Roma 7
7
Kumi-ap woginabigogi eti inoba lisogo yogisasike wene
1Nagarlagi nirugi o. Allah nen,
“Yigit diluk kagatno, ndigit diluk kagatno,” yiluk ninasuk wakike eti, akoni inebe iniluk dogolik wene eti pago dogolik mot-mot kagakidek kalok wene inoba arigogo. Mende, inebe watlago kalok, wene inoba arigogo dek yiluk kinonggodek nogo? Dek o. Kinilu mende yokisiligogo o. 2It kumi inagoni waganek mende, inagoni inebe iniluk werek nggorlek, wene Allah nen ninasuk wakike wene eti paga, inom kerle warek negen pano welagidek kalok, wene inoba asusak. Mende, inagoni watlagonem nen, kerle warek kak eti piyalogo kalok, wene inoba asusak dek. 3Kwe omanggi nen, agun iluk werek nggorlek ap agake waganggo kalok, akoni nen,
“Weyak kagarigogi o,” yiluk abok weyak yusagat o. Mende, agun ebe watlago kalok, wene Allah nen ninasuk wakike wene eti paga kerle warek negen welaguka eti, arat piyalaga yiluk, ap omanggi erlok waganusak o. Waganggonem,
“Weyak kagarigogo,” yusak dek o. 4Eti kak, nagarlagi nirugi o. Kit alebat, kumi inagoni inom kerle warek kak dogoligogi yogo eti kak, wene Allah nen ninasuk wakike wene etnogo paga kerle warek werekma, at Kristus ebe wakukama watlagike eti, kinomat watlago dogolik, kerle warek kak welagagip mende eti arat piyalagike. Eti paga, kumi inagoni watlagonem omanggi erlok woginabusak eti kak, kit Allah ake pano kagako dogowagaluk, at Yesus watlagikesikmo Allah nen ilugut disike mende etnogo nen wokinakikemo werek o. 5Alebat, nit ninobabut akoni inobabut ninikogat welagagu. Esigit diluk dogolik, wene Allah nen ninasuk wakike wene etnogo werek nen, ninoba aganggen dagasinem, nininggi niniyok ninebe abirat nen weyak kagakonem ilugun oba, mondok watlago lagagu. 6Alebat wene Allah nen ninasuk wakike wene etnogo paga kerle warek negen welagagu mende, Kristus watlago dogolik nit ninomat watlagagu eti paga, Allah nen kerle piyal ninakikemo werek. Yogondak, Allah anduwanengge dogolik, wene at nen ninasuk wakike wene kolal mbalek mende ninilenggenat ʼbikasi dogolik, kagako lagagu eti kak, kagako lago dek mende, Allah Agurengge nen ninobabut ngget mende kagat ninako nggorlek, kagarigogi o.
Wene Allah nen ninasuk wakike wene eti paga, weyak kagarigogo mende enggagat agike wene
7Eti paga, nit nen ninggit diluk yugun. Wene Allah nen ninasuk wakike wene eti weyak yusak nogo? Mondok dek o. Mende, wene esigit diluk ninasuk wakidek dogolepma, weyak kagarigogi eti ebe nena mende yiluk nonggodegat dogolep o. Allah nen wene ninasuk wakike eti wako dogolik,
“Akoni inamende,
Warlok a, yiluk kinakla ambagup o,” (Kel. 20:17; Ul. 5:21)
yiluk yigidek dogolepma, an akoni inamende mende,
Warlok a, ambaligogo eti nonggodegat dogolep o. 8Eti nenat, wene Allah nen ninasuk wakike wene eti paga, weyak mende nen, an weyak kagasuwagaluk,
“Yi mende ndi mende akoni inamende, kakla nen, warlok kakan o,” yiluk nakla nggagalko lagike. Wene Allah nen ninasuk wakike eti wakidekma, weyak kagasusak, ninonggodegat welagagu. 9An alep, wene Allah nen ninasuk wakike wene eti nonggodek dogolik, niluk pano werek salek welagigi. Mende, wene ninasuk wakike wene etnogo nilu agagisik oba nen, weyak kagarigogi eti mende obatne agikemo, 10an warek negen kagat lagagi. Allah nen niluk dogowagaluk nasuk wakike mendeat ogwe, wene eti paga warek negen kagat lagagi o. 11Allah nen ninasuk wakike wene eti paga, weyak kagarigogi eti nakla nggagalogo nen, nuket danggikesik nen, nebe nakike o. 12Wene Allah nen ninasuk wakike wene eti, Allah aneat o,
“Yigit diluk, ndigit diluk kagasusak dek,” yiluk ninasuk wakike wene eti ebe dombok at aneat o. Wene eti mot pano mondok yisike o. 13Eti paga, wene eti pano mondok yisike eti paga an nebe watlagagi nogo? Mondok dek o. Weyak kagarigogi eti nenat o. Weyak kagarigogi eti nen, pano mende eti paga warogo ʼbanggikemo, enggagat agike. Wene Allah nen ninasuk wakike eti paga, inobabut weyak kagarigogi eti mondok weyak, yiluk enggagat kagat lagike o.
“Nakla nen pano kagasigin ambaligogo mende, ebe kagarigogo dek,” yisike wene
14Wene Allah nen ninasuk wakike wene eti, at Agurengge nen yoknisasikemo nogo nen, pano mondok, yiluk ninilu. Mende, an nobabut akoni inobabut inikok mendeat werek o. Weyak kagarigogo eti mende nen apma ʼbanigiluk onggo mbalogo nen woknakikemo werek. 15Eti paga an nakla nen,
“Yi mende ndi mende pano mende kagatlep,” yiluk warlok ambiligogo mende eti, ebe kagarigogo dek o. Mende, naʼit ambiligogo mende etiat kagako dogolik eti nen, an kagako lagi mende eti didigidek werek o. 16An nakla nen warlok ambiligogo mende dek. Naʼit ambiligogo mende kagarigogo eti,
“Wene Allah nen ninasuk wakike wene etiat pano,” yiluk yu kagat kagarigogo o. 17An nobabut esigit diluk kagarigogo eti, an nen kagarigogo ʼbuk. Weyak kagarigogo mende nakla dogolik kagarigogo. 18Mot-mot kagasigiluk warlok ambaligogo mende, ebe an nen kagasusak erlok dek o. Eti, an nobabut nen, pano mende omanggi kagarigogo mende ʼbuk. Nobabut akoni inobabut nikogat dogolik kagarigogo, yiluk nilu o. 19Pano mende kagasigiluk ambasi mende, ebe kagarigogo dek. Weyak mende kagasigiluk ambigidek mende, eti mendeat kagarigogo o. 20Nakla nen warlok ambigidek. Naʼit ambasi mende kagarigogo kalok, an nebe nen kagarigogo dek kigi. Weyak kagarigogi mende nakla dogoligogo mende eti nenat kagarigogo kigi.
21An nobabut kagarigogo mende yigi eti, men kiligogo. Pano kagasigiluk yisinem, weyak kagasusak negen kagat nabigogo o. 22An nakla nen,
“Wene Allah nen ninasuk wakike wene eti pano,” yiluk ambiligogo mende, 23ninggi niyok nebe abirat, ninat mende kagako dogolik, wene Allah nen ninasuk wakike wene etnogo nakla nen pano ambiligogo mende eti sebeligiluk kagarigogo mende. Ninggi niyok nebe abirat yoma weyak dombok kagarigogo mende eti paga, nebe weyak kagasuwagaluk kerle warogo negen ʼbanigogo o. 24-25An nenggaerek nakla eti, wene Allah nen ninasuk wakike wene eti kologo kagako dogogin ambiligogo mende, nobabut akoni inobabut inikogat dogolik kagarigogi eti nen yoknokonem ane kologo kagarigogo o. Esigit diluk kagarigogo eti paga, nebe mondok nasigin eti, iya, nakla weyak. Ta nen ndil nabigin? Ninewe Endaganggok Yesus Kristus kagakike eti paga ndil nabigin eti paga,
“Nombae Allah o,” yiluk keyagi warigogo o.
Currently Selected:
Roma 7: DNA
Highlight
Share
Compare
Copy
Want to have your highlights saved across all your devices? Sign up or sign in
