Wahyu 18
18
Akoni o Babel mende olin ndamul inakonem ilenggen lakasike wene
1Esigit diluk yoknekesik oba nen yabunggane, at malaikat ninat mende omanggi mbogot oba nen wusa wagonem lakigi. At eti obatneyak dogolik, isagal yibarlogo liligogo kak, aʼbigil yago akoni agat oba mende taʼbokogonat inoba yibarlogo ʼbisi laga kigi. 2-3Esigit diluk wusa wagasik nen ane nggokogonat men yogiseke:
“O kota nggok Babel etnogo mondok dek kagarogo ʼbigi o! Mondok olin damulogo ʼbigi o! It kota Babel dogoligogi mende etnogo, kwe yugunengge kagarigogo mende negen ma, kwe etnogo nen oba aganggen dagasinem,
Kagat nabini, yiluk, akoni inunggulowak endaga dombok taʼbokogonat, anggur ambusu wogisasinem nalok kunu-gunu arigogi eti kak, kwe nggok yugunengge kagarik liligogo mende etnogo, ap nggokndek inendaga nggok agat oba mende, yogisasinem, inom kagako lagaka o. Nen, at kwe et oba aganggen dagasinem paʼbuwagaluk obabut kagarigogo eti paga, akoni agat oba mende yi mende ndi mende onggo mbaliligogi mende ininggiwerek kagarasi lagakaat. Esigit diluk kagako lagaka mende, yogondak arat olin ndamul inaka yi, keik! Esigit diluk olin ndamul inakama, Iblis agoromi inom, kugi obabut weyak mende inom,
Sewe nausak dek yiluk agorlerarigogi mende taʼbokogona inom, it inaguma kagat laga o,” yiluk yogiseke.
4-5Esigit diluk yogisekesik oba nen yabunggane, at Allah ane mbogot oba nen men yeke,
“Akoni nen, yi mende ndi mende ombo wema oba dik-dukogo ʼbilik dagiligogi kak, it akoni nen, at kwe eti inom weyak kagako mondok dogoligogi mende eti, mbogot oba mot-mot dagekemo, an Allah nakla eberek mondok werek eti paga, an nen it wene inoba ʼbiluk weyagarinabigit It weyagarinako dogolik, kit an naʼburi mende it kinom dogolik, it inobabut waganogo weyak kagasumo kinom weyagat kinabunogo nen, it togot diyalok lo duki witni o. 6Nen, kit nen, at kwe eti, wene oba ʼbugun mende nen, at nen it kagarinako laga kagat, wene ebe oba ʼbisi dogolik, omanggi inomat oba dukogo ʼbino o. Nen, at nen i melagisasi laga eti kak, anini inoba ʼbisi laga mende eti onggo wene oba ʼbisi dogolik, omanggi inom oba dukogo ʼbino o. 7At kwe eti enggaerek nen yisi dogolik,
An nebe kwe nggok dogolik, akoni napma ʼbiyalok pagisek dogolik, soge ʼbanggama nen nakla weyak atluk de ako dogogin nogo? Dek o, yiluk yi mende ndi mende oba kiyakogo dogolik enggaerek nen nggokogo pogorakasi mondok werek eti kagat, kenet nggokogo wako dogolik, akla weyak atluk de ako dogowagaluk wene wogotno o. 8Esigit diluk ambaligogo eti paga, an Allah nobatneyakma, omanggi pasigat u nggok inom, kimbiri no inom, wogotluk nen, ebe o kali ʼbumo nasinem akoni amberek inakla weyak atluk de ako dogogun o,” yiluk mbogot oba nen yisinem nasuk kolki.
9At kwe eti, esigit diluk ebe kali nasi nggorlek, isi sode dagisinem, it ap nggokndek inendaganggok agat oba dogoligogi mende, at kwe eti oba aganggen dagisinem, sebeluʼbuk yogot paʼbuwagaluk kagakonem, kagako lagaka mende yomenogo nen inilenggen lakalok, at arle di ako de ako kagako lagaka. 10At arle de esigit diluk ako dogolik,
“At weyagat dekemo kenet warigogo eti, nit ninom weyagat ninakonem kenet wasunogo,” yiluk inayuk nen inebe walegat ndiyokogo mendek dogolik, de yigit diluk ako lagaka:
“At Allah nen, kit akoni o Babel mende kinobatne korleyak etnogo, il omanggi pasigat satu jam negen, wene kinoba ʼbiluk weyagat kinake eti, iya, iya,” yiluk de ako lagaka iyigi.
11It esigit diluk de ako nggorlek, it akoni yi mende ndi mende onggo kunigogi mende nen, men yisi lagaka,
“Ninamende yi mende ndi mende wolok lalok, it akoni o Babel mende inoba onggo mbaligogi mende etnogo, yabunggane sani inoba onggo waganggo dogogun,” yiluk inarle di ako de ako kagako lagakaat. 12Esigit diluk de ako dogolik,
“Yi mende ndi mende eti, ebe onggo nggogat mbaligogi mende emas inom, perak inom, nggit enggen onggo nggogat mbaligogi mende endaga permata inom, mutiara inom, su kain sutera inom, lenan inom, elokonggen, morla mbemut negen inom, nggiʼbi-nggiʼbi warek negen inom, o obasi pano mende inom, wam negen endaga gaja aik mende yi mende ndi mende kagarigogi mende inom, o yi mende ndi mende onggo nggok mbaligogi mende kagakik, tembaga mende kagakik, andugun mende kagakik, nggit endaga pualam mende kagakik, kagarigogi mende inom, 13obasi pano mende nggami inom, kinde negen inom, dibongga negen inom, o mur ambusu inom, kemenyan ambusu inom, anggur enggen ambusu inom, minyak goreng inom, tepung wul salek etnogo mende inom, gandum inom, sapi inom, kuda inom, domba i nom, oto negen endaga kereta inom, akoni inebe inanduwanengge dogowagaluk inom, taʼbokogonat wolok lalok, sani inoba onggo mbalko dogogun,” yiluk de ako lagaka. 14Esigit diluk de ako dogolik, it Babel mende men yogisega,
“Yi mende ndi mende kit kinendainggen warlok mende dek agik, yi mende ndi mende oba kiyakogo dogolik, kinakla arlenggen togo dogoligogi mende dek agik, kagakemo, kit nen yabunggane kweyago waganusak mondok erlok dek aga o,” yiluk yisi lagaka. 15Esigit diluk yegasik, it akoni yi mende ndi mende onggo sabusogo it Babel mende inoba saburasi lagaka mende yomenogo nen,
“It akoni o Babel mende yi aik ndi aik kagarinake eti kak, nit esigit dilugat kagat ninabunogo,” yiluk inayuk nen inebe walegat ndiyokogo mendek dogolik, inarle de ako dogolik, men yisi lagaka,
16-17“Kit Babel mende kiniyom kain lenan su mende elokonggen morla mbemut negen mende inom, nggiʼbi-nggiʼbi warek negen mende inom, yiʼbiluk, kinobanggengge emas mende inom, nggit enggen onggo nggogat mbaligogi endaga permata mende inom, mutiara mende inom, waganigogi etnogo, il omanggi pasigat satu jam negen arat dek aga yi iya, iya,” yiluk inarle di ako de ako kagako lagaka.
It esigit diluk yisi nggorlek, it akoni nggu nggok mende endaga kapal wolok liligogi mende ineugi ap nggokndek inom, inagoromi nggu warigogi mende inom, it akoni amberek wogisek liligogi mende inom, it amberek i laut yenggelekmangge yi mende ndi mende kweyarik liligogi mende inom, taʼbokogonat, it akoni Babel mende inebe kali nasinem inisi sode inilenggen lagik walegat ndiyokogo mendek dogolik, men yisi lagaka,
18-19“Iya, nayuk o. O kota akoni Babel mende inago unggul yi negen, o yi ai ndi ai amberek werek nogo? Mondok dek o,” yiluk wul mende ʼbisi negen inunggulowak oba yikogo inarle de ako dogolik men yisi lagaka,
“Eku, inaʼbuwa o. It akoni o Babel mende inamende yi mende ndi mende dogalegatma, nit ninanggu onggo mbalogo nininggiwerek kagat ninabigogi etnogo mende, il omanggi pasigat satu jam negen dek agaka yi inaʼbuwa o,” yiluk yisi lagaka. 20Esigit diluk yisi nggorlek, at omanggi nen, it Allah aʼburi mende men yogiseke,
“Allah nen, kit kinonggo, it o Babel mende wene inoba ʼbiluk weyagarinake eti paga, kit mbogot oba mende taʼbokogonat kinakla arlenggen kigik, kit Yesus nen kinayonggo ʼbiluk laʼbinagisike mende inom, kit at ane yogisaligogi mende inom, kit Allah aʼburi amberek inom, kit taʼbokogonat kinakla arlenggen kigik, kagatni o,” yiluk yisinem kolki.
21Esigit diluk yisinem kolkirik oba nen, yabunggane at malaikat obatneyak mende omanggi wagasik nggit nggok yi mende ndi mende ndameligogi mende negen mende mbo wukogo i laut yenggelekma wusa ʼbi wago dogolik men yeke,
“At Allah nen kit akoni o kota Babel mende yigit dilugat obatnerogo mbo wusa ʼbinagagin o. Esigit diluk wusa ʼbinagumo yabunggane akoni nen inilenggen kiyagun mondok dek o. 22-23Akoni o yi ai ndi ai onggo kunigogi mende, inendaga dek negen mende, ap kit mendeat, inendaga werek welagaka o. Nen, kit nen kinausa mende paga akoni yi ai ndi ai inunggulowak endaga dombok, kinenggalat nukerinako lagabat. Esigit diluk kagako lagap mende, it akoni gitar warigogi mende inom, endai warigogi mende inom, donggop elo perlelogo pukiligogi eti kak pukiligogi mende inom, pinggon nggok mende ane pukiligogi mende inom, yabunggane wakonem ane kolugun degat. Nen, ap omanggi yi mende ndi mende inggimo korleyak kagarigogo mende kagakonem inilenggen kugun degat. Nen, inambiri gandum enggen mende sagalkonem nggit ane yiligogo mende eti, yabunggane ane yisinem inasuk kolugun degat. Nen, kinagisagal amulok inilenggen kugun degat. Nen, ap nen kumi woginakonem inakla arlenggen togo inane yiligogi mende inasuk kolugun degat o,” yiluk yisinem kolki.
24It akoni o kota Babel mende nen, akoni Allah wene yogisiligogi mende inom, Allah aʼburi amberek inom, inamep wulabogo inakik, it akoni amberek agat oba inaka mende taʼbokogonat, it nenat inakik, inakukasikmo nogo nen, inamep ininggi agut oba werek eti paga, Allah nen wene inoba ʼbiluk, weyagarinake o.
Currently Selected:
Wahyu 18: DNA
Highlight
Copy
Compare
Share
Want to have your highlights saved across all your devices? Sign up or sign in
