Wahyu 14
14
At Domba Eyak inom, aʼburi ndil inakike mende inom, lagiyasike wene
1Esigit diluk lakigirik oba nen, yabunggane lakigi mende, at Domba Eyak etnogo ndom Sion oba mendek werekma lakigi. Eti, at ebe inom, it akoni inebe 144.000 paga, at Domba Eyak ombae imbisak inendaga it eti inebe dombok inil kawak oba kolal mbalek mende, inom werekma lagiyigi. 2Esigit diluk dogolik, inane i ndundunmo wusasi dogolik ane negen yigik, mbogot ane nggokogo yiligogo negen yigik, it akoni gitar warigogi mende nen ebe wakonem ane yiligogo kak yigik, mbogot oba nen inane dogalegat yisinem nasuk kolki. 3Esigit diluk inane dogalegat yisi dogolik, it Allah nen winamet diyasike mende amberek inebe 4 oba yomenogo inom, ap inarluwendek yomenogo inom, Allah ebe nggok dogoligogo mende obalikmo werek nggorlek, inil oba endai ngget mende yanggulogo it akoni pelakngge yanggul uʼbuk inonggodek mendeat, it akoni inebe 144.000 agat oba nen arat ndil inake mende yomenogo inarligat inilumo endai wako lagaka inane kolki. 4-5It akoni eti inebe, nggarelek doguwogoluk, kumi inom noge yigidek dogolik, inambe paga nen inenggalat omanggi yiligogi degat, nen, akoni amberek nen,
“It eti weyak omanggi kagakama,” yiluk wene inoba ʼbusak degat mende, kimbiri yungguk mende alebagik endarigogi eti kak, Allah nen yi akoni ndi akoni inakla nen nggigilogo inonggo mbalinakikemo it inebe Allah Domba Eyak imbisak ʼbakalok, Domba Eyak etnogo kolak nggomangge lago kalok omborlik liligogi mende iyigi o.
Malaikat inebe 3 paga lagiyasike wene
6Esigit diluk kigirik oba nen, yabunggane at malaikat omanggi wene pano wene mondok dogogin mende akoni agat oba mende inunggulowak endaga dombok, inane dombok, inowado dombok, inaguma dombok, yogisilik ombo mbogot oba walegat putluk lagonem lakigi. 7Esigit diluk putluk noko dogolik, ane nggokogo men yisi laga,
“Ninombae Allah nen wene inoba ʼbigik, nggokik, kagasigin etnogo, arat panggok yi waga eti paga, Allah mbogot inom, agat inom, i laut yenggelek inom, i elesi agi taʼbokogonat inom, walkasike mende etnogo kinayukogo dogolik, kinendainggen at oba panggot diluk pogorako dogono o,” yiluk yisi laga lakigi. 8Esigit diluk yekesikmo nen yabunggane, at malaikat omanggi wagasik, ane men yisinem nasuk kolki,
“Akoni amberek nen it amberek sinuknuk atluk, inoba aganggen nen yogot paʼbiyasi dogowagaluk anggur ambusu wogisiligogi eti kak, it akoni o kota Babel mende inoba aganggen nen akoni inunggulowak endaga dombok inom yogot paʼbiyasi dogowagaluk, inakla nggagaligogi mende etnogo, inebe arat olin warogo sebelinaka, keik!” yiluk yisinem kolki. 9It malaikat inebe mbere esigit diluk yegasik oba nen, inomborlik malaikat omanggi wagasik, nen, ane nggokogo men yisinem kolki,
“Kit amberek kelo yengge negen nggok eti inom, ebe negen alino kagarek eti inom, kinendainggen inoba panggot diluk pogorinakesip, kinebe sirlorogo at endaga mbalek kinil kawak oba a? Kininggi paga a, waganggep mende, 10akoni nen, i inom dambukogo dek, anggur enggen ambusu arle weyak kenarigogi eti kak, Allah akla agaga kit kinaʼbuwa kigidek, wene obatnerogo kinoba ʼbigin o. Esigit diluk kinoba ʼbiluk, nit malaikat Allah ake dogoligogi mende inom, Domba Eyak etnogo inom, ninil oba kinebe, kindu inom, kondali al negen obasi weyak mende endaga belerang inom, niligogoma etoma laʼbinagumo, kenet wako mondok dogogun o. 11Eti, kit kinendainggen kelo yengge negen eti inom, ngganengge at ebe negen alino kagarek eti inom, inoba panggot diluk pogorinakesip, kinebe sirlorogo endaga mbalek waganggep mende esigit diluk laʼbinagumo, dinggagane kibanggone mondok, set walogo pano omanggi welagidek, kinoba kindu aik nen kenet wako nggorlek, kinowado paga sode dagasi mondok dogogin o,” yiluk yisinem kolki.
12Wene nggok kagasusak yi. Allah aʼburi at ane kologo motogo kagako dogolik, kinendainggen Yesus oba panggot diluk werek mende eti, kinendainggen sebekogo kinobakanini kambuk yiluk dogusak o.
13Wene esigit diluk yiluk yisinem kolkirik oba nen, yabunggane, mbogot oba nen ane men yoknokonem nasuk kolki,
“Yogondak akoni ninewe Endaganggok inom kunik dogolik, at ake pano kagakonem inasugun mende, inakla mondok arlenggen kugun o, yiluk kolal mbalogo ʼbino o,” yiluk yoknokonem Allah Agurengge mbogot oba nen ane nggokogo men yokneke,
“Eti eberogonat o. It akoni eti Yesus ake set wiyik-weyakogo yabu kagarigogi mende eti ebe kagaka mende wolok lugun eti paga, set pano walugun o,” yiluk yoknokonem nasuk kolki.
“Agat oba ai yago mende enggen arat korle agama mbalusak werek,” yiluk yisuka wene
14Esigit diluk yoknekesik oba nen, yabunggane, mbogot ket werekma, ebe abat endak lasi wagike mende etnogo negen mende nggare-nggare emas mende unggulowak oba yugu, nen, mbirok nggorlo mende enggat weyak mende inggimo wolok ebe oisa etnogo paga korek werekma lakigi. (Dan. 7:13) 15Eti omborlik, at malaikat omanggi Allah ago palekma nen duki wagasik, ane nggokogo, at oisa paga korek werek mende etnogo men yogoke,
“Agat oba enggen arat korle agama ebe mbalusak oba arat asi wagama eti paga, kambirok eti wolok, yogondak enggen mbali wusan o,” yiluk yogokemo, 16at oisa oba korek werek mende etnogo nen ambirok etnogo wolok agat oba enggen mbali wusa waga lakigi.
17Esigit diluk kigirikmo nen, yabunggane, at malaikat omanggi mbogot oba Allah ago palekma nen, ambirok nggorlo mende enggat weyak mende wolok duki wagonem lakigi. 18Esigit diluk lakigirikmo nen, yabunggane, at malaikat omanggi kindu indewerek mende Allah anggo kali kunigogoma nen wagasik, at malaikat ambirok nggorlo mende enggat weyak mende wolok wusa waga mende etnogo ane nggokogo men yogokonem nasuk kolki,
“Agat oba anggur enggen arat korle agama mbalusak werek eti kambirok eti wolok enggen mbali wusan o,” yiluk yogoke. 19Esigit diluk yogokemo, at etnogo ambirok agat oba wolok wusa wagasik, anggur enggen agat oba mende enggen owak oba nen mbalogo enggen sagaligogo mende obalik nggokma akla mbo laʼbisinem kigi. Enggen sagaligogoma eti ebe, Allah nen akla agaga nggokogo inoba ʼbiligogo etiat o. 20Nen, anggur enggen mbalek eti yukarlek, o sili abel sikmangge sagalkonem, enggen sagaligogo mende eti akla nen, mep i elesi negen punalogo agup kurli 2 meter negen yenggelogo dagekesik kuwalogo, kurli 300 kilometer walegat lagonem lakigi o.
Currently Selected:
Wahyu 14: DNA
Highlight
Copy
Compare
Share
Want to have your highlights saved across all your devices? Sign up or sign in
