TINGULI 5
5
Mopuulo Palenta lo Allahu Taa̒ala
(Pilot. 20:1-17)
1Tei Musa longambu mai ngoilanggubu bangusa lo Isirai̒lu, lapatao̒ loloi̒ya mao̒ olimongolio, “Mongo wutato, dungohi mao̒ bubuu-too̒waalo uwohi mai lowatia todulahee botie olemu. Pobalaajalia mao̒ bubuu-too̒waalo boito, wau dungohi mao̒ wolo tatapu wau molotolo hilao. 2To Hui̒dee Sinai Eeya Allahu Taa̒alanto lohutu mai daantia tuwau, 3diila bo wambao̒ wolo loluuhurunto, bo wolanto ngoa̒amila teewe. 4Lonto tulu toitaato hui̒dee boito Eeya ohilaa motahuda tulusi woli mongoli. 5Bo sababu timongoli moohe lotulu wau diila buheli motao̒de mola hui̒dee, yi watia tou̒ boito tilimihulao̒ towolota limongoli wolo Eeya u lopo tunggulao̒ tahuda lo Eeya ode limongoli.
Eeya lopo malalumu mai, 6‘Wau̒lo Eeya Allahu Taa̒ala limongoli talodelo mai olimongoli yilumualao̒ lonto Masiri, tambati limongoli pilowatolio olimongoli.
7Diila mao̒ polubo ila-ila wewo, tubowaalo Wau̒ wambai̒o.
8Diila mao̒ pohutua duo̒lo batangamu bui̒ u penu boli debo odelo wolo wambai̒o uwoluo tohulungo, todunia meaalo todelomo taluhu towalungo lo huta. 9Diila mao̒ polubo bui̒ debo odelo uito sababu Wau̒ Eeya Allahu Taa̒ala limongoli wau diila mohuto potutuu-wauwola penu boli loolo. Tau-tauwalo tamolonua̒ ola-U̒ hukuu-maniyo-U̒ demola wali otolulio wau opatio. 10Bo Wau̒ mopo bilohei ponu-U̒ ode hilihu-lihua wali monto tau-tauwalo tamo tolia̒nga ola-U̒ wau modungohe palentaa-U̒
11Diila mao̒ polanggula tanggulu-U̒ wolo majanunu, sababu Wau̒, Eeya Allahu Taa̒ala limongoli, mohukuumani mai penu boli tatoonu wambai̒o tamopohuna tanggulu-U̒ diila to tambatilo.
12Polamea mola dulahu Saabati wau hulumatia mao̒ odelo dulahu umantali, sababu Wau̒lo Eeya Allahu Taa̒ala limongoli tamo malentai olimongoli. 13Timongoli wohiya-U̒ mai wolomohui u mokalaja, 14bo todulahu u opitulio yito dulahu pohuheliyalo u tolomodu ode ola-U̒, Eeya Allahu Taa̒ala limongoli. Todulahee boito diaaluo penu boli ngotaa mao̒ tamowali mokalaja, mopio timongoli, mongo walau̒mu, mongo watomu, bibiahumu meaalo tau deli tabilu-biluloa̒ to lipumu. Mongo watomu musi mohuheli debo odelo timongoli lohihilao. 15Eelai mola deu̒ timongoli muloololio mai pilowatolio to Masiri, lapatao̒ bilebasia lo Eeya Allahu Taa̒ala limongoli wolo olootolo uleidaa̒. Sababu uito timongoli palentaa-U̒ mai u mopolame mao̒ dulahu Saabati.
16Hulumatiyalo wau taala mao̒ tiyamo wau tiilamu; ui-uitolo palentaa-U̒, Eeya Allahu Taa̒ala limongoli, alihu timongoli moa̒ahu wau otutumulo hayahaya tolipu u mawohi-U̒ mai olimongoli.
17Diila mao̒ pomate mate-mateelo mao̒.
18Diila mao̒ pojina.
19Diila mao̒ potao̒.
20Diila mao̒ pongohi sakusi u wimbulo pasali lotaa wewo.
21Diila mao̒ potohilaa uolo taa wewo: belelio, hutalio, dilelio taabua, mongo watolio, bibiahio, kolodailio meaalo penu boli wolo wambai̒o u tilolo hakuulio.’
22Ui-uitolo palenta uilohi mai lo Eeya ode limongoli tou̒ timongoli hia̒mbua tohui̒dee. Tou̒ Tio lotahuda mai wolo suala lobulonggodu lonto tulu wau heengo u mohulodu, Tio longohi mai papaa-lentawalo boito, wau diila taweewo. Lapatao̒ Tio loluladeo̒ tobotulei dulo pita wau longohi mai ode olau̒.”
Taulo Isirai̒lu hiduita
(Pilot. 20:18-21)
23“Tou̒ ngoilanggubu hui̒dee yilumai̒to wau timongoli loo̒dungohe suala lonto u modio̒lomo, ngoa̒amila tau̒wa losuku limongoli wau tahimuloa lolipu lonao̒ mai ode laatia. 24Uali mongolio mao̒, ‘Eeya Allahu Taa̒alanto malo pobilohei odudaa̒ wau ololama-Hio tou̒ ami loo̒dungohe helo tahuda mai lonto tulu. Todulahee botie ami malo sakusi deu̒ memangi otanu ode manusia u debo tumu-tumulo, eleponu Allahu Taa̒ala malo tahuda mao̒ olio. 25Bo yilongola ami musi mopo bataru mao̒ nyawa lami poli? Tulu u moo̒tihela hapato boito mamopo binasa mao̒ olami! Ami yakini deu̒ ami maamate wonu moo̒dungohe Eeya Allahu Taa̒ala muli motahuda mai. 26Wolo tingga woluo manusia tadebo tumu-tumulo lapatao̒ loo̒dungohe Allahu Taa̒ala tatumu-tumulo helo tahuda mai lonto tulu? 27Sababu uito, ponao̒lo Musa, dungohi mao̒ ngoa̒amila u potahuda mai lo Eeya Allahu Taa̒alanto, lapatao̒ potunggula mai ode olami wolo u pilotahuda-Lio mai olemu. Ami mamo dungohe wau taaa̒ti.’
28Loo̒dungohe uito, Eeya lotahuda mai ode laatia, ‘Wau̒ maloo̒ dungohe wolo uiloi̒a lobangusa boito, wau otutuulo mao̒ uali mongolio. 29Ntali wonu timongolio laito opongolaasa odito! Ntali wonu timongolio laito mohulumati ola-U̒ wau modungohe ngoa̒amila palentaa-U̒ tilinggula timongolio wau wali mola limongolio moa̒ahu u ohiheo-hiheolo mao̒! 30Ponao̒lo botia wau ahuliilo bangusa boito muli mohualinga mota ode kemalio ngota-ngota. 31Bo yio̒, Musa, muli pohualingai wau potibiluloo̒lo teea wola-U̒; to olemu mawohiya-U̒ mai ngoa̒amila butoo̒ wau palentaa-U̒. Poa̒ajalia mao̒ olimongolio, alihu timongolio modungoheo̒ tolipu uwohi-U̒ mai olimongolio.’
32Mongo wutato, dungohi mao̒ wolo tatapu wau molotolo hilao totoonulalo upilo malentai lo Eeya Allahu Taa̒ala limongoli ode limongoli. Diila mao̒ lambanga penu boli tuwau mao̒ monto papaa-lentawalo boito. 33Pohutua mao̒ ngoa̒amila upilo malentai lo Eeya Allahu Taa̒ala limongoli ode limongoli alihu timongoli moa̒ahu wau mowali motitatapu tolipu u mapoti biluloa̒ limongoli.”
Currently Selected:
TINGULI 5: LAIGOR
Highlight
Copy
Compare
Share
Want to have your highlights saved across all your devices? Sign up or sign in
