PILOTIMUA̒TA 38
38
Mohutu mesba duo̒lo bake yilalango
(Pilot. 27:1-8)
1Tei Bejaleel lohama mao̒ ayu aakasia, lapatao̒ pilohutulio mesba duo̒lo bake yilaalango. Mesba boito moodelilio hitutu-tutuwa, hayai̒o wau tanggalio tinggai dulo koma dulo meeteri, wau langgatio tuwau koma tolo meeteri. 2Totimii̒du tutu toitaatio pilohutua tunge umowali tuwau wolo mesba boito. Ngoa̒amilalo yilolude wolo polunggu. 3Pilohutulio olo uu̒u-longawalo, sikopu, mamaa-nggowaalo, tutuu-nggoo̒walo wau tambati lotulu. Ngoa̒amila powimumuto boito pilohutu polunggu. 4Pilohutulio kawa hilalamo lonto polunggu u pilolibudio wimbihu walungo lomesba, langgatio bo ngoputu lonto langgato mesba. 5Lapatao̒ pilohutulio mao̒ pateda mohelu wopato wolo ayu pomulihelo to opato tutu lowalungio. 6Ayu pomulihelo boito pilohutulio lonto ayu aakasia u yilolude wolo polunggu. 7Lapatao̒ ayu pomulihelo mohelu duluo boito pilo tuwotio ode delomo papaa-tedawaalo to oluo biihu mesba boito. Mesba boito pilohutulio lonto dupi wau wimbihu delomio ohuwango.
Mohutu baki polunggu
(Pilot. 30:18)
8Tei Bejaleel lohutu mao̒ baki polunggu wolo wumbatio polunggu. Polunggu boito lonto yiyii-nggiluwalo haku lo mongobua tahipo hintawa tohuhebu Kema lo Eeya.
Palepelo Kema lo Eeya
(Pilot. 27:9-19)
9Tei Bejaleel lomala mao̒ palepelo Kema lo Eeya wolo layahu lonto kaingi lenani moa̒aluti. Towimbihu huliaalio, hayai̒o wopato pulaa pato meeteri, 10tilahangia lo wolihi polunggu dulopulu, tinggai todelomo wumbato polunggu, wolo kaito wau abitio lonto talaa̒. 11To ambahu tilayo pilohutu debo odelo odito olo. 12To ambahu otolopa pilohulialio layahu ngohayao̒ dulopulaa dulo meeteri, wolo wolihi mopulu wau mopulu wumbato; kaito wau pohumbutio pilohutu lonto talaa̒. 13To ambahu tiimuru, uwoluo huhebulio tanggalo layahio olo dulopulaa dulo meeteri, 14-15To oloihi wau olowala lohuhebu boito pilo hulialio layahu hayai̒o tinggai wolomo koma wolomo meeteri, wolo wolihi totolu wau wumbato totolu. 16Ngoa̒amila layahu topalito palepelo boito pilohutu lonto kaingi lineni moa̒aluti. 17Wumbato wowoo-lihilio pilohutu monto polunggu, hiambola kaito, wumbutio wau bolitutuo̒ wolihilio pilohutu monto talaa̒. Ngoa̒amila wolihi totili lo palepelo boito pilopo wumbuto tuwau ode uwewo wolo abito talaa̒. 18Podehu lohuhebu hulubangi lo palepelo boito pilohutu monto lineni moa̒aluti u hiliyalo wolo lambuto himba wahuente, lailowumu wau meela wau piloromu wolo karawo. Hayai̒o tio lomeeteri wau langgatio dulo meeteri, tuutuuwauwa wolo layahu lo palepelo. 19Kaingi lohuhebu boito tilahangia lo wolihi wopato wolo wumbato polunggu wopato. Ngoa̒amila kaito, tau̒bu balitutui̒o wau abitio pilohutu monto talaa̒, 20bo papaa-too̒walo duo̒lo Kema wau duo̒lo balaalio pilohutu lonto polunggu.
Logamu upilomake todelomo Kema lo Eeya
21Uti-utieelo daputali lo logamu upilomake todelomo Kema lo Eeya, tambati lobotu dulopita wolo Opulu Palenta lo Allahu Taa̒ala boito tilahu. Daputali boito pilohutu topalenta lei Musa wau siluusungi lotau-tauwalo Lewi tahipo kalajawa to tau̒wa lei Itamar, walai̒ Iimamu Haruna.
22Tei Bejaleel walae̒e Uri, wombu lei Hur lonto suku Yehuda, lohutu mao̒ totoonulalo upilo malenta lo Eeya. 23Tamoomantua olio tei Aholiab walae̒e Ahisamakh lonto suku Dan, deu̒yito-yito ngotaalio lo tamoo-ngukilia, tamoo-lanjanawa wau tamoo-hiyolo kaingi lineni moa̒aluti, wau lambuto himba wahue̒nte u moa̒aluti, lailuwumu wau meela.
24Hulawa u pilopodewo ode Eeya duo̒lo Kema Mantali ngoa̒amilalo ngojumula ngolihu lokilo, tonggadulo moduduo̒ titimenga upohu-pohutu to Kema lo Eeya. 25Talaa̒ uilotapu monto daputali jumulaa ulipu bangusa lo Isirai̒lu ngojumula tololihu wopato hetuto tolopulu lokilo tonggadulo moduduo̒ titimenga upohu-pohutu to Kema lo Eeya. 26Jumula boito tuutuuwauwa lou̒ wolo u pilomayali lo ngoa̒amila taa ulei daputali todelomo daputali jumulaa ulipu boito. Timii̒du tau momaayali mao̒ halaga u tilantulio, tonggadulo moduduo̒ titimenga upohu-pohutu. Todelomo daputali jumulaa ulipu boito leidaputali wolomo hetuto tololihu wau limo lohetuto limo lopulu mongo lolai̒ tao̒ umulu dulopulu lotaunu deitaato. 27Lonto talaa̒ boito tololihu wopato hetuto kilo pomake u mohutu ngohetuto wumbato wolihi Kema lo Eeya wau kaingi huhebulio. Timii̒du wumbatio buheetio tolo pulaa wopato kilo. 28Lonto labito talaa̒ boito ngojumula tolopulu lokilo, tei Bejaleel helohutu popoo-humbutowalo wau kakaai-towaalo ode wowoo-lihilio, wau tau̒bu balitutuo̒ lo wowoo-lihiyaalo boito. 29Porunggu u podewolo ode Eeya ngoa̒amilalo ngojumula dulolihu wopato hetuto dulo pulaa limo lokilo. 30Porunggu boito pomake u mohutu wumbato huhebu Kema lo Eeya, mesba wolo halamo kawa monto polunggu, ngoa̒amilalo powimumuto mesba, 31wumbato layahu topalito palepelo wau huhebu hulubangilio, ngoa̒amila patoo̒ Kema wau topalitio palepelo.
Currently Selected:
PILOTIMUA̒TA 38: LAIGOR
Highlight
Copy
Compare
Share
Want to have your highlights saved across all your devices? Sign up or sign in
