Roma 6
6
Kristus ninom watlagagusik ninomat niniluk dogogun wene
1Eti paga, nit nen ninggit diluk yugun. Allah obabut pano nen, nggokogo ninaʼbuwa dogowagaluk, nit nen weyak kagako mondok dogusak nogo? 2Mondok erlok dek o. Nit weyak kagako lagagu eti ake, arat watlagagusik nen, yabunggane weyak kagako dogusak nogo? Erlok dek o. 3Nit Kristus Yesus ninom kunuwogoluk ima wusasugu mende yi, at ebe watlagike kagat, ima wusa ʼbinanggonem ninom kunigat watlagagu, yiluk kinonggodek nogo? 4Ima wusa ʼbinanggo dogolik, at ebe warek salkuka kak, nit at ninom kunik werekma warogo ʼbinangguka. Nen, at Kristus watlagikesikmo nen, ombae obatneyak pogorarigogo mende etnogo nen ilugut disike kak, nit yogondak ninilugut ninakikemo ninobabut ngget ninggalogat kagako doguwok o.
5At watlagike kak, nit ninom kunigat dogolik watlagagu kalok, at iluk agike kak, nit esigit dilugat niniluk dogogun o. 6Nit ninobabut ninikogat dogolik weyak kagako lagagu mende eti obatne deget duwagaluk, Yesus o paga mendiluk wakuka eti, nit ninomat ninakuka eti paga, nit ninobabut alep mende eti, anduwanengge dogusak dek o, yiluk ninilu. 7Akoni weyak kagatluk watlagonem, wene inoba mende dek arigogo o.
8“Nit, Kristus ninom kunigat watlagagu kalok, ninom kunigat niniluk dogogun o,” yiluk ninendainggen at oba panggot diluk werek o. 9At Kristus arat watlagikesikmo nen Allah nen ilugut disikesikmo, yabunggane watlasigin dek, yiluk ninilu o. Eti paga, Yesus yabunggane watlarigogi erlo eti apma unggusak mondok dek o. 10At Kristus watlagike eti, weyak kagarigogi eti ake omanggi pasigat watlagike eti arat o. Yabunggane iluk agikesik iluk dogoligogo mende eti, Allah ake iluk dogoligogo mende o. 11Eti kagat, kit kinakla nen,
“Weyak kagako dogusak ake waregat dogolik, Kristus Yesus ninom kunik dogolik, Allah ake niniluk dogogun,” yiluk kinakla ambasi dogoni o. 12Ninebe watlarigogi mende yi werekma, weyak kagarigogi mende eti obatne asunogo nen, apma unggiluk dogogup o. Weyak kagasuwagaluk kinakla nggagali wago kalok, weyak mende eti ane kinasuk kolkup o. 13Kininggi kiniyok kinebe paga kunik dogoligogi mende amberek inom taʼbokogonat, weyak mende asike arege negen atluk nen, weyak kagako dogowagaluk, at wogoko dogogup o. Kinebe warek kak werekma Allah nen kinilugut kinakikemo kiniluk dogolik kagasusak mot-morat, kinebe abirat Allah wogotni o. Kininggi kiniyok kinebe paga kunik dogoligogo mende inom amberek taʼbokogonat nen, at asike arege negen atluk nen, mot-mot kagako dogowagaluk Allah wogotni o. 14Kit nen, wene Allah nen ninasuk wakike wene etnogo oba panggot diluk werek dek. Mende, Allah obabut pano nen ninaʼbuwa kiligogo eti oba panggok diluk werek eti paga, weyak mende apma dogusak dek o.
Allah apma unggiluk dogoligogi wene
15Eti paga, wene eti ilugun oba, ninggit diluk yusak? Nit ninebe wene Allah nen ninasuk wakike wene etnogo paga panggot diluk werek dek o. Mende, Allah obabut pano nen ninaʼbuwa kiligogo eti paga panggot diluk werek eti paga, weyak kagako dogusak nogo? Mondok dek o. 16Kit nen, ap omanggi anduwanengge atluk nen, ane kologo doguwogoluk, apma unggiluk dogolik, at ane koligogi kalok, at anduwanengge mende werek yiluk kinonggodek nogo? Weyak kagarigogo mende eti apma unggiluk nen, ilugun oba watlarigogi o. Mende, at Allah wene kologo dogolik, at apma unggilukmo, ilugun oba at nen wene ninoba mende nggorogo ʼbiluk at ninom yabunggane suguluk kunogo ʼbinanigogo o. 17Kit alebat, weyak kagarigogi eti apma unggiluk werekma, yabunggane, wene yanggul kisasinem, wene eti kinendainggenma waganggigip eti paga, Allah keyagi wako doguwok o. 18Kit kinebe, weyak kagarigogi mende eti nen pakisek werekma, Allah nen kerle piyalogo ʼbinagisikesik nen, at ake mot-mot kagako dogowagaluk, apma ʼbinagisikemo werek o. 19Kit kinobabut wene yokisigi eti didusak erlok dek paga, didubagik nen yiluk, akoni inanduwanengge dogolik kagarigogi mende inoba lisogo yokisaligogo o. Kit alebagik, kininggi kiniyok kinebe paga kunik dogoligogo mende amberek inom taʼbokogonat nen, weyak mende anduwanengge salek wogokik, yugunat kagakik, kinasuk warek dek yi weyak ndi weyak kagakik, kagako lagagip o. Eti kagat, yogondak kit kininggi kiniyok kinebe paga kunik dogoligogo mende amberek inom taʼbokogonat, Allah enggaerek ake ʼbiyalok mot-mot kagako doguwogoluk, at wogoko dogoni o. 20Kit alep weyak kagarigogo mende apma dogolik, Allah akla warlok ambaligogo mende mot-mot kagasusak erlok dek welagagip. 21Mende, esigit diluk kagako lagagip eti paga, nena mende saburasigip nogo? Alebat kagako lagagip mende eti paga, yogondak kinenggarli arigogo o. Esigit diluk kagako dogoluk nen, ilugun oba inebe mondok watlarigogi etiat o. 22Mende, kit weyak kagako nggorlek, weyak mende nen pakisek werekma, Allah nen kerle piyalogo wula ʼbinagisikemo nen, yogondakne at apma unggiluk werek o. Dogolik, kinebe at ake ʼbiluk werek eti sabusegep o. Esigit diluk dogoluk, ilugun oba kiniluk mondok dogogunat o. 23Weyak kagarigogi eti onggo, watlarigogi etiat o. Nen, ninewe Endaganggok Yesus Kristus ninom kunik werekma Allah obabut pano nen onggo degat niniluk mondok dogowagaluk kagat ninabigogo o.
Currently Selected:
Roma 6: DNA
Highlight
Share
Compare
Copy
Want to have your highlights saved across all your devices? Sign up or sign in
