Roma 16
16
Paulus nen it Allah aʼburi o Roma mende amberek inebe dombok keyagi warinakike wene
1Kwe niniru Febe eti ebe kinilurogo yanggul kisak. At obabut panoma Allah aʼburi o Kengkrea mende yamagiyiligogo mende kinoba waga eti, 2kit kinebe ninewe Endaganggok kinom kunik dogolik, Allah aʼburi nen waganusak ndak-ndagat, at ebe waganubagik nen yiluk yokisigi o. At amende yi mende ndi mende dek kalok, kit mende amberek wogoko dogoni o. At nen akoni dogalegat yamagiyigik, an nebe inom yamak niyigik, kagako lagikesikmo, kit nen at ebe waganini o.
3Nen, omanggi, kwe Priskila agun Akwila imbisak an ninom Kristus Yesus ake kagako lagosik wagaka mende eti, Paulus nen keyagi watkinake yiluk yogisano o. 4It an ndil nabuwogoluk lagonem, inatlep eti paga,
“Inaʼbuwa o,” yiluk an narligat nen keyagi warinabigogo ʼbuk. It akoni Allah aʼburi sikmangge mende nandorligogi mende inom, inebe taʼbokogonat ninom nenat keyagi warinabigogi o. 5Allah aʼburi it Priskila Akwila imbisak inaguma nandorligogi mende inomat,
“Paulus agarlagi inom nen keyagi watkinaka,” yiluk yogisanoat o.
Nen, omanggi, ap Epenetus aʼbuwa mende eti,
“At nen keyagi watkake,” yiluk yogotnoat o. O Asia etoma, at eti ndak endainggen Kristus oba panggot disikemo nen, it amberek yabunggane panggot disuka. 6Kwe Maria kit kinake set weyak kagako lagike etnogo,
“At nen keyagi watkake,” yiluk yogotnoat o. 7At Andronikus, Yunias imbisak,
“At nen keyagi watkinake,” yiluk yogisanoat o. It, an ninom ninunggulowak omanggiat mende nininggi kerle ninom warek welagagusik. Akoni dogalegat Kristus nen inayonggo ʼbiluk laʼbiya wagike mende, inendaga werek eti, irat o. It ndak inendainggen Kristus oba panggot disukasikmo nen, an yabunggane panggot disigi o. 8Nen, omanggi an nagarlak Ampliatus nimbisak ninewe Endaganggok ninom kunik werek eti paga, ebe nendainggen kunik o.
“At nen keyagi watkake,” yiluk yogotnoat o. 9At Urbanus eti ninomat Kristus ake kagako lagagu mende eti inom, Stakhis nendainggen kunik mende eti inom,
“At nen keyagi watkinake,” yiluk yogisanoat o. 10At Apeles Kristus imbisak kunik dogolik obabut kumbulik kagakonem aren pano mbaligogi mende eti,
“At nen keyagi watkake,” yiluk yogokik, Aristobulus aʼburi eti,
“At nen keyagi watkinake,” yiluk yogisigik, yinoat o. 11At Herodion ap ninunggulowak omanggiat mende eti,
“At nen keyagi watkake,” yiluk yogotnoat. Nen, Narkisus aʼburi ninewe Endaganggok inom kunik mende eti,
“At nen keyagi watkinake,” yiluk yogisanoat o. 12Nen, omanggi, kumi Trifena Trifosa imbisak ninewe Endaganggok ake yabu inobatnerogo kagarigogi mende,
“At nen keyagi watkinake,” yiluk yogisigik, kwe Persis paganeat nen ninewe Endaganggok ake eyabu obatnerogo kagarigogo mende eti nendainggen kunik o.
“At nen keyagi watkake,” yiluk yogokik, yinoat o. 13At Rufus eti ninewe Endaganggok nen ayonggo ʼbisikemo akoni nen pogorarigogi o. At agoya eti, an nagoya kagat o. Eyak imbisagat,
“At nen keyagi watkinake,” yiluk yogisanoat o. 14At Asinkritus, Flegon inom, Hermes inom, Patrobas inom, Hermas inom, ninagarlagi ninirugi Allah aʼburi amberek it inom dogoligogi mende taʼbokogonat inom,
“At nen keyagi watkinake,” yiluk yogisanoat o. 15At Filologus, kwe Yulia imbisak, Nereus iru imbisak, Olimpas inomat, Allah aʼburi it inom dogoligogi mende taʼbokogonat inomat,
“At nen keyagi watkinake,” yiluk yogisanoat o. 16Nen, omanggi, kinebe Allah aʼburi werek eti, keyagi kinambe sarluk wat-wat yilik lano. Allah aʼburi Kristus agoromi o yi ai ndi ai nandorligogi mende nen,
“Keyagi warinako,” yiluk yoknekama nen yokisigi o.
Wene ilugun oba inasuk wakike wene
17Nagarlagi nirugi o. Kinakla nggagalogo wene omanggi yi nane obatnerogo yokisak o. It akoni amberek yabunggane witluk nen, wene alebagik yanggul kisasukama waganggigip mende togot diyalok nen, kinebe minggirlogo ʼbinagagik, kinakla weyagat kinakik, kagako kalok, kinobabut kwalogo dogolik, inane kinasuk kolkidek, mirlokogo togot diyasi dogono o. 18It eti, ninewe Endaganggok Kristus apma dogolik, at ake kagarigogi ʼbuk. At te, inenggaerek inakla warlok mende kagarigogi o. Esigit diluk kagako dogolik, inane pano yigik, enago yigik, yisi dogolik, it akoni amberek inobabut,
“E o,” arlek yiligogi mende eti nuket diyiligogi. 19Mende, kit Allah wene kologo kagarigogi mende eti, it akoni taʼbokogonat nen kinobabut enggagat kiyaligogi eti paga, an nakla arlenggen kiligogo o. Kit pano wene ake kinakla nggagalek welagik, weyak mende ake kinonggodek welagik, kagasumo pano. An nakla warlok. 20At Allah akoni inendainggen kambugut diligogo mende etnogo nen, at Iblis eti kiniyok nen al debelogo togot diyawagaluk ibat kinapma ʼbi wisigin werek o. Ninewe Endaganggok Yesus obabut pano etnogo nen kinanggorlem dogowak o. 21At Timotius an nagarlak nimbisak Allah ake kagako lago mende etnogo nen,
“Keyagi warinaki o,” yiluk yoknekemo nen yokisigi o. Ap nit ninunggulowak omanggiat mende Lukius inom, Yason inom, Sosipater inom, yoma nen,
“It keyagi warinako,” yiluk yoknekama nen yokisigi o. 22An Tertius, Paulus ane yisi nggorlek kolal yi mbalki mende, ninewe Endaganggok ninom kunik dogolik keyagi watkinakiat o. 23At Gayus nen an nebe woknakik, Allah aʼburi taʼbokogonat woginakik, kagake mende eti nen keyagi watkinakeat o. At Erastus o unggul nggok yoma ake uang ʼbisinem pago dogoligogo mende eti nen keyagi watkinakeat o. Nen, ninagarlak Kwartus nen keyagi watkinakeat o. 24[Ninewe Endaganggok Yesus Kristus obabut pano etnogo nen, pakisek dogowak, yiluk,
“Ebeat asuwak,” yiluk yu kak,
“Amin,” yigi o.]
Wene ilugun oba Allah pogorakike wene
25Allah pogorako doguwok o! An nen pano wene Yesus Kristus kagakike wene yokisasigi kak, at Allah obatneyak etnogo nen kinendainggen korlet kinako dogusak erlok o. Wene Allah akla wene eti, o muk pagane nen limago welagike mende, yogondak Allah nen selekmat disikemo werek o. 26Eti, it ap at ane yogisasi laguka mende yomenogo nen kolal mbalogo, selekmat disukama werekma an nen yokisasigi o. Yi akoni ndi akoni inunggulowak endaga dombok taʼbokogonat wene eti inasuk kol diluk inendainggen Yesus oba panggot diluk ane kologo kagako dogowagaluk, at Allah ikok mondok dogoligogo mende etnogo nenat,
“Wene yi akoni inilu asuwak o,” yiluk yisike. 27At Allah arligat akla mondok nggagalek dogoligogo mende o. At Yesus Kristus kagakike pasik Allah pogorako mondok doguwok o, yiluk,
“Ebeat asuwak,” yiluk yu kak,
“Amin,” yigi o.
Currently Selected:
Roma 16: DNA
Highlight
Share
Compare
Copy
Want to have your highlights saved across all your devices? Sign up or sign in
