La’biyaske 20
20
Paulus o Makedonia wagikesik, mbiyokogo o akoni Yunani mende inaguma wagike wene
1O kota Efesus inane nggogat sagalko laguka etnogo dek agikemo, at Paulus nen, it akoni Yesus wene wagangguka mende waisalok nen inasuk wakike. Inasuk warogo keyagi warinabiluk nen, ebe o propinsi Makedonia wagike. 2O Makedonia etoma noko dogolik, wene nggokogo yogisasi dogolik, inendainggen aik wat diyilik noko lagikesik, o akoni Yunani mende werekma wagike. 3Wagikesik, sut kenagan etoma welagike. Etoma welagikesik nen, yabunggane imangge nggu paga o propinsi Siria lagaluk kagakonem akoni nen, men yogokuka,
“It akoni Yahudi mende nen kasuwogoluk kabok mbalkasik werek o,” yiluk yogokukama asuk kolkikesik, suguluk iyogoba o propinsi Makedonia ngge nen lagaluk kagakike. 4Lagaluk kagakonem, ap Sopater, Pirus aʼbut ago o Berea mende inom, Aristarkus, Sekundus imbisak inago o Tesalonika mende inom, Gayus ago Derbe mende inom, Timotius inom, Tikikus Tropimus imbisak inago o propinsi Asia mende inom, inom laguka. 5It ndak lagukasik nen, o Troas etoma ninanggorlem welaguka. 6Esigit diluk ninanggorlem werek nggorlek, akoni Yahudi mende pesta roti pikidek mende etnogo nasukama nen, nit o Filipi nen imangge nggu paga o Troas lago dogolik, noge nininggi 5 paga yiluk, it o Troas werekma inoba lagagusik, etoma dogolik noge nininggi 7 paga yisugu.
Paulus ilugun kurli paga akoni o Troas mende ʼbiriyalok lago dogolik kagakike wene
7Nit o etoma dogolik, Allah ake werlegat welagugusik nen, kibanggo kimbiri roti ninagarlagi ninom ninirugi ninom nuwogoluk nandot diluk, at Paulus nen wene yoknisasi lagike. Kuben arat luwogoluk nogo nen, wene uwanat yoknisasi dogolik, kibanggo mondok engge ndurlem yoknisasi mondok welagike. 8O konaimbo nggok palekma nandokugumo etoma, isagal lampu dogalegat yibarlek welagike. 9Esigit diluk nandokugusik nen, elege tawe mende omanggi endaga Eutikus, jendela ambe mbalekma korek welagike. Korek dogolik, Paulus wene uwanat yisi welagike eti paga, noge ilumo agikesik nen, nggunuk noge yisike. Noge yisinem, o konaimbo kenagan agorek sep kun-kun palekma ebe ombo etoma nenat nggorogo wusa wagike. Wusa wagikemo, akoni ʼbika wusa waguka mende, mondogat watlagikesik werekma wagangguka. 10Waganggukama, Paulus ebe wusa wagikesik nen, warek oba denggakogo wilagikesik nen inggi obake purlukogo pakasikesik nen,
“Watlagama yiluk, kinakla ambagup. Ebe iluk werek o,” yiluk yogisasike. 11Esigit diluk yogisalok yabunggane suguluk dagasikesik nen, kimbiri roti nggusogo nasukasik wene uwanat yogisasi lagikesik nen, o wi disikemo Paulus ebe o werlekma lagike. 12Lagikemo, elege tawe etnogo ilugat aguma ʼbi lagik, iluk agike mende eti ake inakla arlenggen nggogat kigik, kagakuka.
O Troas nen, o Miletus laguka wene
13At Paulus nen,
“Kit imangge nggu paga o Asos lani o. An kolak obangge wisigin,” yiluk wene yoknisasikemo, nit ndak nggu paga o Asos etoma lalok, o etoma nen at ebe witluk ninom luwogoluk, nit ndak o Asos lagagu. 14Lagagusik nen, o etoma nen at ebe ninom abuk agagusik, ninom nggu paga o Metilene lagagu. 15O Metilene nen, imangge nggu paga lagagusik, kuben kak, i enggen mbalekma o Khios eti togot diluk, agangge kak, i enggen mbalekma o Samos eti nomokogo togot diluk, uwagangge kak o Melitus lagagu. 16At Paulus nen akla ambasi dogolik,
“An o propinsi Asia yoma erogat noko nggorlek, Pesta Pentakosta nalokma launogo yiluk, o kota Efesus unggigidek mbiyokogonat o Yerusalem lalokma nen nugun kalok, pano,” yiluk akla ambalok, ibat lagaluk kagakike.
Paulus nen akoni o Efesus mende inasuk warogo ʼbiyalok lagike wene
17At Paulus ebe o Melitus etoma dogolik, it ap Allah aʼburi o Efesus mende inanggorlem welaguka mende inebe wisuwagaluk wene laʼbisike. 18Wene laʼbisikemo inebe wagukama, at Paulus nen, men yogisasike,
“An ebe-alep o propinsi Asia wagagi eti kurli paga, ninom mondok dogolik kagako lagi mende kinilu o. 19It akoni Yahudi mende nen nebe nasuwogoluk nabok mbalko dogolik weyak kagat nako nggorlek, nenggaerek nen nobabut sebekogo, pogorakigidek, de ambik ako dogolik, ninewe Endaganggok apma dogolik at ake kagako lagi kiniluat o. 20Esigit diluk kagako dogolik nen, wene kit yokisausak mende togot digidek akoni nandorlek werekma yanggul kisigik, kinagumongge dombok yanggul kisigik, kagako lagi etnogo kiniluat o. 21An nen akoni Yahudi mende inom, Yunani mende inom, kinasuk wako dogolik,
Weyak kagako lagap mende togot diyalok, kinobabut kwalatluk kineloke Allah wogotni o. Wogotluk nen, kinendainggen ninewe Endaganggok Yesus oba panggot diluk dogobagik nen yiluk yokisasi lagi o. 22Mende, yogondak Allah Agurengge nenat nakla nggagalkemo, ane kol diluk, o Yerusalem lagaluk kagarigogo o. Etoma lalokma nen ninggit diluk kagat nabugun ogwe. An nonggodek o. 23Esigit diluk nonggodek mende, an o kota omanggi nen omanggi lagik kagarigogo mende etoma taʼbokogonat at Allah Agurengge nen,
Kinggi kerle wakik, yi aik ndi aik koba ʼbigik, kagasugun o, yiluk yoknirigogo etiat nilu o. 24Esigit diluk mende, an nebe niluk dogusak etiat nggok yiluk eti mende nggogot diligogo dek. Ninewe Endaganggok Yesus nen nayonggo ʼbisi dogolik, at nen,
Allah obabut pano nen kagarinabigogo wene pano wene etiat yogisilik lan o, yiluk nayonggo ʼbisike etiat ilugun oba nggobokogo kagasigiluk nggogot diligogo o.”
25An kit nagarlagi nirugi taʼbokogonat wene Allah apma unggiluk dogogun eti wene yokisalik noko lagi eti kurli yogondak yi paga nen, kit nen yabunggane nelokonggen kinilenggen niyagun dek o, yiluk an nilu. 26-27Esigit diluk Allah akla ambasike wene eti, an nakla togot digidek mondok ʼbukakogo yokisigi eti paga, kit amberek yabunggane weyak ago kalok, wene an noba dek o, yiluk yokisigi. 28Domba inanggorlem dogoligogo eti kak, kit nen Allah aʼburi inanggorlem dogowagaluk, at Agurengge nen kinayonggo ʼbisikemo, inanggorlem dogolik, kinenggaerek kinobabut kwalogo dogoni o. Esigit diluk kinobabut kwalogo dogolik nen, Allah aʼburi yoma, at enggaerek aʼbut amep oba woginakikemo inebe at enggaerek aʼburi werek, yiluk panorogo inanggorlem dogoni o. 29Mende, yengge kelo anini weyak mende nen domba togot digidek mondok niligogo eti kak, an nebe lalokma nen, it amberek nen Allah aʼburi kit nen inanggorlem werek mende eti weyagarinabi unggi wisugun werek o, yiluk an nilu. 30Esigit diluk weyagat inako nggorlek, ap kit mende amberek melatluk nen, akoni Yesus wene wagangguka mende inebe nggigilogo wogisek dukuwogoluk, wene nggorlo wene yanggul isasi dogogun o. 31Kinobabut kwalogo dogoni o! An o mo dagagik wusigik kagako nggorlek 3 tahun ninom dogolik, puk welagidek dinggagane, kibanggone, de ako dogolik, kinebe dombok kinasuk wako lagi etnogo, kinakla eberek dogoni o. 32Yogo. Wene Allah obabut pano nen wokninabigogo eti wene kininggi aʼbetogo pago dogobagik nen yiluk, yokisigi. Yogondak nen, at Allah obatne werek mende nen, wene eti paga kinendainggen korlet kinakik, yi mende ndi mende at enggaerek aʼburi wogisagaluk ʼbiyasike mende wokisigik, erlok kagarigogo mende inggi paga ʼbinagagi o. 33An nakla nen, kit kinamende uang emas mende inom, perak mende inom, kiniyom inom, warlok yiluk omanggi nakla ambigidek. 34An ninom, ap an nagoromi nomborlik noko dogoligogo mende inom, yi mende ndi mende dek nen, an nenggaerek ninggi nen kweyago korlasi lagi eti kinilu o. 35Wene ninewe Endaganggok Yesus enggaerek nen men yoknisasike,
It akoni amberek nen wokisasinem korlalok kinakla arlenggen kausak erlok dek o. At te, kit kinenggaerek nen it amberek wogisasi dogolik kinakla arlenggen kausak o, yiluk yoknisasike eti ninakla eberek dogolik, an nen it amberek inobatne dek mende yamagiyaligogo eti, kit nen didaniluk an nobabut waganogo kininggi obatnerogo yamagiyasi dogobagik nen yiluk yanggulogo kagarigogo o,” yiluk yogisasike.
36Esigit diluk yogisasikesik nen, indibagal yunggulogo nen, it taʼbokogonat inom dogolik sembayan yisike. 37Sembayan yisikemo nen, it taʼbokogonat de ako dogolik, Paulus ebe obake purlukogo paʼbiluk nen, inambe sarluk keyagi wako dogolik, keyagi warogo laʼbisuka. 38Sembayan awan yigidek dogolik, at Paulus nen,
“Kit nen an yabunggane nelokonggen kinilenggen niyagun dek o,” yiluk yogisasike mende etnogo inakla ebekukasik, inakla mondok weyak agukasik, ebe keyagi warogo wolok, nggu etnogo werekma laguka.
Currently Selected:
La’biyaske 20: DNA
Highlight
Share
Compare
Copy
Want to have your highlights saved across all your devices? Sign up or sign in
