La’biyaske 25
25
At Paulus nen, “Wene noba ʼbega eti, ap nggok Kaisar nen wene erlo kweyago ilonggon wasuwak,” yiluk yisike wene
1Ap Festus etnogo mendisukama, o Kaisarea etoma wagikesik nen, inggi kenagan welagikesik, o Yerusalem lagike. 2Lagikesik werekma, it ap Allah indewerek mende ineugi nggokndek yomenogo inom, akoni Yahudi mende ineugi nggokndek inendaga werek amberek inom, oba unggisukasik nen, wene Paulus oba ʼbisi laguka mende etnogo yogokuka. Yogoko dogolik, akla nggagik-nggagokogo kagakuka. 3Esigit diluk kagakuka eti, at nggok agoromi nen Paulus ebe wolok o Yerusalem wisuwogoluk wagonem, kolak oba wasuwogoluk abok inane omanggi dambukogo yisukasik nen, at yogoko dogolik,
“Kat kobabut pano nen, nit ninakla panorogo Paulus ebe o Yerusalem yoma laʼbi witno,” yiluk inane erogat nggino yogokuka o. 4Esigit diluk yogokuka mende, at Festus nen,
“At Paulus inggi kerle warek o Kaisarea etomaat dogowak o. Werekma, an yoma welagidek ibat ligin o. 5At nen kagasusak dek mende omanggi kagakemo kalok, kit ap nggokndek yoma nen wene oba ʼbubagik nen yiluk ninomat luwok o,” yiluk yogisasike.
6Esigit diluk yogisasikesik, inggi 8 paga a? 10 paga a, inom o Yerusalem welagukasik nen, o Kaisarea wagike. Wagikesik, kubengge, o akoni wene inoba ʼbigik, nggokik, kagarigogoma koreklasi unggisikesik, agoromi nen Paulus ebe wolok wisuwagaluk yogisasike. 7Yogisasikemo lagukasik ebe wolok wagukama nen, it ap Yahudi mende o Yerusalem nen waguka mende yomenogo Paulus eragalilu dagakogo mendek dogolik, yi wene ndi wene anggin mende dogalegat oba ʼbisuka. Esigit diluk mende, at weyak omanggi kagakidek etnogo paga,
“Eberogonat weyak yigit diluk kagakonem ninilenggen kogo,” yiluk yogosusak dek agike. 8Esigit diluk dek agikemo, at Paulus nen ebe irlirogo men yogokike,
“Wene Allah nen nit akoni Yahudi mende ninasuk wakike wene etnogo omanggi sagalogo togot diluk weyak kagakik, o Allah ago palek etnogo weyagat digik, ninewe nggok Kaisar o Roma mende etnogo ane sagalogo togot diluk omanggi weyak kagakik, mondok kagakidek o,” yiluk yogokike.
9Esigit diluk yogokikemo, at Festus nen, akoni Yahudi mende inakla panorogo yiluk, Paulus men yogokike,
“O Yerusalem etoma nen wene yi pasik an nil oba erlo kweyakonem, eberogonat kalok an nen ilonggon wasik nen, ninom luwok a? Kaʼit a,” yiluk yogokike. 10Yogokikemo, at Paulus nen,
“An yogondak wene inoba ʼbigik, nggokik, kagarigogoma yoma, ninewe nggok Kaisar Roma mende inggimo werek. Eti paga, wene noba ʼbega mende yi, at werekma etoma nenat erlo kweyago ilonggon wasuwak. An nen it Yahudi mende weyak omanggi kagarinakidek eti, kat kiluat o. 11An nen omanggi kagasusak dek mende kagakik, weyak kagakonem inebe mondok inarigogo mende kagakik, eberogonat kagatlepma,
Nasusak morat o. Natni, yiluk yilep. Mende, it ap yoma nen wene noba dekmaat ʼbiligogi eti paga, it amberek nen, it ap yi inakla panorogo yiluk an nebe it ininggimo ʼbanusak erlok dek o. Newe Kaisar nenat wene eti erlo kweyago ilonggon wasuwak o,” yiluk yogokike. 12Yogokikemo, ap omanggi at Festus inom dogolik,
“Yigit diluk kagasuwok, ndigit diluk kagasuwok,” yiluk inom yisi laguka mende inom nen,
“Esigit diluk kagasuwok,” yisukasik nen Paulus men yogokike,
“Kat nen,
Wene yi, an Kaisar nen erlo kweyago ilonggon wasuwak o, yiluk yegen eti paga, Kaisar oba laʼbagaginat o,” yiluk yogokike.
Ap Agripa kwe Bernike imbisak wagukama Paulus abok yogisasuka wene
13Esigit diluk yisukasik nen, ininggi mbererlagat werekma, ap endaganggok Agripa iru Bernike imbisagat, ap Festus keyagi wasuwogoluk oba o Kaisarea waguka. 14Wagukasik ininggi amberek inom etoma werekma, at Festus etnogo nen, wene Paulus abok Agripa men yogokike,
“Ap Feliks nen ap omanggi inggi kerle warek togot disike mende yoma werek. 15Werek nggorlek, an o Yerusalem lagima, it ap Yahudi mende Allah indewerek ineugi nggokndek inom, inarluwendek inom, noba wagakasik, an nen ap eti wene oba ʼbiluk ebe wasuwagaluk yokneka. 16Yokneka mende, an nen onggo men yogisigi,
Nit akoni Roma mende kagarigogi eti, ap omanggi wene oba ʼbisinem, it wene oba ʼbugun werek nen ap eti ebe yogokonem, at nen onggo it yogisigidekma, inebe inasuwagaluk wogisausak dek, yiluk yogisigi. 17Esigit diluk yogisigirik, inebe ninom yoma wagosik, nininggi dogoluk degat, kubengge nagoromi nen ap eti o akoni wene inoba ʼbigik, nggokik, kagarigogoma wolok wisuwagaluk yogisigi. 18Esigit diluk yogisigima, lagakasik ebe wolok wagakama, at ebe ndurlem mendiluk, it ap yomenogo melatluk nen, mondok weyak kagake mende wene oba ʼbugun ambigi mende, esigit diluk oba ʼbigidek. 19ʼBigidek mende, it nen inombae Allah oba inendainggen panggot diluk dogolik inane inasokondek yiligogo mende pasik wene omanggi oba ʼbigik, ap omanggi endaga Yesus eti, ebe watlagike mende, at Paulus nen,
Yabunggane suguluk iluk agikesik werek o, yiluk ane obatnerogo yiligogo eti paga wene oba ʼbigik, kagaka o. 20Wene esigit diluk oba ʼbega mende, an wene eti didigidek. Nobake mbalagama nen, an nen Paulus men yogoki,
O Yerusalem lalok nen, wene yi erlo kweyago, an nen ilonggon wasik nen, luwok a? Kaʼit a, yiluk yogoki. 21Yogokima, at Paulus nen,
Wene yi at Kaisar nen erlo kweyago ilonggon wasuwak nen ninggi kerle waregat togot daninok o, yiluk yekemo, an nen nagoromi men yogisigi,
At Kaisar oba laʼbusak ago kalok, laʼbiginmo, inggi kerle waregat pago dogono, yiluk yogisigima werek,” yiluk yogokike. 22Yogokikemo, at Agripa nen,
“Ap eti ane an nasuk nen kolusak warlok o,” yiluk yogokikemo, at Festus nen,
“Kalok, kubengge at ane kasuk kolinok nen o,” yiluk yogokike.
23Yogokikemo, kubengge ap Agripa kwe Bernike imbisak pogorinako nggorlek, it ap tentara ineugi nggokndek inom, ap o etoma mende inendaga werek mende inom, o wene inoba ʼbigik, nggokik kagarigogoma etnogo unggisuka. Unggisukama, at Festus agoromi nen Paulus ebe wolok wisuwagaluk yogisasike. 24Yogisasikemo lagukasik ebe wolok wagukama, at Festus nen,
“Agripa newe. Nen, kit ap amberek ninoba unggi wagap mende yoma inom, nagarlagi nirugi o. Ap yi kinilenggen kegep yi, it akoni Yahudi mende o Yerusalem inom, yoma inom, inebe taʼbokogonat nen, an yoknoko dogolik,
Ap yi iluk dogusak dek. Wasusak o, yiluk inane nggokogonat yiligogi. 25It nen esigit diluk yiligogi mende, an nen wene eti erlo kweyaki mende, at nen weyak omanggi eberogonat kagakonem, wene inoba ʼbiluk inebe inarigogi ndak-ndagat omanggi kagakemo dek kigi. Mende, at enggaerek nen,
Wene yi ap Kaisar nen erlo kweyago ilonggon wasuwak, yiluk yekemo, Kaisar oba laʼbigiluk yigi. 26Mende, wene a oba ʼbega mende eti erlo kweyakonem, an nen didigidek nobake mbalagama wene eti ake kolal mbalogo ninewe nggok Kaisar oba ninggit diluk laʼbuʼbugat agama nen, nagarlagi nirugi o. Kit taʼbokogonat inom, ebe nggok kak newe Agripa inom, kinom nen wene Paulus oba ʼbega mende eti, erlo kweyakonem, an didiluk kolal dikogo mbalogo laʼbigin yiluk nakla ambigirik nen at ebe kinoba wolok wagi o. 27Esigit diluk kagaki eti, wene erlo kweyago nen,
Yigit diluk kagakemo, yiluk kolal dikogo mbalkidekma, at inggi kerle warogo laʼbusak, erlok dek ambigirik nen at ebe wolok wagi o,” yiluk yogisasike.
Currently Selected:
La’biyaske 25: DNA
Highlight
Share
Compare
Copy
Want to have your highlights saved across all your devices? Sign up or sign in
