TINGULI 6
6
Palenta ulaba-labaalo mopiohu
1“Eeya Allahu Taa̒ala limongoli lopoa̒hu mai olaatia mopoa̒ajali mao̒ ngoa̒amila butoo̒ botie ode limongoli alihu timongoli moponao̒ mao̒ tolipu u diilalo mohiheo mapo tibiluloa̒ limongoli. 2Mamusi timongoli wau waliimu mola ngotupa lo tutumulo mohulumati to Eeya Allahu Taa̒ala limongoli wau modungohe ngoa̒amila buto-I̒o u potunggulo mai lowatia olimongoli, alihu timongoli otutumulo hayahaya tolipu boito. 3Sababu uito dungohilo mongo wutato, pohutua mao̒ uito wolo tatapu wau molotolo hilao, alihu timongoli moa̒ahu wau mowali bangusa uleidaa̒ tolipu ukaya wau molomiodu, debo odelo dilanti mai lo Eeya Allahu Taa̒ala loluuhurunto.
4Mongo wutato, eelai mao̒! Bo Eeya, wau Eeya wambai̒o Allahu Taa̒alanto! 5Tolia̒ngi mao̒ to Eeya Allahu Taa̒ala limongoli wolo lealeaatu lo hilaamu: Pobilohe mao̒ uito todelomo dudelo lo tutumuli mongoli wau todelomo huhutu limongoli. 6Sama-samaata diila mao̒ lipata papaa-lentawalo uwohi mai lowatia ode limongoli todulahee botie. 7Poa̒ajalia mao̒ ode mongo walai̒ mongoli. Mamusi bisalaawa mao̒ limongoli todelomo bele wau to bulemengo bele, tou̒ mohuheli wau tou̒ mokalaja. 8Pongawade mao̒ to polootodu lo uluu̒mu wau popasia mao̒ tobayamu u hee̒elaalo. 9Potuladee mao̒ to wolihi lohuhebu belemu wau tohuhebu lo hulubangimu.”
Poe̒ela to tamo lambanga palenta
10“Eeya Allahu Taa̒ala limongoli helodanti mai odeli nenemoya limongoli tei Abraham, Isihaka wolei Yako deu̒ Tio mamongohi mai lipu boito ode limongoli. Kokoo-taalio udaa̒ wau maa̒amulu, wau diila timongoli tamopo tihulao̒. 11Bebeelelio polupolu wolo babaa-langiyalo u mopihu, wau diila timongoli tamo luangao̒. Timongoli mamoo̒ dungga aa̒a-liyaalo, wau diila timongoli tamo ngau̒deo̒. Timongoli mamoo̒ dungga ii̒i-lengiyaalo angguru wau jaitun, wau diila timongoli tamo pomulo mao̒. Wonu bolo Eeya modelo olimongoli ode lipu boito, wau timongoli o ngoa̒amilalo u otohilaa tamelo limongoli, 12yi poo̒dahai mao̒ tio̒otutua alihu timongoli diila mao̒ molipata to Eeya tamalo lopata olimongoli lonto Masiri, tambati limongoli pilowato. 13Hulumatia mao̒ Eeya, Allahu Taa̒ala limongoli, wau potaa̒alukulo wau hulumatiyalo Tio Olio wambao̒, wau wonu timongoli motadia, yi pohutua mao̒ uito domi tanggu-Lio wambao̒. 14Diila tapolubo ila-ila wewo u hetuboo lo babaa-ngusawalo tahi biluloa̒wa to palitumu. 15Wonu timongoli molubo ila-ila wewo, yi timongoli mao̒dungga muluka lo Eeya Allahu Taa̒ala limongoli wau pobinasaa-Lio mai sama-samaata, sababu Eeya Allahu Taa̒ala limongoli tawoluo tohuungi mongoli diila mohuto potutuu-wauwola penu boli loolo.
16Diila mao̒ pohimontala to Eeya Allahu Taa̒ala limongoli debo odelo u pilohutu limongoli to Masa. 17Dungohi mao̒ ngoa̒amila butoo̒ uilohi mai lo Eeya Allahu Taa̒ala limongoli ode limongoli. 18Pohutua mao̒ wolo u modudua̒a to Eeya mopiohe wau aadili, yi timongoli maa aamani sontosa boli maa̒amulu. Huta molomiodu u pilodanti mai lo Eeya odeli nenemoya limongoli, mamowali miliki limongoli, 19wau timongoli mamo polahi mao̒ mumuu-suwaalo limongoli debo odelo u pilodanti mai lo Eeya.
20To dulahu momooli mongo walau̒mu mamohintu olimongoli, ‘Yilongola Eeya Allahu Taa̒alanto mopoa̒hu olanto modungoheo̒ ngoa̒amila palenta boito?’ 21Yi timongoli musi molametao̒ odie, ‘Muloololio mai ito lowali wato li olongia lo Masiri, lapatao̒ Eeya lolopato olanto wolo olootolo daa̒. 22Ami lohihilao losakusi mao̒ Eeya helohutu totoonulalo moo̒linggolabu wau susuu-aliyaalo u moo̒tihela hapato ode taulo Masiri wau odeli olongia limongolio wau ngoa̒amila tahidihuma pantungo lipulio. 23Tio lolopato olanto lonto Masiri wau lodelo olanto odia mai, wau huta botie yilohi-Lio ode olanto debo odelo u pilodanti-Lio odeli nenemoyaanto. 24Eeya Allahu Taa̒alanto lopoa̒hu mai olanto mohutu mao̒ ngoa̒amila palenta boito wau mohulumati o-Lio. Wonu ito mohutu mao̒ odito, yi Tio malaito molaalai bangusaanto alihu debo tumu-tumulo wolo moa̒ahu. 25Wonu ito wolo tatapu wau molotolo hilao modungoheo̒ totoonulalo upilo malentai lo Eeya Allahu Taa̒alanto ode olanto, yi Tio mamo tuhatawa wolanto.’ ”
Currently Selected:
TINGULI 6: LAIGOR
Highlight
Copy
Compare
Share
Want to have your highlights saved across all your devices? Sign up or sign in
