Wahyu 13
13
Kelo yengge negen mbere nggokndek mende winam agonem ilenggen lakasike wene
1Esigit diluk lakigirik oba nen, yabunggane kelo yengge negen nggok mende omanggi aik unggulowak oba 10 wulabek, nen unggulowak 7 paga, i laut yenggelekma nen duki wagonem lakigi. Aik 10 paga eti, ebe dombok oba nggare-nggare ap nggokndek yirigogi eti kak yugu, nen unggulowak 7 paga eti, ebe dombogat Allah endaga weyagarogo kagarigogo mende kolal mbalek welaga lakigi. 2At kelo yengge nggok etnogo duki wagonem kigi eti ebe, yengge negen endaga harimau eti mende negen. Nen, iyok ʼbagi inum negen nggok endaga beruang eti mende iyok negen. Nen, ambe, yengge kelo yengge negen endaga singa ambe negen mende esigit diluk winam agasikmo, at warlo nggok etnogo nen, yengge kelo negen etnogo yogoko dogolik,
“An nggok nobatneyak dogolik, yi mende ndi mende indewerek werek etnogo kak, kat an nobalikmo nggok dogonok nen yiluk mendagagi o,” yiluk yogokonem kolki. 3Kolkirik nen lakigi mende, at kelo yengge negen nggok etnogo unggulowak yomenogo omanggi wakukama, ebe watlasusak mendeat, pano dek agikesik oʼbamat werekma, akoni taʼbokogonat inilenggen kegasik nen, pogorarik at omborlik mondok lagonem iyigi. 4At warlo etnogo nen, at kelo yengge negen nggok etnogo yogoko dogolik,
“Kat nggok kobatne werek dogonok nen, mendagagi,” yiluk yisike eti paga, it akoni inendainggen warlo etnogo inom, kelo yengge negen nggok etnogo inom, inoba panggot diluk pogorinako dogolik men yisi laguka,
Yi wae o ya wae o
“Warlo nggok yi inom ndak-ndak, ta ambegep? ..... o
Imbisak ndak-ndak omanggi dek o .................. o
Nen, ta kak nen at imbisak wim abusak ambegep? ... o
Erlok dek o,” ................................... o
yiluk yisi lagaka iyigi o.
5Esigit diluk yisi nggorlek, sut 42 bulan paga ndagalik lago nggorlek, at kelo yengge negen nggok etnogo enggaerek nen pogorakigik, Allah endaga weyagarogo ʼbigik, kagako dogolik, akoni apma ʼbiyalok pagisek dogowagaluk warlo nggok mende etnogo nen indewerek ʼbekemo lakigi. 6At esigit diluk dogolik, at nen Allah ebe inom, endaga inom, at aguma mbogot oba inom, it o mbogot oba dogoligogi mende inom, taʼbokogonat inendaga weyagat disi laga kigi. 7Eti kak, akoni inunggulowak endaga dombok, inane dombok, inowado dombok, inaguma dombok, taʼbokogonat at nen apma ʼbiyalok pagisek dogowagaluk mendekemo indewerek atluk, Allah aʼburi inom wim ako dogolik, inobatne deget diyasi laga kigi. 8At Allah nen mbogot agat awan walkigidek dogolik,
“It eta iniluk mondok dogowagaluk kagarinabigin,” yiluk inendaga at kolal mbalogo Andomba Eyak, it inake wakuka mende etnogo ambuku paga kolal mbalogo ʼbisike. It inendaga esigit diluk kolal mbalogo ʼbisike mende, kelo yengge negen nggok etnogo pogorakidek werek nggorlek, akoni agat oba dogoligogi mende amberek taʼbokogonat kelo yengge negen nggok etnogo inendainggen oba panggot diluk pogorako lagaka iyigi.
9-10Eti paga wene yokisagin yi, kit kinasuk kolusak kalok, panorogo kolini o. At omanggi ebe kerle warogo ʼbusak obaat, kerle warogo ʼbugun o. Nen, at omanggi mbirok oba wasusak obaat, mbirok oba wasugunat o. Esigit diluk kagasugun eti paga, ebe nggok kak, Allah aʼburi mende kalok, inendainggen at oba panggot diluk inobakanini kambuk yiluk dogusak etiat o.
11Esigit diluk kigirik nen omborlik lakigi mende, kelo yengge negen nggok ninat mende omanggi unggulowak oba domba aik negen mbere wulabek, nen ane yisinem, warlo ane negen mende, agatla nen dagi wagonem lakigi o. 12Dagi wagasik, kelo yengge negen alep mende etnogo indewerek dogolik kagako laga mende, at kelo yengge negen yabunggane mende eti indewerek agasik, at nen akoni yogisasi dogolik,
“Kit akoni agat oba dogoligogi mende taʼbokogonat, at kelo yengge negen alep mende etnogo wakukama ebe watlasusak mende u oba dek agike mende etiat kinendainggen oba panggot diluk pogorasusak o,” yiluk ane obatnerogo yogisasinem kolki o. 13At kelo yengge negen nggok yabunggane winam aga mende etnogo, akoni nen at ebe diduwagaluk, it inil oba elalin mende kagako dogolik, mbogot oba nen kindu wusa ʼbi wagonem lakigi. 14Esigit diluk kagako laga eti, at kelo yengge negen nggok alep mende etnogo nen, elalin mende at il oba kagako dogowagaluk indewerek ʼbeke mende etnogo ebe kagako dogolik, akoni agat oba dogoligogi mende enggalat nuket diyasi laga. Esigit diluk nuket diyasi dogolik it akoni yomenogo nen, kelo yengge negen nggok mende mbirok oba wakukama ebe watlasusak mende suguluk u oba dek agike mende etnogo ebe negen alino kagarogo ngganengge omanggi kagasuwagaluk yogisekemo ebe kagaka lakigi. 15Esigit diluk kagakama, at kelo yengge negen yabunggane mende etnogo nen ngganengge alino kagarek mende etnogo ilugut dekemo ane yisi laga lakigi. Esigit diluk ane yisinem, it akoni inendainggen ngganengge etnogo oba panggot digidek mende inebe mondok inasigiluk wim yonggo ʼbekemo inarik lago lagaka iyigi. 16Esigit diluk inako nggorlek, at kelo yengge negen yabunggane mende etnogo nen, akoni nggokndek mende inom, akoni inendaga dek mende inom, ininggiwerek mende inom, iniggi dek mende inom, inarlikne mende inom, inanduwanengge mende inom, it taʼbokogonat inebe dombok men yogisasi laga,
“Kelo yengge negen nggok mende endaga mbalek mende yi, akoni nen inil enggerlogo asirlo negen kinil kawak oba a? Kininggi ebengge paga a, denggelubagik nen waganini o. 17Kit nen, at endaga kolal mbalek mende a? Endaga pasik ininggi wenago mende a, waganggep mende kalok, yi mende ndi mende onggo mbaligik, it amberek inoba onggo waganggik, kagako dogusak o. Esigit diluk mende, it akoni amberek waganggidek mende kalok, esigit diluk waganggo dogusak mondok dek o,” yiluk ane obatnerogo yogisasi laga lakigi o.
18Eti paga, wene eti pasik, kinakla nggagalek dek dogusak mondok dek o. At te, ta nen akla nggagalek kalok, kelo yengge negen eti endaga pasik, ininggi 666 oba wenaka eti ebe, ap omanggi endaga mende wenakama eti paga, didusak o.
Currently Selected:
Wahyu 13: DNA
Highlight
Copy
Compare
Share
Want to have your highlights saved across all your devices? Sign up or sign in
