Roma 15
15
“Kinenggaerek kinake kagakidek, kinagarlagi kinirugi inom inakla panorogo kagako dogusak,” yiluk yogisasike wene
1Nit amberek, ninendainggen korlelogo Allah oba panggot diluk werek mende nen, ninenggaerek ninake arlek ninakla panorogo kagakidek, it amberek inendainggen awanma aborlok werek mende eti, yamagiyasi dogusak o. 2-3Allah wene paga wene men yiluk kolal mbalogo ʼbisuka,
“Kat Allah mbekega mende, an noba kagat laga o,” (Mzm. 69:9=TB 69:10)
yiluk kolal mbalogo ʼbisuka eti kagat, at Kristus nen enggaerek ake akla arlenggen kasi dogigiluk kagako lagike dek. Eti paga, nit ninebe dombok nen, ninagarlagi ninirugi inom inendainggen Allah oba panggot diluk inendainggen korle atluk pano asuwagaluk, inakla panorogo kagako doguwok o. 4Allah wene kolal mbalek eti paga, ninakla mbuk agidek anggorlem welagik, ninakla pano agik, kagarigogi eti paga,
“Pano asigin,” yiluk Allah oba eberek dogowagaluk, nirat ninasuk warogo Allah wene paga pagane kolal mbalogo ʼbisuka o. 5-6Kit kinendainggen, kinane, omanggiat dogolik, ninewe Endaganggok Yesus Kristus ombae Allah etiat pogorako dogobagik nen, at Allah nen akoni inakla mbuk agidek anggorlem dogowagaluk kagarinakik, inakla panorinakik, kagarigogo mende eti nenat, kit taʼbokogonat kinendainggen omanggiat, at Kristus Yesus obabut kak kagat kinabuwak o.
“Pano wene eti, akoni sikmangge mende inasuk kolusak erlogat,” yiluk yogisasike wene
7Akoni nen at Allah pogorako dogowagaluk, at Kristus nen kit kinebe wokinakike kak, kit amberek nen it amberek woginakik, it amberek nen kit amberek wokinakik, kit-kit wok-wok kagako dogono o. 8Wene eti ake omanggi yokisak. At Kristus wagikesik nen, it Yahudi mende inowado inenggarlimo mende mbalek yomenogo inapma unggisike. Esigit diluk unggisike eti, Allah nen,
“An nen esigit diluk kagarinabigin o,” yiluk ninakombalak abok yogisasi lagike etnogo eberogonat agik, 9nen, it akoni sikmangge mende Allah nen inaʼbuwa kasike eti paga pogorakik, kagasuwagaluk, Yahudi mende inapma unggisike o. Wene eti ake Allah wene paga kolal men yiluk mbalogo ʼbisukama werek,
“Eti paga, an it akoni sikmangge mende inakla inakla dogolik kat pogot kakik, endai wako dogolik kendaga nggogot digik, kagako dogogin o,” (Mzm. 18:49=TB 18:50; 2Sam. 22:50)
yiluk yisikemo kolal mbalogo ʼbisuka. 10Omanggi men yiluk kolal mbalek weregat,
“Kit akoni sikmangge mende it Allah aʼburi at nen miginakike mende kinom kinakla arlenggen kasi dogono o,” (Ul. 32:43)
yiluk yisikemo kolal mbalogo ʼbisukaat. 11Nen, omanggi wene men yisike,
“Kit akoni sikmangge mende taʼbokogonat ninewe Endaganggok pogorakik, kinunggulowak endaga dombok nen at pogorakik, kagako dogono o,” (Mzm. 117:1)
yiluk yisukama kolal mbalogo ʼbisukaat. 12Nen omanggi at Yesaya nen men yiluk kolal mbalogo ʼbisikeat,
“O mukarekma erlo paga nen asiʼbat dukiligogo kak, at Isai nen endago mende omanggi winam asigin o. Winam asumo nen, it akoni sikmangge mende at apma dogolik, at nen panot ninabigin, yiluk at oba eberek dogogun o,” (Yes. 11:10)
yiluk kolal mbalogo ʼbisike.
13“Yabunggane pano asigin,” yiluk ninakla arlenggen kiligogi eti, erlo at Allah nenat kagat ninabigogo. Kit esigit diluk kinakla arlenggen nggokogo kasi dogowagaluk Allah Agurengge obatne paga kagat kinabuwak. Esigit diluk kagat kinabuwak nen, kinendainggen at oba panggot disigip eti paga panggot diluk werekma, at nen kinakla arlenggen mondok kasi dogowagaluk kagat kinakik, kinendainggen kambagut dinagagik, kagasuwak o.
Paulus nen, “Allah nen nayonggo ʼbisike eti paga, pano wene yogisilik noko lagi,” yiluk yogisasike wene
14Nagarlagi nirugi o. Kit kinobabut pano mondok dogolik, yi wene ndi wene kinilu mondogatma, kit-kit kinasuk wat-wat yusak erlok werek, an nilu o. 15Esigit diluk mende, at Allah obabut pano nen an nayonggo ʼbisike eti paga, wene omanggi eti surat yi paga nayuk dekogo ebet kisigi o. 16An nebe at Kristus Yesus apma dogolik akoni sikmangge mende woginabuwagaluk nayonggo ʼbisikemo, at Allah akla pano ambawagaluk Agurengge eti paga it inebe Allah ake ʼbiluk, at ane pano wene eti yogisiligogo o. 17Kristus Yesus nimbisak kunik dogolik, Allah ake pano kagako lagi o, yiluk pogorakausak erlok o. 18An nen wene ninat wene yu nayuk. At te, it akoni sikmangge mende Allah nen apma ʼbiyawagaluk, at Kristus nen nayonggo ʼbiluk wene yigik, inggi nen kagakik, kagarik wagike eti nayuk degat yigin. 19At ebe diduwagaluk yi mende ndi mende kagakik, pogorasuwagaluk yi mende ndi mende elalinat kagakik, obatnerogo kagakike eti, Allah Agurengge etnogo obatne paga kagakike o. Kagako nggorlek, an nen, o Yerusalem etoma nen dagak-mbagak mbiyokogo o Ilirikum etoma, at Kristus wene pano wene eti dikogo yogisilik wagi. 20-21Wene esigit diluk yiluk kolal yigit diluk mbalogo ʼbisukama werek,
“It akoni amberek, at abok kolkidek mende inilenggen kigik, it wene kolkidek mende nen didigik, kagasugun o,” (Yes. 52:15)
yiluk kolal mbalogo ʼbisuka ndak-ndagat yogisilik wago dogolik, it akoni amberek nen, o kerlaga ʼbilukmo an nen o ebe palu kak palunogo yiluk, an nendainggen ndurlem, akoni Kristus endaga inasuk awan kolkidekma etoma pano wene yogisilik wisigiluk ambasigi.
At Paulus nen o Roma lagaluk wene yogisasike wene
22Wene esigit diluk yogisilik noko dogolik, kibitngge-yogongge kit nilenggen kiyagaluk kinoba wisigiluk kagakonem, erlok dek arigogo. 23Mende, an o yoma dogolik kagasusak mende arat kagaki o. Eti paga, o paganeat etoma nenat kit nilenggen kiyagaluk kinoba wisigiluk nakla ambasigisikmo, yogondak arat wisigin o. 24Yogondak o Spanyol lago dogolik, kit kinobangge paklarik wisigiluk nakla ambaligogo o. Kit ʼbikiya witluk, ninom ninggi ʼbugurlagat nakla arlenggen kasi dogoluk nen, kit nen o Spanyol etoma laʼbanumo lausak ambaligogo o. 25-26It akoni o Makedonia mende inom, Akhaya mende inom, inakla eberogo it mende nandorlogo it akoni Allah aʼburi inamende dek mende o Yerusalem dogoligogi mende ʼbiyega mende werek eti paga, yogondak an nen wolok yamagiyagaluk o Yerusalem ligin o. 27It akoni Yahudi mende nen it sikmangge mende inebe pano asuwagaluk Allah wene wogisasukasikmo, it nen yabunggane dagakogo yi mende ndi mende agat oba mende yamagiyausak ndak-ndagat esigit diluk inakla nggagalogo ʼbiyega o. 28Esigit diluk arat ʼbiyega mende eti, an nen it Yerusalem mende arat wogisa lalok kalok, o Spanyol lagaluk wago dogolik, kinoba paklarik wisigin o. 29An arat ʼbikiya witluk kalok, at Kristus nen kit kinake woknikike mende taʼbokogonat wokisa wisigin ambigi. 30Nagarlagi nirugi o. Ninewe Endaganggok Yesus Kristus etiat yiluk, nit-nit naʼbuwa-kaʼbuwa dogowagaluk Allah Agurengge nen kagat ninabigogo etnogo paga, an nake ninom sembayan Allah ayonggo ninobatnerogo ʼbisi doguwogoluk yokisigi o. 31It akoni o Yudea mende inendainggen Yesus oba panggot digidek mende nen nebe ininggi paknabunogo yiluk, Allah nen ndil nabuwagaluk inom, nen, akoni Allah aʼburi o Yerusalem mende inake nandorlogo ʼbiyega mende eti, wolok yamagiya lagonem, pano waganuwagaluk inom, sembayan panorogo yisi dogono o. 32O Yerusalem lalok nen, at Allah akla nen pano ambasi kalok, an nakla arlenggen kilik kilik kinoba wisigin o. Witluk ninom dogolik, set walagin o. 33Allah nen akoni inendainggen kambugut diligogo mende etnogo, kit taʼbokogonat pakisek dogowak o, yiluk, yisi dogolik,
“Ebeat asuwak,” yu kak, Amin yiluk yigi o.
Currently Selected:
Roma 15: DNA
Highlight
Share
Compare
Copy
Want to have your highlights saved across all your devices? Sign up or sign in
