, najisi ngotilonggadu pitu hui mola. Titaalo tita tamoo̒ dedetao̒ olio mowali najisi dilumutu dulahu tumolopaa mota. 20Boli wolo wambai̒o ilohuloa̒a meaalo u pilo tuluhe lotaabua tou̒ tio donggo dula-dulahu mowali najisi. 21-23Titaalo tita tamoo̒ dedeto tambati ubakasi pilo tuluhe meaalo pilo tihuloa̒a lotaabua udonggo dula-dulahu, musi momoboa̒a pakeyangilio wau molihu, wau tio najisi dilumutu dulahu tumolopaa mota. 24Wonu bolo talolai̒ ngota mou̒ulauwa wolo taabua udonggo dula-dulahu, talolai̒ boito olo mowali najisi ngotilonggadu pitu hui mola, wau timii̒du tambati lopotuluhe upilo tuluhelio olo mowali najisi.
25Wonu bolo taabua ngota moo̒toduo pilobaa̒ata loduhu ngotilonggadu dengolo hui mola tou̒ diipo meidungga mai dulahio, meaalo duhulio diila lopobunto-bunto tou̒ malo palutao̒ hulalio, tio najisi ngotilonggadu hepobaa̒ata loduhu boito, debo odelo tou̒ tio donggo dula-dulahu. 26Tambati upilo tuluhe meaalo upilo tihuloa̒lio ngotilonggadu tou̒ boito mowali najisi. 27Titaalo tita tamoo̒ dedetao̒ tambati boito olo mowali najisi. Tio musi momoboa̒a pakeyangilio wau molihu, wau tio najisi dilumutu dulahu tumolopaa mota. 28Lapatao̒ tumonggodu pobaa̒ata loduhu boito, taabua boito musi mohima ngotilonggadu pitu hui mola poli. Bolo lapatao̒ uito tio belesi. 29Todulahee u owalulio tio musi modelo bulungi poombo muda duluo meaalo tarakuku muda odeli iimamu totalu lohuhebu Kema lo Eeya. 30Bulungi u tuwau musi podewoolo duo̒lo bake pongambungualo dusa, wau u tuwau poli duo̒lo bake yilalango. Wolo dudelo boito ti iimamu mopowoluo mao̒ upacala pomantaliyalo taabua boito totalu lo Eeya.
31 Eeya lopoa̒hu olei Musa mopoe̒ela mao̒ bangusa lo Isirai̒lu alihu mopoo tuotao̒ omolua timongolio najisi wau omolua diila, alihu timongolio diila mopo najisi Kema lo Eeya uwoluo tohuungo kema limongolio. Wonu timongolio mopo najisi mao̒ Kema boito timongolio maamate.
32Odi-odieelo mola wuwuu-uduwaalo pasali lo talolai̒ tahe poluala loheeheto sababu ngongoto lotilalua meaalo hepoluala lomani, 33pasali lotaabua tadonggo dula-dulahu, wau pasali lo talolai̒ u mou̒ulauwa wolo taabua tadonggo dula-dulahu.
Currently Selected:
IMAAMATI 15: LAIGOR
Highlight
Copy
Compare
Share
Want to have your highlights saved across all your devices? Sign up or sign in
