La’biyaske 22
22
1Yogisasi dogolik, men yogisasike,
“Neugi nagoromi. Wene yi an noba dekma o, yiluk nenggaerek nebe nirlirogo yokisagin yi kinasuk panorogo kolini o,” yiluk yisinem, 2it nen,
“Nit akoni Ibrani mende ninane paga yoknisiligogo,” yiluk inane mondok dek aguka. Inane mondok dek agukama, at nen men yogisasike,
3“An ap Yahudi mende, nebe o propinsi Kilikia o kota Tarsus endak lagagi mende, o Yerusalem yoma nen nggogot nakukama narluwe agagi. Narluwe agagimo, ap nggok Gamaliel nen, wene Allah nen ninakombalak inasuk wakike mende etnogo dikogo yanggul noko lagike. Yanggul nokonem, an nen kit yogondak Allah ake kinobatnerogo kagarigogi eti kagat, kagako lagagi o. 4Kagako dogolik, akoni Yesus wene waganggukasik omborlik yigit diluk lago laguka mende an nen inasigiluk mugisek lago dogolik amberek inakuguat. It amberek kumi inom, ap inom, ininggi kerle warogo wogisek, o ininggi kerle warek ʼbiyiligogoma ʼbiyasi lagagiat. 5Esigit diluk kagako lagagi eti, ap Allah indewerek mende inewe nggok ebe inom, inarluwendek inom, taʼbokogonat nen surat mbalogo ninagarlagi, Yahudi mende o Damsyik mende inoba wolok lowagaluk woknikuka. Woknikukama, it akoni Yesus wene waganggukasik omborlik lago laguka mende o etoma werekma ininggi kerle warogo wogisek, o Yerusalem yoma ʼbiya wagonem, wene inoba ʼbigik, inebe inakik, kagasuwagaluk laʼbanggukasikmo nogo nen, it inilu. Eti paga, it nenat yokisausak werek o,” yiluk yogisasike.
At Paulus nen, “Yesus nen esigit diluk woknakikemo nobabut kwalagigi,” yiluk yogisasike wene
6“An o Damsyik korogat ligin ambasigi, dinggagane omanggi pasigat mbogot oba nen aʼbigil weyak mende an neragalilungge liyarogo yasi wusa wagike. 7Liya mondok yasi wusa wagonem, an nebe agat oba nduntogo wara wusasigi. Wara wusasigimo, at omanggi nen ane yoknoko dogolik,
Saulus. Saulus. Anat yi aik ndi aik kagat nabigiluk muknarek noko lagan eti nenaluk, yiluk yoknikike. 8Yoknikikemo, an nen,
Iya. Newe. Kat ta, yiluk yogokigimo, at nen,
An Yesus, nago Nazaret mende, yi aik ndi aik kagat nabigiluk muknarek noko lagan mende etnogoat o, yiluk yoknikike. 9Yoknikikemo, it ap an ninom lagagu mende nen, liya eti inilenggen kasuka mende, ane an yoknikike eti, inasuk kolkidek. 10Inasuk esigit diluk kolkidek werek nggorlek, an nen,
Newe. An ninggit diluk kagasik, yiluk yogokigimo, at nen,
Kebe melatluk nen, o Damsyik unggino. Unggiluk werekma, kat nen Allah warlok mende taʼbokogonat kagasigin mende pasik ap omanggi nen yokosigin etnaga o, yiluk yoknikike. 11Esigit diluk yoknikikemo, o liya etnogo nen nilenggen kikip atluk amum agike. Amum agikemo, it ap ninom lagagu mende yomenogo nen ninggi pak-pak o Damsyik woknarek unggisuka.
12Unggisukama, o Damsyik etoma ap omanggi endaga Ananias. Wene Allah nen ninasuk wakike wene etnogo pago dogolik mot-mot kagakonem, it akoni Yahudi mende o Damsyik mende taʼbokogonat nen pogot ako laguka. 13At ebe an noba wagikesik, neragalilu mendek dogolik,
Saulus nagarlak. Kilenggen ʼbenggelasin o, yiluk yoknekonem eranogoat an nilenggen ʼbenggelatluk, at ebe dikogo kasigi. 14Kasinem, at nen,
At Allah ninakombalak nen ebe pogorako laguka mende etnogo nen, at akla ambaligogo mende kilu agik, at aʼbut obabut mot mende Yesus eti kilenggen kigik, at ane ambe paga nen yisinem kasuk kolkik, kagatnok nen yiluk, kebe mikakesik kayonggo ʼbeke o. 15Eti paga, kilenggen kigik, kasuk kolkik, kagaken mende eti, akoni taʼbokogonat ʼbukakogo yogisasi dogono o. 16Mende, kat yogondak yoma erogat dogusak dek. Kebe melatluk nen, kat weyak kagako lagan mende Allah nen sobal kakik, it amberek nen ima wusa ʼbagagik, kagasuwak nen, Yesus endaga mbalogo Allah ayonggo ʼbino, yiluk yoknikike,” yiluk yogisasike.
At Paulus nen, “Yesus nen Allah wene akoni sikmangge mende yogisa lowagaluk, nayonggo ʼbisike,” yiluk yogisasike wene
17Esigit diluk yogisasikesik, omanggi men yogisasike,
“Esigit diluk yoknikikemo, an yabunggane o Yerusalem wagagisik nen, Allah ago palekma sembayan yisinem, Allah Agurengge nakla unggisikemo naʼbingganggo kasigi. 18Naʼbingganggo paga, ninewe Endaganggok nen,
Kat nen, kilenggen an niyegen mende eti inom, kasuk kolken mende eti inom, akoni o yoma mende ʼbukakogo yogisasinem, kane inasuk kolugun mondok dek o. Eti paga, o Yerusalem yoma nen ibat dukino, yiluk yoknikikemo, naʼbingganggo paga kasigi. 19Esigit diluk yoknikikemo, an nen,
Newe. An o sembayan yiligogomangge ya unggigik, nda unggigik, lago dogolik, akoni inedainggen kat koba panggot diluk welaguka mende, ininggi kerle wakik, ndugi inakik, kagarik noko lagagi etnogo, it mondok inilu o. 20At stefanus, wene kat kake ʼbukakogo akoni yogisasi lagike mende etnogo ebe wakonem, an nebe etoma mendek dogolik,
Keik! Pano waka, yiluk, it ap wakuka mende iniyom nonggorlek anggorlem welagigi eti, it iniluat o, yiluk yogokigi. 21Esigit diluk yogokonem, ninewe Endaganggok nen,
It akoni sikmangge mende walegat etoma inoba laʼbagagin eti paga, lano o, yiluk yoknikike,” yiluk yogisasike.
22Paulus nen esigit diluk yogisilik wagonem, it yomenogo inasuk pano kolek welagukasigat, kurli eti kurli paga yisinem inane nggokogonat men yisuka,
“Ap obabut yigirlik, agat oba iluk dogusak dek. Wasuwok o!” yiluk 23it inenggaerek iniyom nonggorlogo laʼbigik, agat amumulengge waganogo liyaʼbigik, kagakuka. 24Esigit diluk kagakonem ap tentara dogalko laguka mende inewe nggok etnogo nen, agoromi yogisasi dogolik,
“Paulus ebe o obatneyak palekma etoma wolok unggiluk, akoni Yahudi mende nen inane nggokogo wene oba ʼbiligogi eti, wene erlo ninggit diluk kagakemo nen yiluk ndugi warogo wene erlo kweyatni o,” yiluk yogisasike. 25Esigit diluk yogisasikemo, it nen ebe ndugi wasuwogoluk kerle warogo ʼbisukama, at Paulus nen, ap tentara nggok omanggi etoma mendek werekma men yogokike,
“Kit nen, ap omanggi o Roma aiwerek mende, wene oba ʼbigidekma ndugi ndak wasusak nogo?” yiluk yogokike. 26Yogokonem, nggok etnogo nen yonggo ap tentara dogalko laguka mende inewe nggok etnogo oba lagikesik nen,
“Kat ninggit diluk kagasigiluk yegen nogo. Ap yi ebe o Roma aiwerek mendeat o,” yiluk yogokike. 27Yogokikemo, ap tentara nggok etnogo Paulus oba wagikesik nen,
“Kat kebe o Roma kaiwerek mende a? Yoknisin,” yiluk yogokikemo, at nen,
“Nen, an naiwerek mendeat o,” yiluk yogokike. 28Esigit diluk yogokikemo, ap tentara inewe nggok etnogo nen,
“An onggo nggogat mbalogo nen naiwerek agagisik werek,” yiluk yogokikemo, at Paulus nen,
“An o Roma naiweregat endak lagagi mendeat o,” yiluk yogokike. 29Esigit diluk yogokikemo it at ndugi wasuwogoluk kagakuka mende yomenogo nen ibat ndiyokogo togot diyasuka. Esigit diluk togot diyasukama, ap nggok etnogo akla nen,
“Paulus ebe o Roma aiwerek mende nggorlegat, inggi kerle wakima yi nayuk a,” yiluk ayuk agike.
Paulus ebe it ap Yahudi mende wene erlo mbilelko laguka mende inoba wolok lagikemo yogisasike wene
30Kubengge, it ap tentara omanggi dogalko laguka mende inewe nggok etnogo nen,
“It akoni Yahudi mende nen ap yi wene ninggit diluk mende oba ʼbiligogi. Wene dikogo nilu asusak mende,” yiluk wene erlo kweyasuwogoluk, it ap Allah indewerek ineugi nggokndek yomenogo inom, ap Yahudi Allah ake wene erlo mbileligogi mende yomenogo inom, nandorluwagaluk inayonggo ʼbisikemo nandokukama nen, Paulus inggi kerle piyalogo ʼbiluk it inoba wolok lagikesik nen, inelokoma mendisike.
Currently Selected:
La’biyaske 22: DNA
Highlight
Share
Compare
Copy
Want to have your highlights saved across all your devices? Sign up or sign in
