PILOTIMUA̒TA 37
37
Mohutu Bulua Daantia
(Pilot. 25:10-22)
1Tei Bejaleel lohutu mao̒ Bulua Daantia lonto ayu aakasia, hayai̒o ngohetuto mopulu losenti, tanggalo wau langgatio tinggai wolomo pulaa wolomo senti. 2Towimbihu delomio wau bulemengio yilolude wolo hulawa tutu, lapatao̒ pilohutua lesi hulawa topalitio. 3Lapatao̒ pilohutulio pateda hulawa mohelu wopato ode ayu pohuluhelio wau pilopo hulilio to opato oa̒ato tohe lobulua boito, duluo pateda to timii̒du biihio. 4Pilohutulio olo pohuluhelio monto ayu aakasia wau yiloludelio wolo hulawa, 5lapatao̒ ayu pomulihela boito pilopo tuwotio ode delomo pateda totimii̒du biihu Bulua boito. 6Lapatao̒ pilohutulio tau̒be tuwau hulawa tutu, hayai̒o ngohetuto mopulu losenti wau tanggalio wolomo pulaa wolomo senti. 7Pilohutulio olo malai̒kati opolipio̒ duluo monto hulawa dilupa, 8tuwau to motii̒du huudu lotau̒bu boito. Oluo malai̒kati opolipio̒ boito pilowali ngotayadu wolo tau̒bio, 9wau pilohutu tinggai tataalua wolo polipio̒ ubua̒-bua̒de lomeleu̒to tau̒bu bulua boito.
Mohutu meja ode roti pohinta
(Pilot. 25:23-30)
10Tei Bejaleel lohutu mao̒ meja lo ayu aakasia, u hayai̒o walu lopulaa walu losenti, tanggalio wopato pulaa pato senti wau langgatio wolomo pulaa wolomo senti. 11Meja boito yiloludelio wolo hulawa tutu wau topalitio pilopo hulialio lesi hulawa. 12Lapataa̒ tio lohutu mao̒ biihu meja ngotanggalo pitu wau ngoputu senti. Biihu boito dilutua lesi hulawa topalitio. 13Pilohutulio pateda wopato ode ayu pomulihelio wau pilopo hulialio to opato tutulo oa̒ato meja. 14Pateda u molahangi ayu pomulihelio pilopohuli totili biihu lomeja. 15Pomulihe boito pilohutu monto ayu aakasia wau yilolude hulawa. 16Tio olo helohutu pipii-nggeyaalo, mamaa-nggowaalo, gigii-ntiyaalo wau momoo-kuwaalo duo̒lo dewo taluhu lo angguru. Ngoa̒amila powimumuto meja boito pilohutulio monto hulawa tutu.
Pilohutua oa̒to tohe
(Pilot. 25:31-40)
17Tei Bejaleel lohutu oa̒ato tohe lonto hulawa tutu. Wumbato wau didihimalio pilohutu lonto hulawa dilupa. Bubuu-ngawaalo polomu, leituwoto toyungo wau kolopaalio pilopowali tuwau wolo didihimalio.
18To didihima boito pilohutua tango mohelu wolomo, tango mohelu totolu totimii̒du biihio. 19Totimii̒du tangolio pilohutua polomu debo odelo totolu bunga badamu wolo toyungo wau kolopaalio. 20To didihimalio pilohutua polomu debo odelo wopato bunga badamu wolo toyungo wau kolopaalio. 21To walungo lotimii̒du ngopange tango boito pilohutu ngotoyungo. 22Ngoilanggubu oa̒ato tohe boito wolo totoo-yungowalo wau tataa-ngolio pilohutu lonto ngopitango huhuu-lawaalo tutu dilupa. 23To oa̒ato tohe boito pilohutualio pitu tohe wolo pakaakasi u mopoo̒ belesi mao̒ tumbu lotohe wau bakilio lonto hulawa tutu. 24U mohutu mao̒ oa̒ato tohe wau powimumutio palaluwolo hulawa tutu tolo pulaa limo lokilo.
Mohutu mesba tambati pomobuwalo dupa
(Pilot. 30:1-5)
25Tei Bejaleel lohutu mao̒ lonto ayu aakasia mesba tuwau tambati pomobuwalo dupa. Mesba boito moodelilio hitutu-tutuwa; hayao̒ wau tanggalio tinggai wopato pulaa limo losenti wau langgatio tio lopulu losenti. To opato tutulio toitaatio pilohutua tunge lowali tuwau wolo mesba boito. 26Towimbihu yitaato opato biihu wau tutuu-ngelio yilolude wolo hulawa tutu wau topalitio pilohutua lesi hulawa. 27Pilohutulio olo pateda mohelu duluo towalungo lesi hulawa tobiihio duuduluo u molahangi ayu pomulihelo mesba boito. 28Pomulihe boito pilohutu lonto ayu aakasia wau yilolude wolo hulawa.
Mohutu winulo upacala wau dupa
(Pilot. 30:22-38)
29Tei Bejaleel olo lohutu mao̒ winulo upacala wau dupa tutu umoonu ilulau debo odelo wimulo moonu.
Currently Selected:
PILOTIMUA̒TA 37: LAIGOR
Highlight
Copy
Compare
Share
Want to have your highlights saved across all your devices? Sign up or sign in
