Wahyu 15
15
Allah nen akla agaga ilugun nggobokogo akoni inoba ʼbiyagin mende malaikat inebe 7 paga wogisasinem lagiyasike wene
1Nilenggen esigit diluk lakigirik oba nen, yabunggane, akoni nen diduwagaluk, elalin mende omanggi nggok inayuk mende negen yigit diluk mbogot oba nen winam agonem lakigi. Ilugun nggobokogo Allah akla agaga inoba ʼbiluk weyagarinabigin eti paga, ininggi 7 paga weyagarinabigin mende, malaikat inebe 7 pagaat winam agonem lagiyigi. 2Esigit diluk kigirik oba nen, yabunggane, i laut elokonggen mirli wukagi negen kindu inom dambuk-pambukogo yenggelek mende lakigi. Esigit diluk kigirik, lakigi mende, akoni amberek inendainggen kelo yengge negen etnogo inom, ngganengge at ebe negen alino kagarek etnogo inom, inoba panggot diluk pogorinakidegat, nen endaga ininggi wenago kolal mbalek mende etnogo waganggidegat, kagako lagaka paga inobatne agakasik, pinggon gitar negen Allah nen wogisekemo ininggimo wolok, i laut yenggelek eti, yimbitla mendek werekma lagiyigi o. 3-4Esigit diluk dogolik, endai at Musa Allah anduwanengge etnogo inom, Domba Eyak etnogo inom, imbisak inendai wako dogolik men yisi lagaka,
Yieu, waeu, yeeeu
“Allah ninombae, .......................... yeeeu
Kat kobatneyak dogolik, .................... yeeeu
Yi mende ndi mende kagasusak arlek, ........ yeeeu
Elalin nggokogo inayuk mende arlek kagarigogon, ... yeeeu
Kat yi akoni ndi akoni inombae Kendaganggok dogolik, ......................................... yeeeu
Motogonat kagarinabigogon, .................. yeeeu
Pano arlek kagarinabigogon, ................. yeeeu
Ninombae, ................................... yeeeu
Ninombae Kendaganggok kat karligat nggaʼberek dogolik, ......................................... yeeeu
Akoni wene inoba ʼbigik, nggokik, kagako dogolik, ..... yeeeu
Akoni taʼbokogonat inil oba, ................. yeeeu
Eberogonat mondok kagaken, ................... yeeeu
Akoni inunggulowak endaga dombok taʼbokogonat, yeeeu
Kapma unggi witluk, .......................... yeeeu
Inindibagal yunggulogo, ...................... yeeeu
Pogot kakik, keyagi watkakik, kagakonem, ..... yeeeu
It akoni sani kak nen kat inayuk dek dogolik, yeeeu
Pogot kakidek puk asusak, .................... yeeeu
Dek,” ....................................... yeeeu
yiluk endai wako lagaka nasuk kolki.
5Esigit diluk iyigirik oba nen, yabunggane mbogot oba Allah ago palekma su kuwalagonem akla, at Allah ebe werek yiluk, ago su mende palek etnogo werekma lakigi o. 6Esigit diluk su kuwalek werekma, it malaikat inebe 7 paga iniyom nggut sobalek aʼbigil weyak mondok endaga lenan yugu, nen, sin yirigogi kak, emas mende inamigowak oba yugu mende, Allah nen inggi 7 paga akoni weyagarinabigin mende wolok duki wagaka lagiyigi. 7Esigit diluk duki wagakasikmo, it Allah nen winamet diyasike mende iniluk dogoligogi mende inebe 4 yomenogo omanggi nen, iyak ebe 7 paga emas mende kagarek oba Allah iluk mondok dogoligogo mende akla agaga i negen kenago mende, Allah nen it malaikat inebe 7 paga yomenogo wogisasi laga lakigi. 8Wogisasinem, Allah ago palekma etnogo Allah obatneyak pogorarigogi mende inayuk negen etnogo kindu sode negen nggerlek agama, it malaikat inebe 7 paga yomenogo nen Allah nen akoni weyagarinabigin etnogo ilugun kurli paga dek agidek werek nggorlek, akoni amberek Allah ago palekma eti, unggisi lagaka iyigi mondok dek o.
Currently Selected:
Wahyu 15: DNA
Highlight
Copy
Compare
Share
Want to have your highlights saved across all your devices? Sign up or sign in
