La’biyaske 15
15
O Yerusalem nen wene nggok mbalkuka wene
1Ap amberek o Yudea nen o Antiokia wagukasik nen, Allah aʼburi etoma mende wene men yiluk yanggul isasuka,
“It wene Musa nen,
Yigit diluk, ndigit diluk kagako dogusak yiluk yoknisasike wene eti mot-mot, kinowado kinenggarlimo mende mbal kinakidek kalok, kinebe Allah nen ndil kinabusak dek o,” yiluk yanggul isasuka. 2Wene esigit diluk yanggul isasukama, at Paulus Barnabas imbisak nen, it ap eti men yogisasuka,
“Kit nen yegep eti mondok nggorlo yegep o,” yiluk inom wene mbalkik, wenemuk akik, nggogat ako laguka. Wene esigit diluk ako lagukama, it etoma mende nen, Paulus Barnabas imbisak, it amberek inomat o Yerusalem lalok it ap Yesus nen inebe inayonggo ʼbiluk laʼbiyasike mende yomenogo inom, it ap Allah aʼburi inanggorlem welaguka mende inom, inom nen wene eti ake moresuwagaluk laʼbiyawogoluk kagakuka. 3It Allah aʼburi nen esigit diluk kagakukasik laʼbiyasukama, o etoma nen, Fenisia inom, Samaria inom, etoma lago dogolik, men yogisilik laguka,
“It akoni sikmangge mende inobabut kwalogo ineloke Allah wogokama o,” yiluk yogisilik lagonem, it Allah aʼburi etoma mende inakla arlenggen nggogat kasuka. 4It etnogo o Yerusalem lagukama, it ap Yesus nen inebe inayonggo ʼbiluk laʼbiyasike mende yomenogo inom, it ap Allah aʼburi inanggorlem welaguka mende inom, it Allah aʼburi amberek etoma inebe nandoko laguka mende inom, keyagi warogo woginakuka. Woginakukama, it nen,
“Nit Allah ninom nen yigit diluk kagako, ndigit diluk kagako,” yiluk wene mbilelogo yogisasuka. 5Yogisasinem, it ap Farisi mende Yesus wene eberogonat yiluk wagangguka mende inebe amberek melagukasik nen, men yogisasuka,
“Akoni sikmanngge mende Yesus wene wagangga mende eti, inowado inenggarlimo mende esigit diluk mbalinakik, wene Allah nen Musa ayonggo ʼbiluk ninasuk wakike wene etnogo pago welagik, kagako dogusak o,” yiluk yogisasuka. 6Yogisasukama, it ap Yesus nen inebe inayonggo ʼbiluk laʼbiyasike mende yomenogo inom, it ap Allah aʼburi inanggorlem welaguka mende yomenogo inom, wene eti moresuwogoluk nandokuka. 7Esigit diluk nandokukasik, wene nggogat omanggi nen yigik, omanggi nen yigik, yisi lagukasik, at Petrus melagikesik nen, men yogisasike,
“Ap yirani. Nagarlagi. It akoni sikmangge mende nen pano wene inasuk kolkik, inakla nen eberogonat yiluk waganggik, kagasuwagaluk, an paganeat kit ninom werekma, it eti yogisa lowagaluk Allah nen miknakikesik nayonggo ʼbisike eti, kinilu o. 8At Allah akoni ninendainggen ilu mende etnogo nenat,
Yi an naʼburi o, yiluk Agurengge nit woknisasike eti kagat, it eti wogisasikeat o. 9It ninat kagarinakik, nit ninat kagat ninakik, kagakidek o. It nen Yesus wene eberogonat yiluk waganggukama, at nen inakla korinakike o. 10Allah nen esigit diluk kagako nggorlek, kit nen Allah aren mbaluwogoluk kagarigogi eti nenaluk. Wene eti anggin ambik nen, ninakombalak waganusak erlok dek welaguka. Nen, nit nen waganusak erlok dek dogoligat, yabunggane it Yesus wene wagangga mende eti waganuwagaluk yiligogi eti nenaluk. 11At ninewe Endaganggok Yesus obabut pano nen, ninendainggen at oba panggot disinem, ndil ninakik, it ndil inakik, nit ninom ndak-ndagat ndil ninabigogo o,” yiluk yogisasike.
12Esigit diluk yogisasikemo, it akoni dogalegat yomenogo inane yigidegat puk aguka. Esigit diluk puk agukama, Barnabas Paulus imbisak nen wene yogisasi dogolik,
“It akoni sikmangge mende wene yogisasinem diduwagaluk, nit nen elalinat kagarinabik noko lagosik wago eti, ebe, Allah nenat kagarinako laga o,” yiluk wene mbilelogo yogisasi nggorlek, inasuk kolek welaguka. 13Wene arat ʼbogokogo yogisasukama, at Yakobus nen men yogisasike,
“Ap yirani. Nagarlagi. An wene yigin yi kinasuk kolini. 14Allah nen it akoni sikmangge mende inoba ebetluk nen, men yisike,
It amberek an naʼburi asuwagaluk woginabigin o, yiluk woginakike mende pasik, at Simon nen yoknisaligogo o. 15Esigit diluk yokniseke eti, it ap Allah wene yogisasi laguka mende yomenogo nen yisuka ndak-ndagat yokniseke o. It nen men yiluk kolal mbalkuka, 16-17Ninombae Endaganggok nen,
Akoni amberek taʼbokogonat inom, it akoni sikmangge mende, an naʼburi yiluk nendaga mbalogo miginakigi mende eti taʼbokogonat inom, inom dambukogo inombae Nendaganggok an nebeat kweyak nabuwagaluk, an nenggaerek yabunggane wisigin o. Witluk nen, o sagalagonem yabunggane ngget paligogi eti kak, Daud agarlagi inom inendaga dek aga eti, inendaga wereget digin o. Miyalaga mende eti, an nen yabunggane aborlok dek mondok palogo ʼbigik, nggeret digik, kagasigin o, yiluk, at ninombae Endaganggok esigit diluk taʼbokogonat kagarigogo mende nen
18esigit diluk ninilu asuwagaluk paganeat yoknisasikemo, (Am. 9:11-12)
kolal mbalogo ʼbisuka o. 19Eti paga, an nakla nen, it akoni sikmangge mende inobabut kwalogo ineloke Allah wogorigogi mende eti, inakla weyagat dusak dek ambaligogo. 20Nit nen, wene men yiluk kolal mbalogo inoba laʼbusak. Ngganengge oba inendainggen panggot diluk dogolik anggo warigogo mende mbalek nonggonem inebe weyagarigogo mende eti nausak dek. Kumi yugunat paginabusak dek. Nen, yi mende ndi mende arlonggop nggumulogo warek mende ninggik, amep ninggik, nausak degat, yiluk inasuk warogo inoba laʼbuwok o. 21Wene Allah nen at Musa yogokikemo, at nen ninasuk wakike wene etnogo, kurli ninakombalak paganeat etoma nen o yi ai ndi ai o akoni Yahudi mende sembayan yiligogoma, ininggi Allah ake werlegat dogolik kibitngge-yogongge wene eti endaga salogo yogisiligogo mende weregat o,” yiluk at Yakobus nen yogisasike.
Wene kolal mbalogo it Allah aʼburi o Antiokia mende inoba laʼbi waguka wene
22Wene esigit diluk yisukasik nen, it ap Yesus nen inayonggo ʼbiluk laʼbiyasike mende yomenogo inom, it ap Allah aʼburi inanggorlem welaguka mende yomenogo inom, Allah aʼburi taʼbokogonat nandorlek welaguka mende inom, inom nen wene men mbalkuka,
“Ap nit mende amberek pulogo inayonggo ʼbiluk, Paulus Barnabas imbisak o Antiokia lowak nen, laʼbiyawok o,” yiluk yisuka. Esigit diluk yisukasik nen, it Allah aʼburi mende inom, at Yudas endaga omanggi Barsabas eti inom, Silas eti inom,
“Inobabut pano,” yiluk ambasi laguka mende nen, kolal mbalek eti ininggimo wolok lowagaluk inayonggo ʼbisuka. 23Wene eti paga kolal mbalogo ʼbisi dogolik, men yisuka,
“Nit kinagarlagi Yesus nen ninayonggo ʼbiluk laʼbinani wagike mende inom, Allah aʼburi inanggorlem dogoligogi mende inom, ninom nen, kit kinebe o Antiokia mende, Siria mende, Kilikia mende, kinebe sikmangge mendeat, Allah aʼburi mende ninagarlagi ninirugi yiluk keyagi watkinako o.
24Ap nit mende amberek kinoba wagakasik nen, nit nen,
Wene esigit diluk yogisa lani, yiluk laʼbiya witluk dek mende, it nen kit yokisasi dogolik, kinakla weyagat kinakik, nggorlot kinakik, kagaka o, yiluk akoni nen yegema ninasuk kolko o. 25-27Ninasuk kolkosik nen, ninebe nandorlogo nen wene mbalko. Wene esigit diluk mbalkosik, Barnabas Paulus imbisak inebe inaʼbuwa mende eti, inebe ninewe Endaganggok Yesus Kristus ake ʼbiyalok, inasuwogoluk kagako nggorlegat, at ake kagarik liligogi mende inom kinoba wisuwagaluk ap amberek Yudas Silas imbisak inayonggo ʼbogoma wisugun o. It witluk nen, wene kolal mbalogo ʼbogo eti inambe paga nen mbilelogo yokisawak. 28Nit Allah Agurengge ninom dogolik, wene men yiluk mbalko. Wene anggin mende eti yokisausak dek. Wene yiat kinasuk kolusak yogo. 29Ngganengge oba panggot diluk dogolik anggo warigogi mende eti mbalek nausak dek o. Mep nausak degat. Yi mende ndi mende arlonggop nggumulogo warek mende eti nausak degat. Kumi yogot paʼbiyausak degat o, yiluk wene mbalko. Esigit diluk kagakidek dogogun kalok, kit pano kagarigogi yiluk yugun. Wene eti paga arat yokisogo. Nagarlagi nirugi,” yiluk kolal mbalogo laʼbiya waguka. 30Esigit diluk kolal mbalogo laʼbiya wagukama, o Antiokia arat wagukasik nen, Allah aʼburi inebe taʼbokogonat nandot diyalok, wene kolal mbalek etnogo wogisasuka. 31Wogisasukama, endaga wenakukasik nen,
“Wene eti paga ninakla pano aga,” yiluk inakla arlenggen ambik kasuka. 32Inakla arlenggen kasukama nen, at Yudas Silas imbisak Allah wene yogisasi laguka mende nogo nen, Allah aʼburi yomenogo inendainggen sebelkik, aik wat diyigik, kagasuwogoluk, wene nggogat yogisasi laguka. 33Esigit diluk yogisasi welagukasikmo nen, it Allah aʼburi o Antiokia mende nen, it Yudas Silas imbisak keyagi warogo, it inebe laʼbiya waguka mende yomenogo inoba iniyogoba yabunggane laʼbiyasuka. 34[Mende, at Silas akla nen,
“An puk asigin,” yiluk o Antiokia puk agike.] 35It Paulus Barnabas imbisak nen, o Antiokia etoma puk agukasik nen, it akoni amberek dogalegat inom etoma dogolik, wene ninewe Endaganggok wene pano wene eti yogisigik, yanggul isigik, kagako laguka.
Paulus Barnabas imbisak wenemuk ako lagukasik, inasokondek laguka wene
36O etoma ininggi dogoluk dek wenegenat inom welagukasik nen, Paulus nen Barnabas yogoko dogolik,
“O yi ai ndi ai ninewe Endaganggok wene yogisilik lagoma yomenogo yabunggane luwok o. Lago dogolik, Allah aʼburi ninagarlagi ninirugi yomenogo ninggit diluk werek yiluk, o unggul dombok ninilenggen ʼbiriyalik luwok o,” yiluk yogokike. 37Esigit diluk yogokikemo, at Barnabas nen, at ap endaga Yohanes Markus etnogo wolok lagaluk kagakike. 38Esigit diluk kagakonem, at Paulus nen,
“Dek o. Nit Allah ake ninom kagarik luwogoluk lagosik nen, o Pamfilia nen ninom lalok dek sugulogo waga etnogo, yabunggane wolok lausak dek o,” yiluk yogokike. 39Esigit diluk yogokikemo, imbisak wenemuk nggok akukasik nen, inasokondek laguka. At Barnabas nen, Markus wolok imangge nggu warogo o Siprus wagike. 40Wagikemo, at Paulus nen Silas ayonggo ʼbisikesik wisuwogoluk kagakonem, it Allah aʼburi o Antiokia mende nen,
“Ninewe Endaganggok obabut pano etnogo nen wokisek lowak o,” yiluk keyagi warogo laʼbiya wagukama waguka. 41It etnogo wago dogolik, o propinsi Siria etoma nen mbiyokogo o Kilikia Allah aʼburi yi ai ndi ai nandoko laguka mende yomenogo inendainggen aik warinabik waguka.
Currently Selected:
La’biyaske 15: DNA
Highlight
Share
Compare
Copy
Want to have your highlights saved across all your devices? Sign up or sign in
