Wahyu 16
16
Allah nen akla agaga inoba ʼbiluk weyagarinakonem lakasike wene
1Esigit diluk lakigirik oba nen, yabunggane, Allah ago palekma etnogo nen, at ane nggokogo it malaikat inebe 7 paga yomenogo men yogisasinem nasuk kolki,
“An Allah nakla agaga i kenago negen iyak ebe 7 paga kenago mende eti, ndiyalogo akoni agat oba mende inoba wusa ʼbi lani o,” yiluk yogisasinem kolki.
2Yogisekemo, it malaikat inebe 7 paga yomenogo mende omanggi alebagik Allah akla agaga i kenago negen etnogo mende omanggi ndiyalogo akoni agat oba mende inoba arat wusa ʼbi wagonem, it akoni pelakngge amberek taʼbokogonat inakla enggerlogo, kelo yengge nggok etnogo endaga kolal mbalek etnogo waganggik, inendainggen ngganengge ebe at negen alino kagarek etnogo oba panggot digik, kagaka mende, u mbot weyak mende inobangge duki wago laga lakigi.
3Esigit diluk kigirikmo nen, yabunggane it malaikat inebe 7 paga yomenogo mende omanggiat nen esigit diluk arat wusa ʼbi wagasik oba nen, omanggi nen Allah akla agaga i kenago negen etnogo mende omanggi ndiyalogo i laut yenggelek oba wusa ʼbi wagonem, i elokonggen akoni inakonem inamep negen kagat lago dogolik, yi mende ndi mende i laut yenggelek akla iluk dogoligogo mende taʼbokogonat watlarik lago laga lakigi.
4Esigit diluk kigirik oba nen, yabunggane, it malaikat yomenogo mende inebe mbere nen esigit diluk wusa ʼbi wagakasik oba nen, omanggi nen Allah akla agaga i kenago negen etnogo mende omanggi ndiyalogo i elesimongge inom, nen i ebe nggok asi wirigogomangge inom, obangge wusa ʼbi wagonem, i taʼbokogonat elokonggen mep ago laga lakigi. 5Esigit diluk kagat lagonem, at malaikat i indewerek mende nen Allah men yogoke,
“Allah kebe alebat welagagindik, yogondak kikok mondogat dogolik, nggaʼberek mondok dogoligogon mende nen, wene motogonat inoba ʼbegen o. 6Nen, it ap eti nen, kat kaʼburi inom, kat kane yogisiligogi mende inom, inamep wulabogo inakukasikmo, mep nowagaluk wogisegen eti, inobabut oba motogonat wogisegen o, nombae,” yiluk yogoko laga nasuk kolki. 7Esigit diluk yogokesik oba nen yabunggane, Allah anggo warogo kali kunigogoma nen ane omanggi men yisinem kolki,
“Allah kobatneyak yi mende ndi mende kagasusak arlek dogolik, wene inoba ʼbigik, nggokik, eberogonat motogonat yiligogon etnogo nen, esigit diluk kagaken o, nombae,” yiluk yisi laga kolki.
8It malaikat yomenogo inebe kenagan oba nen arat esigit diluk wusa ʼbi wagakasik oba nen, omanggi nen Allah akla agaga i kenago negen etnogo mende omanggi ndiyalogo mulinggi oba wusakonem, mo aik nen akoni inoba kali yagalinako dogowagaluk, mo aik weyak kagarogo ʼbekemo, akoni inoba kali yagalinako laga lakigi. 9Esigit diluk aik nen kali negen inoba nggokogo nasinem kenet wako dogolik, Allah akla agaga inoba ʼbiluk weyagarinabusak ndak-ndagat weyagarinako laga mendeat, at ebe pogorasuwogoluk weyak kagako lagaka mende togot diyalok, inobabut kwalagidek dogolik, it nen,
“Allah ebe ninggit latlep a,” yiluk Allah endaga mondok weyagat disi lagaka iyigi.
10It malaikat yomenogo inebe 4 nen arat esigit diluk wusa ʼbi wagakasik oba nen, omanggi nen Allah akla agaga i kenago negen etnogo mende omanggi ndiyalogo kelo yengge negen nggok etnogo nggok mende dogoligogoma obalikmo wusa ʼbi wagonem, o at nggok dogolik pagisek dogoligogoma taʼbokogonat amum ago laga. Esigit diluk amum agonem, it akoni kenet wako dogolik, inaʼbi inaik nen kun diluk, men yisi lagaka,
“Ninagalumo aik weyak yoma ninaʼit o,” yiluk 11inobabut inikogat dogolik weyak kagako lagaka mende togot diyalok inobabut kwalagidek dogolik, it nen,
“Allah ebe ninggit latlep a,” yiluk Allah mbogot oba mende endaga mondok weyagat disi welagaka iyigi.
12Esigit diluk werek nggorlek, it malaikat yomenogo inebe 5 nen esigit diluk arat kagakasikmo nen, omanggi nen, Allah akla agaga i kenago negen etnogo mende omanggi ndiyalogo, it ap inendaga nggok o mulinggi dagi wirigogoma timur mende wisuwagaluk, i nggok endaga Efrat oba wusa ʼbi wagonem, it wisugunmongge i ebe ʼberok yisi laga. 13Esigit diluk ʼberok yekesikmo nen, yabunggane, warlo etnogo inom, kelo yengge negen nggok etnogo inom, Allah wene yogisaligogo mende salek enggalat yiligogo mende etnogo inom, inambema nen kugi inobabut weyak mende inebe 3 paga purlukak salek mende duki wago laga. 14Kugi eti inebe Iblis agoromi mende akoni inoba duk yi wagonem kagasusak dek mende elalinat kagarigogi mende etnogo o. It esigit diluk duki wagakasik nen, Allah obatneyak dogolik yi mende ndi mende kagasusak arlek etnogo ago wisigin etnogo paga wim inom abuwogoluk, ap inendaga nggok o yi ai ndi ai nandorinabuwogoluk, wim yonggo lago lagaka kigi. 15Esigit diluk lagakasikmo nen, at Yesus nen men yokneke,
“Kasuk kolin o. Akoni inil arurlu waganuwogoluk limago wirigogi eti kak, an esigit dilugat wisigin o. Esigit diluk wagonem, akoni inal mbalek werekma inenggarli arigogi eti kak, kit esigit dilugat kinenggarli asunogo yiluk kiniyom ibat yikawogoluk nggarelogo ʼbiluk dogogun kalok, Allah nen panot kinakonem kinakla arlenggen asugun o,” yiluk yoknokonem kolki. 16Nen, it at Iblis agoromi inobabut weyak mende yomenogo nen, it ap nggokndek yomenogo, o it akoni Ibrani mende inane paga endaga Harmagedon yiligogoma eti nandorlogo ʼbiyasinem lagiyigi.
17Esigit diluk kigirik oba nen, yabunggane, it malaikat yomenogo mende inebe 6 oba esigit diluk arat kagakasik oba nen, at omanggi nen, Allah akla agaga i kenago negen etnogo mende omanggi ndiyalogo mbogot abelmangge oisa werekmangge wusa ʼbi wagonem, Allah ago palekma at nggok dogoligogoma obalikmo nen ane omanggi nggokogo men yeke:
“Ilugun oba arat kagat laga o,” yiluk yeke. 18Esigit diluk yisinem, o yabok alep-yabungga ʼbigal kigik, mbogot ane subuk yiluk nen ane luk-luk lagik, yugul nggok inayuk mende akoni Allah nen winamet diyasike kurli nen yogondak kurli, yugul eti negen omanggi aborlok luk-lagat kigidek mende etiat aborlok luk-lagat kigik, kagako laga lakigi. 19Esigit diluk kagakonem, o unggul nggok etnogo agat nggaukogo kenagan minggikogo kagat lagik, akoni inunggulowak endaga dombok Allah ebe inonggodek mende inaguma unggul dombok taʼbokogonat tibik-tebekogo olin ndamelagik kagat lagonem, Allah nen,
“An nakla agaga ambik anggur ambusu kenago negen etnogo, at o Babel nggok etnogo wogosigin,” yiluk abok yogokike mende eti, Allah akla ebekesik nen, wogoko laga kigi. 20Nen, agat i enggen mbalekmangge taʼbokogonat inom, ndom taʼbokogonat inom, dek agik, 21mbogot oba nen miyo kodanggen nggok mende ebe dombok anggin, 50 kilo mende wusa wago dogolik, akoni inebe inakik, kagako laga. Esigit diluk inakonem, it nen yisi dogolik,
“Miyo kodanggen weyak ninarigogo yi, Allah ebe ninggit latlep a,” yiluk endaga weyagat disi lagaka lagiyigi.
Currently Selected:
Wahyu 16: DNA
Highlight
Copy
Compare
Share
Want to have your highlights saved across all your devices? Sign up or sign in
