PILOTIMUA̒TA 39
39
Mohutu pakeyangi li iimamu
(Pilot. 28:1-14)
1Tei Bejaleel wau Aholiab lohutu pakeyangi potabia lo lambuto himba umoa̒aluti wahuente, lailowumu wau meela duo̒lo mongo iimamu tou̒ timongolio otuugasi to Huwali Leidaa̒ Mantali. Pakeyangi iimamu olei Haruna pilohutu debo odelo upilo malenta lo Eeya odelei Musa.
2Boo̒ li iimamu pilohutu monto kaingi lineni moa̒aluti, lambuto himba umoa̒aluti wahue̒nte, lailowumu wau meela, wau bola hulawa. 3Timongolio helodupa pipii-tangowalo hulawa ulapatao̒ ilo-ilolongo lowali bola molipa, lapatao̒ hiliyolo wolo kaingi lineni moa̒aluti wau lambuto himba umoa̒aluti wahue̒nte, lailowumu wau meela. 4Lapatao̒ uito pilohutu dulopata tali lo binggungo pongawade boo̒ li iimamu udiletu tobiihio. 5Biintolo wohuta hiliyolo moa̒aluti pilohutu lonto baahani u tuutuuwauwa wau podetumolo to boo̒ li iimamu boito tunggula mowali ngotayadu debo odelo upilo malenta lo Eeya odelei Musa. 6Timongolio lodumbatao̒ botu dalima lapatao̒ lopohuli mao̒ todelomo lesi hulawa. Wolo ahali daa̒ timongolio longuukili mao̒ tataa-nggulaalo walae̒e Yako mopulaa duulota to boboo-tuwaalo boito. 7Lapatao̒ boboo-tuwaalo boito pohuliyolo totali lo binggungo boo̒ li iimamu odelo tuoto mamo poe̒ela to mopulaa duluo suku lo Isiraai̒lu, debo odelo upilo malenta lo Eeya odelei Musa.
Mohutu tau̒bu duhelo
(Pilot. 28:15-30)
8Tei Bejaleel wau Aholiab lohutu tau̒bu duhelo lobaahani u tuutuuwauwa wolo boo̒ li iimamu, wau kilaraolio olo tuutuuwauwa. 9Moodeliilio hitutu-tutuwa uilupilo duluo, tanggalio wau hayai̒o tinggai dulo pulaa dulo senti. 10To tau̒bu duhelo boito pilasia limongolio botu poliyoto wopato baalisi. To baalisi bohulio botu dalima, topasi wau baiduri sepa. 11To baalisi oluolio botu poliyoto moidu ohalaga daa̒, botu nilamu wau iintani. 12To baalisi otolulio botu lajuardi, akik wau botu kocuubungi. 13To baalisi opatio botu pirus, yakut, wau ratna cempaka. Opulaa duluo poliyoto boito ilawadu wolo hulawa. 14To timii̒du poliyoto iluukili tanggulo ngotaalio lowalae̒e Yako mopulaa duulota odelo tuoto mamo poe̒ela susuu-kuwaalo Isirai̒lu. 15Lapatao̒ pohutuwolo mohelu duluo lante hulawa tutu u tulaotolo odelo tali. 16Pohutuola olo duluo pateda hulawa u pohuliola toitaato huudu duuduluo lotau̒bu duhelo boito. 17Lapatao̒ lante hulawa mohelu duluo boito potuotolo ode delomo papaa-tedawaalo boito, 18wau oluo huudu wewolio ilawadu to oluo lesi, tunggula tau̒bu duhelo boito mowali powumbutolo wolo tali lo binggungo wimbihu talu loboo̒ li iimamu. 19Lapatao̒ pohutuwolo pateda hulawa mohelu duluo poli u pohuliyolo to tau̒bu duhelo boito, tohuudu walungo wimbihu delomio u otuhata loboo̒ li iimamu 20Lapatao̒ uito pohutuwo patedaa mohelu duluo u pohuliyolo totalu lotali lo binggungo boo̒ li iimamu, totili wumbuto lo detumio wohuwohu mola ngopee̒, toitaato bintolo wohuta monto hiyolo moa̒aluti. 21Tutuuu̒de wolo palenta lo Eeya odelei Musa, pateda tau̒bu duhelo powumbutolo wolo tali wahue̒ente topateda loboo̒ li iimamu, tunggula tau̒bu duhelo boito debo woluo toitaato bintolo wohuta wau diila molopato.
Mohutu pakeyangi wewo duo̒lo mongo iimamu
(Pilot. 28:31-43)
22Jumba upomake toitaato boo̒ li iimamu, ngoa̒amilalo pilohutu lonto lambuto himba umoa̒aluti wahue̒nte. 23Huango buloo̒lio piloo̒toheeto wolo pita hiliyolo alihu diila gambangi mokedengo. 24-26To biihu pali-paliito wimbihu walungio pohutuwolo polomu hungo lodalima monto kaingi lineni moa̒aluti wau lambuto himba umoa̒aluti wahue̒nte, lailowumu wau meela, tutuumbawa wolo kelintingani monto hulawa, motuuu̒de lou̒ pilomalenta lo Eeya odelei Musa.
27Timongolio lohutu kameja odelei Haruna wolo mongo walai̒o, 28olo sulubani, destari wau talala limbu-limbuo̒ monto lineni 29wau bintolo monto kaingi lineni moa̒aluti, lambuto himba umoa̒aluti wahue̒nte, lailowumu wau meela, pilolomu wolo karawo, debo odelo upilo malenta lo Eeya odelei Musa. 30Wau olo pilohutu polomu lonto hulawa tutu, tuoto deu̒ timongolio mapilohetu ode Eeya. To polomu boito uu̒ukili tataa-heyaalo “Pilopo tolomodu ode Eeya”. 31Polomu boito pilohuli to sulubani wimbihu talulio, tutuuu̒de wolo palenta lo Eeya odelei Musa.
Kalaja boito piloo̒lapato
(Pilot. 35:10-19)
32Pulitio mao̒ debo yilapatolo mola ngoa̒amila kalaja mohutu Kema lo Eeya. Taulo Isirai̒lu malohutu totoonulalo debo odelo upilo malenta lo Eeya odelei Musa. 33Timongolio lodelo mao̒ odelei Musa Kema wolo totoonulalo u powimumutio, kakaaitio, aa̒a-yuwaalo bulawahu, wowoo-lihiyaalo, wau wumbatio, 34tau̒bu walito batade ulai̒ u pilopo weela, tau̒bu monto walito moa̒aluti, kaingi pomeleu̒tu. 35Bulua Daantia utua-tuanga botu dulopita wau ayu pomulihelo wau pomeleu̒tio, 36meja wolo ngoa̒amila u powimumutio wau roti pohinta, 37oa̒ato tohe lonto hulawa tutu, totoohelio wolo totoonulalo u powimumutio, winulo duo̒lo tohe, 38mesba lonto hulawa, winulo upacala, dupa moonu, podehu huhebu lo Kema, 39mesba lonto polunggu wolo halamo kawa lonto polunggu, ayu pomulihelo wau totoonulalo u powimumutio; baki tambati pomuboa̒lo wolo wumbatio, 40Lalaa-yahuwaalo duo̒lo palepelo wau wowoo-lihiyaalo boli wumbatio, podehu lohuhebu hulubangi lo palepelo boli tataa-liilio, papaa-too̒waalo Kema; ngoa̒amila pakaakasi upomake todelomo Kema, 41wau pakeyangi potabia ode mongo iimamu tou̒ timongolio otuugasi to Tambati Mantali wau pakeyangi tolomodu olei Haruna wau mongo walai̒o. 42Taulo Isirai̒lu malohutu ngoa̒amila kalaja boito debo odelo upilo malentai lo Eeya odelei Musa. 43Tei Musa lomalakisa totoonulalo mao̒ wau loo̒onto deu̒ timongolio malohutu mao̒ papaasia debo odelo upilo malentai lo Eeya. Lapatao̒ tei Musa lobalakati mao̒ olimongolio.
Currently Selected:
PILOTIMUA̒TA 39: LAIGOR
Highlight
Copy
Compare
Share
Want to have your highlights saved across all your devices? Sign up or sign in
