PILOTIMUA̒TA 35
35
Wuu̒du pasali lodulahu Saabati
1Tei Musa longambu mai ngoilanggubu bangusa lo Isirai̒lu lapatao̒ loloi̒ya mao̒ ode limongolio, “Uti-utieelo palenta lo Eeya ode olimongoli: 2Woluo wolomohui mola u mokalaja, bo dulahu u opitulio yi todulahee u pohuheliyalo, dulahu buka u pilohetu mai uolo Eeya. Tatoonu tamo kalaja todulahu Saabati musi hukuu-maniyolo mate. 3Todulahu boito timongolio diila mowali mopolai̒to tulu tobele limongolio.”
Dewo Duo̒lo Kema lo Eeya
(Pilot. 25:1-9)
4Tei Musa loloi̒ya mao̒ ode ngoilanggubu bangusa lo Isirai̒lu, “Odie mola palenta lo Eeya:
5Delowa mao̒ dewo ode Eeya. Tatoonu tai̒lu moliyoo̒ hilaalio, musi mopodewo mao̒ hulawa, talaa̒, wau polunggu; 6kaingi lineni moa̒aluti, kaingi lambuto binatangi u moa̒aluti wahue̒nte, lailowumu wau meela; kaingi lonto lambuto batade; 7walito himba ulai̒ upilopo weela; walito moa̒aluti, ayu aakasia, 8winulo uolo tohe; ramba-ramba uolo winulo upacala wau uolo totabu umoonu; 9poliyoto dalima wau poliyoto wewo u atuluwolo toboo̒ li iimamu wau tau̒bu lo duhelo li Iimamu Daa̒.”
Pakaa-kasiyalo duo̒lo Kema lo Eeya
(Pilot. 39:32-43)
10“Ngoa̒amila taa osiipati moo̒olohu taa̒hali towolota limongoli musi monao̒ mai mohutu totoonulalo upilo malenta lo Eeya, deu̒yito-yito: 11Kema, watopo wau tau̒bio, kaito wau tutuu-lalolio, aa̒a-yuwaalo bulawahu wolihi lohuhebu wau wumbatio; 12Bulua Daantia wolo ayu pohulihelio, tau̒bio wau kaingi pomeleu̒tio; 13meja wolo ayu pohulihelio; ngoa̒amila powimumutio wau roti pohinta 14oa̒ato tohe duo̒lo potilango wolo powimumutio, tohe wolo winulio 15mesba tambati pomobuwalo dupa wolo ayu pohulihelio, winulo upacala, dupa umoonu; podehu uolo huhebu lo Kema, 16mesba uolo bake yilalango wolo talali lo polunggu, ayu pohulihelo wolo ngoa̒amila powimumutio; baki tambati pomuboa̒lo wolo wumbatio, 17lalaa-yahuwaalo uolo palepelio, wowoo-lihiyaalo wolo wumbatio, podehu lohuhebu hulubangi lo palepelo, 18papaa-too̒waalo wau tataa-liyaalo uolo Kema wau uolo palepelio; 19pakeyangi lo ibaadati uolo mongo iimamu tou̒ timongolio otuugasi to Huwali Leidaa̒ Mantali wau tolomodu pakeyangi uoli iimamu Haruna wau mongo walai̒o.”
Bangusa lo Isirai̒lu helodelo dewo limongolio
20Lapatao̒ ngoa̒amila taulo Isirai̒lu tahia̒mbua boito longoa̒lo huhuloa̒, 21wau tatoonu wambai̒o talo oliyoo̒ hilaalio, modelo mota dewo ode Eeya u mowimumutao̒ Kema lo Eeya. Timongolio olo lodelo mota ngoa̒amila u palaluwolo uolo ibaadati wau baahani uolo pakeyangi li iimamu. 22Tatoonu wambai̒o tamohuto, mopio talolai̒ meaalo taabua, modelo pake alumbeneti, ante-ante, hua̒limo, lante, wau totoonulalo hidala-dalaala pake hulawa u podewolo ode Eeya. 23Timii̒du taa okaingi lineni moa̒aluti, kaingi lambuto himba wahuente, lailowumu meaalo meela, kaingi lolambuto batade, walito himba ulai̒ u pilopo weela, meaalo walito moa̒aluti, mopodewo mao̒ balangi boito. 24Timi̒du taa umowali mopo sadaka talaa̒ wau polunggu, deloolio mota ode Eeya. Odito olo pohutuo lotau-tauwalo tadiila o ayu aakasia duo̒lo kalaja boito. 25Mongobua tamotota momitolo modelo mao̒ bola lineni moa̒aluti wau bola lambuto himba u moa̒aluti wahue̒nte, lailowumu wau meela umaa pilohutu limongolio. 26Timongolio olo momitolo bola monto lambuto batade. 27Mongo tau̒wa modelo mota poliyoto dalima wau popoo-liyotowalo wewo u ilaatulu toboo̒ li iimamu wau tau̒bu duhelo. 28Timongolio olo modelo mota ramba-ramba wau winulo uolo tohe, winulo upacala wau dupa umoonu. 29Ngoa̒amila taulo Isirai̒lu wolo iloheela lohilao lodelo mota dewo limongolio ode Eeya duo̒lo kalaja upilo malenta lo Eeya loli olei Musa.
Tahi osiipatia moo̒olohu tatiluu-gasia momangu Kema lo Eeya
(Pilot. 31:1-11)
30Lapatao̒ tei Musa loloi̒ya mao̒ ode taulo Isirai̒lu, “Eeya malo lulaoto olei Bejaleel walae̒e Uri, wombu lei Hur, lonto suku Yehuda, 31wau longohi mao̒ olio wolo kawasaa-Lio. Allahu Taa̒ala longohi mao̒ huhama olio, motoloo̒ wau omambo todelomo totoonulalo hidala-dalaala ilomata seni, 32u mohutu lanjana u momalalu taa̒ahali, wau mokalaja mao̒ wolo hulawa, talaa̒ wau polunggu; 33u modumbatao̒ botu poliyoto umaa atuluwolo; u momaisaka ayu wau duo̒lo totoonulalo hidala-dalala ilomata seni wewolio. 34To olei Bejaleel wau Aholiab, walae̒e Ahisamakh lonto suku Dan, Eeya longohi pongotota u mongaajali mao̒ oa̒ahali limongolio ode taawewo. 35Timongolio yilohia pongotota todelomo totoonulalo kalaja hidala-dalaala upilohutu lo taa̒ahali momaahati, tamoo-lanjanawa wau ahali mohewo lineni moa̒aluti, lambuto himba wahue̒nte, lailowumu wau meela, wau kaingi wewo. Timongolio yito tamoo-lanjanawa ahali wau mowali mohutu totoonulalo kalaja hidala-dalaala.
Currently Selected:
PILOTIMUA̒TA 35: LAIGOR
Highlight
Copy
Compare
Share
Want to have your highlights saved across all your devices? Sign up or sign in
