La’biyaske 24
24
Ap Yahudi mende nen wene Paulus oba ʼbisuka wene
1Esigit diluk yogisasikesik, ininggi 5 paga welagukasik werekma, it ap Allah indewerek mende inewe nggok Ananias inom, inarluwendek yomenogo amberek inom, ap omanggi wene pano dombok yisi lagike mende endaga Tertulus inom, o Kaisarea waguka. Wagukasik nen, ap nggok gubernur Feliks etnogo oba unggisukasik, wene Paulus oba ʼbuwogoluk yogokuka. 2Esigit diluk yogokukasik, Paulus ebe waikukasik nen, Tertulus nen wene oba ʼbuwagaluk, yogokukama, at nen Feliks men yogokike,
“Gubernur Feliks newe. Kat nen paknisek werek nggorlek, nit yoma paganeat nen wim dek pano dambukogo werek o. Akoni nit mende ninake kakla nggagalogo mot-mot kagako lagan eti paga yi mende ndi mende pano arigogo. 3Kat nen o yoma ya nda kibitngge-yogongge panorogo kagarigogon eti, nit nen,
Pano, yiluk, keyagi mondok wakabigogi o. Newe. 4Esigit diluk mende, an nen wene uwanat yokogonem kaʼit asunogo yiluk, wene ʼberoat yokosigin yi, kobabut pano etnogo nen, kasuk kolinok nen, wene ebe yokisik. 5Ap yi nen, akoni weyagarinabik nokonem, aren mbalko. It akoni ap Nazaret mende etnogo omborlik liligogi mende inewe nggok dogolik, akoni Yahudi mende o yi ai ndi ai dogoligogo mende taʼbokogonat inakla nggagalik liligogo. 6Esigit diluk inakla nggagalik noko lagasik nen, o Allah ago palek weyagat digiluk kagakonem ebe pakogo. [Pakogosik nen, wene nit akoni Yahudi mende kagarigogi mende paga endema waganuwogoluk kagako. 7Esigit diluk mendeat, at Lisias ap tentara inewe nggok etnogo wagasik nen, ebe nininggimo nen ndilogo wolok lagasik yoma laʼbi waga yi. 8Esigit diluk laʼbi wagasik, wene ap yi oba ʼbogo mende ninebe kat koba wisuwagaluk yonisekemo wago o.] Nit nen wene oba ʼbogo mende eti, kat nen endema waganggo dogolik, kilu asiginat o,” yiluk yogokike. 9Esigit diluk yogokikemo, it ap Yahudi mende pelakngge yomenogo nen wene at oba ʼbisi dogolik,
“At Tartulus nen yeke eti, eberogonat yeke o,” yiluk yogokuka.
Paulus ebe irlirogo, at Feliks yogokike wene
10It nen wene esigit diluk yisukama at nggok gubernur etnogo nen wene Paulus nen omanggi yuwagaluk inggi siksik yogokike. Yogokikemo, at nen,
“Newe. Akoni nit mende, yi wene ndi wene inoba ʼbisinem, paganeat nen yi tahun ndi tahun kat nen inendema waganogo wene inoba ʼbigik, nggokik, kagarigogon eti an nilu o. Eti paga, wene an noba ʼbega eti, dekmaat, yiluk, nebe nirlirogo karat yokisigin yi nen, nakla arlenggen kiligogo o. 11An Allah pogorasigiluk o Yerusalem nggerat dagagirik oba nen, nininggi 12 pagaat welago, mende, kat nen,
Eberogonat a? Dek a, yiluk kinok wogiyamo kilu asiginat o. 12An o Allah ago palekma unggiluk inom, o akoni Yahudi mende sembayan yiligogoma unggiluk inom, o ungul werlekma duki lalok inom, akoni amberek ninom ninane sagalkik, nen, it amberek inane nggogat sagaluwagaluk inakla nggagalkik, kagakidek. Esigit diluk kagakonem it ap Yahudi mende nen inilenggen niyigidegat o. 13It ap yi nen wene noba ʼbiligogi eti,
Eberogonat kagakemo, yiluk nena mende si kiyagun. Si kiyausak degat asigin o. 14Mende, wene eberogonat kagako lagi mende ebe yi ʼbukakogo yokisik. It nen,
Akoni Yesus omborlik liligogi eti weyak, yiluk yiligogi. Mende, anat, it nen, weyak yiligogi mende eti ane kologo Allah nit ninakombalak apma unggiluk welaguka mende etiat ebe pogorako lagi etiat eberogonat kagako lagi o. Pogorako dogolik, wene Allah nen ninasuk wakike wene eti inom, ap at awene yogisasi laguka mende inane inom, taʼbokogonat kolal mbalogo ʼbisuka mende werek eti, eberogonat yiluk pago werek o. 15It ap yi nen,
Akoni pano kagarigogi mende inom, weyak kagarigogi mende inom, inebe watlatluk werekma eberogonat Allah nen inilugut inabigin, yiluk, inendainggen Allah oba panggot diluk werek eti kak, an esigit dilugat werek o. 16Esigit diluk dogolik, nakla nen,
Weyak omanggi kagaki, yiluk nakla weyak dogunogo yiluk, Allah ake inom, akoni inake inom, pano kagako lagi yiluk, nakla selek dogigiluk, nobatnerogo kagako lagi o.
17An mo dagagik, wusigik, tahun dogalegat o Yerusalem lagidek welagarik nen, nagarlagi nirugi ninebe omanggiat mende yiluk, uang omanggi yamagiyigik, Allah ake amberek ʼbigik, kagasigiluk lagi o. 18Lagarik nen, esigit diluk kagako dogolik, o Allah ago palekma ungguwogoluk inoba koriligogi eti kagat, esigit diluk koralok nen unggigi. Esigit diluk kagaki eti, akoni dogalegat ninom unggigidek. It amberek ninom ninane sagalkidegat werekma it Yahudi mende nen inilenggen niyega o. 19Mende, it ap Yahudi mende amberek o propinsi Asia nen lagukasik etoma welagaka. Esigit diluk welagaka nilenggen iyigirikmo nen, it nenat wene noba ʼbusak kalok, kat koba ya witluk nen wene noba ʼbusak mende. 20It inebe dek kalok, it ap yoma werek mende nen yuwak. Akoni nen it ap Yahudi mende Allah ake wene erlo mbileligogo mende inoba ʼbani lagakasik, etoma mendek werek nggorlek wene erlo kweyaka. Esigit diluk kweyakonem, an weyak kagaki mende omanggi eberogonat inasuk kolka mende nenat yuwak o. 21An etoma mendek dogolik, wene omanggi yiat nane nggokogo yogisigi o,
Akoni watlarigogi mende Allah nen eberogonat inilugut inabigin, yiluk didisi lagi eti paga, wene noba ʼbiligogi yi, yiluk yogisasinemat, inasuk kolka,” yiluk yogokike.
22Esigit diluk yogokikemo, at Feliks akoni Yesus omborlik liligogi wene eti ilu etnogo nen, Paulus men yogokike,
“Yogondak wene arat yogo. Yabunggane ap tentara inewe nggok Lisias etnogo ebe wago kalok nen, wene koba ʼbega mende eti, an nen wene erlo kweyago ilonggon wasigin o,” yiluk yogokike. 23Esigit diluk yogokikesik, at agoromi tentara nggok omanggi nen Paulus ebe anggorlem dogowagaluk men yogokike,
“Kat nen Paulus pago dogolik, yugunat noko dogowagaluk togot din o. Nen, akoni at mende nen yi mende ndi mende at warlok mende yamakuwogoluk kagako kalok, wenemuk mberisagup o. Togot diyasi dogono,” yiluk asuk wakike.
Paulus ap Feliks inom, kwe Drusila inom, inoba wolok laguka wene
24At Feliks nen,
“Anggorlem dogono,” yiluk yogokikesik, ininggi mbererlagat welagukasik nen, at Feliks age endaga Drusila, kwe ebe Yahudi mende. Wolok wagikesik nen, agoromi nen Paulus wagani lowagaluk yogisasikemo lagukasik ebe wolok wagukama nen, at Paulus nen akoni inendainggen Kristus Yesus oba panggot diluk dogoligogi wene eti yogisasinem, Feliks asuk kolek welagike. 25Esigit diluk kolek werek nggorlek, mot-mot kagako dogusak wene eti inom, inendainggen sebekogo dogusak wene eti inom, yabunggane Allah nen akoni ninendema waganiluk wene ninoba ʼbigik, nggokik, kagasigin wene eti inom, yogisasinem, Feliks ayuk agike. Ayuk atluk nen,
“Yogondak wene arat yegen o. Yabunggane yusak mot ago kalok, waikisigin o,” yiluk iyogoba laʼbisike. 26Esigit diluk laʼbisikesik, at akla nen,
“Paulus nen uang amberek woknisigin a,” yiluk ambasi dogolik, kibitngge-yogonggeat waitluk nen, wenenggak imbisak yisi laguka.
27Esigit diluk yisi nggorlek, mo dagagik wusigik 2 tahun welagukasik nen, yabunggane Feliks obalikmo ap omanggi endaga Perkius Festus gubernur asuwagaluk mendisuka. Menduwogoluk kagakonem, at Feliks nen,
“It akoni Yahudi mende inakla panorogo,” yiluk Paulus inggi kerle waregat togot disike.
Currently Selected:
La’biyaske 24: DNA
Highlight
Share
Compare
Copy
Want to have your highlights saved across all your devices? Sign up or sign in
