Wahyu 17
17
Kwe nggok yugunengge kagarik noko dogoligogo mende pasik yogokike wene
1-2Esigit diluk kigirik nen yabunggane, it malaikat inebe 7 paga nen Allah akla agaga i kenago negen wolok ndiyalka yomenogo mende omanggi wagasik nen, men yokneke,
“It akoni o kota Babel mende, kwe nggok yugunengge kagarigogo mende negen eti, i nggokndek mende aik oba werekma, ap nggokndek inendaganggok agat oba mende nen at inom yogot kagakik, akoni amberek anggur ambusu nasi mondok dogolik, kunu-gunu arigogi eti kak, akoni agat oba mende nen at inom yogot kagako mondok welagik, kagarigogi mende eti, at Allah nen kwe eti wene oba ʼbiluk ebe weyagat digiluk awim nggaʼbelke mende yokisik nen eme o,” yiluk yokneke.
3Esigit diluk yoknokonem, Allah Agurengge noba duk yi wagama, at malaikat etnogo nen woknarek, o akoni dekma limo laga. Esigit diluk woknarek lagama etoma dogolik, lakigi mende, kwe etnogo kelo yengge negen nggok isi morla mbemut negen mende ambot oba yasukogo lagonem lakigi. Kelo yengge negen eti unggulowak, 7 paga, nen, aik unggulowak oba, 10 paga wulabek, nen, ebe obangge, Allah endaga wiyik-weyakogo kagarigogo mende kolal nggirlik-nggerlekogo mbalek mende lakigi. 4Nen, kwe eti iyom omanggi elokonggen morla mbemut negen, nen, omanggi elokonggen nggiʼbi-nggiʼbi warek negen, mende yugu. Nen, obanggengge emas mende inom, nggit enggen mbunundek onggo dogalegat mbaligogi mende endaga permata inom, mutiara inom, waganek dogolik, obabut weyak kagakik, yogot paʼbuwagaluk kagakik, esigit diluk yugunat ya kagakik liligogo mende eti, iyak emas mende paga kenago inggimo pago welaga lakigi. 5Nen, wene ebe limago mende il kawak oba kolal yigit diluk mbalek,
Akoni agat oba mende yugunat ya kagakik liligogi mende inom, inobabut nggorlo mondok weyak kagarigogi mende inom, taʼbokogonat inagoya endaga Babel nggok yi, yiluk kolal mbalek welaga lakigi. 6Nen, kwe eti nen, Allah aʼburi inom, Yesus ane yogisilik liligogi mende inom, inakike mende inamep nenggesik, akoni nen anggur enggen ambusu nalok kunu-gunu arigogi kak, kunu-gunu agasikmo lakigi.
Esigit diluk lakigirik nen mondok pogoraki. 7Esigit diluk kigirik, pogorako lagima, malaikat etnogo nen men yokneke,
“Nenaluk pogorarigogon? An nen, kwe eti inom, kelo yengge negen unggulowak 7 paga, nen, aik unggulowak oba 10 paga nen wulabek mende, ambot oba kwe eti yasukogo werekma wolok liligogo mende eti inom, imbisak inake wene limago werek mende mbilelogo yokosik o. 8Kelo yengge negen kegen eti, alep iluk welagike mende, yogondak eloke dek kegen eti wema paga akoni watlatluk wusiligogoma nen dagi wisigin o. Dagi wago kalok, Allah nen weyagat digin o. Nen, Allah nen mbogot agat awan winamet digidek dogolik, buku it akoni iniluk mondok dogowagaluk panorinabigin mende inendaga kolal mbalek eti paga, it amberek inendaga kolal mbalek dek mende nen kelo yengge negen eti, inilenggen kalok, it nen,
Kelo yengge negen yi, alep welagikesik nen, eloke dek agike mendeat, yabunggane winam aga yi, ninayuk o, yiluk pogorasugun o. 9Nen, wene yokisigin yi pasik, inakla nggagalek werek mendeat didusak o. At kelo yengge negen eti, unggulowak ebe 7 paga nen kegen eti ebe, ndom ebe 7 paga, at kwe eti nggok dogoligogoma werek mende kegen o. Nen, omanggi, ap nggokndek inendaganggok inebe 7 paga nen werek mende pasik kegen o. 10Nen, it nggokndek inebe 7 paga nen eti mende, inebe 5 arat nggobokogo wusegama, inebe mbere werek mende eti, omanggi arat nggok dogolik, akoni apma ʼbiyalok pagisek werek. Nen, omanggi awan wagidek werek. Yabunggane witluk at nen akoni apma ʼbiyalok pagisek mondok dogogin dek o. At te, inggi mbererlagat dogogin o. 11Kelo yengge negen alep welagike mendeat, eloke dek eti, ebe nggokndek inebe 7 paga nen yomenogo arat nggobokogo wusilik-wusilik wago lagakasik, it 7 eti mende omanggi yabunggane suguluk nggok atluk, ininggi wenago 8 negen kagat latluk, yabunggane Allah nen weyagat diyagin mende kegen o. 12Nen, aik unggulowakma 10 paga nen wulabek kegen eti ebe, ap inebe 10 paga nen nggok asugun mende awan werek mende kegen mende, it nggokndek mendiyamo, at kelo yengge negen etnogo inom, o mo il omanggiat, satu jam negenat nggok dogolik, akoni pagisek dogogun mende kegen o. 13It eti inendainggen omanggiat dogolik, at kelo yengge negen etnogo yogoko dogolik,
Nit nggokndek dogowagaluk mendinanggama ninendaganggok werek mende eti, karat kendaganggok dogonok nen yiluk indewerek ʼbagago o, yiluk yogoka. 14Esigit diluk indewerek ʼbiluk, Domba Eyak etnogo wim inom abuwogoluk kagasugun mende, at Domba Eyak ebe akoni nggokndek mende inom, mondok inendaganggok mende inom, taʼbokogonat inewe endaganggok siyalek aratma, aʼburi miginakesik inayonggo ʼbiyekemo inobabut at ake kumbukogo kagarigogi mende yomenogo, at werekmangge atluk, inom nen, at kelo yengge negen etnogo agoromi inom inobatne deget diyagun o,” yiluk yokneke.
15At malaikat etnogo nen esigit diluk yoknekesik, omanggi men yokneke,
“At kwe yugunengge kagarik liligogo mende negen eti, ebe nggok dogoligogoma i kegen eti ebe, akoni taʼbokogonat inunggulowak endaga dombok, inowado dombok, inaguma dombok, inane dombok mende kilenggen iyegen o. 16Nen, aik unggulowakma 10 paga wulabek kegen etnogo inom, kelo yengge negen ebe etnogo inom, imbisak nen, kwe yugunengge kagarik liligogo mende eti inaʼirat atluk, at mende yi mende ndi mende korligik, ebe al mbalegat togot diyigik, ebe warogo abel pelak nasi dogolik, abel pelak kali kun diyagin o. 17Esigit diluk kagasugun eti, Allah nen yisike mende ndak-ndagat kagat lasuwagaluk, at akla ambaligogo mende eti, it ap nggokndek eti inakla nggagalkemo, it inendainggen omanggiat dogolik, it nen, at kelo yengge negen etnogo yogoko dogolik,
Nit ninendaganggok welago mende eti, kat kendaganggok werek dogonok nen o, yiluk indewerek ʼbiluk, inom nen kwe yugunengge kagarik liligogo mende etnogo ebe wasugun o. 18Nen, kwe mende kilenggen kegen eti, ebe ap nggokndek inendaga nggok agat oba mende taʼbokogonat apma ʼbiyalok pagisek werek mende, o kota nggok mende yiligogi etnogoat kilenggen kegen o,” yiluk yokneke.
Currently Selected:
Wahyu 17: DNA
Highlight
Copy
Compare
Share
Want to have your highlights saved across all your devices? Sign up or sign in
