PILOTIMUA̒TA 36
36
1Tei Bejaleel, Aholiab, wau ngoa̒amila taa u loo̒tapu oa̒ahali lonto Eeya, motota lo pohuli mohutu totoonulalo u palaluwolo u momangu Kema lo Eeya. Timongolio musi mohutu totoonulalo mao̒ debo odelo u mapilo malenta lo Eeya.”
Bangusa lo Isirai̒lu longohi dembulo dadaata
2Tei Musa lotiangao̒ olei Bejaleel Aholiab wau ngoa̒amila taa u loo̒tapu oa̒ahali lonto Eeya wau ta iloheela lohilao hilaa momantu, lapatao̒ lopoa̒hu olimongolio lolumulao̒. 3Tei Musa longohi mao̒ olimongolio totoonulalo u podembulo taulo Isirai̒lu duo̒lo kalaja momangu Kema lo Eeya. Bo bangusa lo Isirai̒lu donggo tulusi wambai̒o hemodelo mai dewo odelei Musa timi-timii̒du dumodupo. 4Lapatao̒ tahi osiipatia moo̒olohu tadonggo hemo ponao̒ kalaja boito 5lopoduloheo̒ odelei Musa, “Babaa-haniyaalo u pilodembulo tau-tauwala boito malebe-lebe lou̒ palaluwolo duo̒lo kalaja u pilopo tuugasi mai lo Eeya.”
6Oo̒dito tei Musa malopo malalumu lomola to ngoilanggubu lo pilokemawa deu̒ malo tuu̒udelo dembulo duo̒lo Kema lo Eeya; oditolio tau-tauwalo diilalo modelo wolo-wolo poli. 7Babaa-haniyaalo u mapilo dembulo limongolio lebe lou̒ tutuuu̒de huna mopoo̒ lapato ngoa̒amila kalaja boito.
Tahi osiipatia moo̒olohu helohutu Kema lo Eeya
(Pilot. 26:1-37)
8Lapatao̒ taa̒ahali daa̒ towolota tahi osiipatia moo̒olohu boito lohutu Kema lo Eeya. Kema boito pilohutu limongolio lonto kaingi lineni moa̒aluti mopuulo pita u hilewo wolo lambuto himba wahue̒nte, lailowumu wau meela, lapatao̒ kilarawo wolo gambali malaikati opolipio̒. 9Timii̒du ngopata tutuuwauwa tuu̒dio; hayai̒o mopulaa limo lomeeteri wau tanggalio dulo meeteri. 10Kaingi limo lopata powumbutolo mowali ngolayahu, wau limo lopata uwewolio pohutuwolo odito olo. 11Tobiihu lolayahu duuduluo pohutuwolo abito monto kaingi wahue̒nte, 12limo lopulu abito ngotii̒du layahu, tunggula debo odelo ngopange. 13Lapatao̒ pilohutulio limo lopulu kaito hulawa u mopotuwau layahu dulopata boito.
14Lapatao̒ timongolio lohutu watopo Kema boito lonto kaingi mopulaa tuwau lopata lonto lambuto batade. 15Timii̒du ngopata tuu̒dio, hayai̒o mopulaa tolo meeteri wau tanggalio dulo meeteri. 16Limo lopata powumbutolo mowali ngolayahu, wau wolomo pata wewolio pohutua mao̒ odito olo. 17Limo lopulu abito pilopohuli tobiihu layahu ubohulio wau limo lopulu abito tobiihu layahu u oluolio. 18Lapatao̒ pohutuwolo limo lopulu kaito monto polunggu u mopotuwau layahu mohelu duluo boito mowali watopo Kema. 19Lapatao̒ uito pohutuwolo tau̒bu mohelu duluo uolo wimbihu Kema, tuwau monto walito himba ulai̒ u pilopo weela, wau uwewo monto walito u moa̒aluti.
20Lapatao̒ timongolio mohutu tutuu-lalowaalo Kema utihu-tihulo motulidu lonto ayu aakasia. 21Motii̒du tulalo langgatio wopato meeteri tanggalio wolomo pulu wau wolomo senti. 22To motii̒du tulalo pohutuwolo patoo̒ mohelu duluo u ngopange, tilunggula totoonulalo tutuu-lolawaalo boito mowali wumbatalo u tuwau wolo uwewo. 23To wimbihu huliaalio lo Kema pohutuwolo dulopulu tulalo, 24wolo wopato pulu wumbatio monto talaa̒, duluo towalungo lomotii̒du tulalo duo̒lo patoi̒o mohelu duluo. 25Towimbihu tilayo lo Kema pohutuwolo dulo pulu tulalo, 26wolo wopato pulu wumbatio monto talaa̒, duluo towalungo lotimii̒du tulalo. 27To dibalaka lo Kema towimbihu otolopa, pohutuwolo tulalo mohelu wolomo, 28wau duluo tulalo duo̒lo tutulio. 29Tutuu-lalowaalo tutulio boito powumbutolo to oa̒atio tulusi demola wimbihu yitaatio. Oluo lo tulalo u mopomoodeli tutulio pohutuwolo wolo pohuli boito. 30Oditolio ngoa̒amilalo woluo mohelu walu tulalo wolo mopulaa wolomo wumbuto talaa̒, duluo towalungo motii̒du tulalo.
31Lapatao̒ timongolio lohutu mao̒ mopulaa limo ayu bulawahu lonto ayu aakasia, limo ode tutuu-lalowaalo tobiihio tuwau lo Kema, 32limo ode biihio uwewo, wau limo poli uolo dibalaka lo Kema towimbihu otolopa. 33Ayu bulawahu u tohuungio, pohuliyolo ngoilanggato ngotayadu tulalo, monto huudo ode huudo lo Kema boito. 34Tulalo Kema wau ayu bulawahu boito woludelo wolo hulawa, lapatao̒ pohuliyolo pateda hulawa u molahangi aa̒a-yuwaalo boito.
35Timongolio olo mohutu kaingi lohuhebu monto lineni moa̒aluti u hilewo wolo lambuto himba wahuente, lailowumu wau meela, lapatao̒ kalawowalo wolo gambali malai̒kati opolipio̒. 36U pontayangalo kaingi boito pohutuwolo wopato wolihi monto ayu aakasia u owoludee hulawa wolo kaito hulawa wau pohuliyolo toitaato wopato wumbato talaa̒. 37Lapatao̒ pohutuwolo mao̒ podehu ode huhebu Kema monto lineni moa̒aluti u hilewo wolo lambuto himba wahue̒nte, lailowumu wau meela wau pilolomu wolo kalawo. 38Uolo kaingi lohuhebu boito pohutuwolo wolihi mohelu limo u powumbutolo wolo kakaai-towaalo. Huhuu-duwaalo wau popoo-humbutowalo lo wolihi mohelu limo boito woludelo wolo hulawa, hiambola olimo wumbatio pohutuwolo monto polunggu.
Currently Selected:
PILOTIMUA̒TA 36: LAIGOR
Highlight
Copy
Compare
Share
Want to have your highlights saved across all your devices? Sign up or sign in
