La’biyaske 14
14
Paulus Barnabas imbisak o Ikonium dogolik kagako laguka wene
1It Paulus Barnabas imbisak o Ikonium etoma dogolik, o akoni Yahudi mende sembayan yisi lagukama unggisukasik nen, wene esigit dilugat yogisasukama, inebe dogalegat, Yahudi mende inom, Yunani mende inom, wene eti eberogonat yiluk wagangguka. 2Waganggukama, it akoni Yahudi mende amberek nen, wene eti inasuk kol diluk, eberogonat yiluk inakla ambigidek mende nen, it akoni sikmangge mende Allah aʼburi inaʼit asuwagaluk inakla nggagalko laguka. 3Inakla esigit diluk nggagalko nggorlegat, at Paulus Barnabas imbisak ininggi dogalegat o etoma inayuk dek dogolik, wene ninewe Endaganggok kagako lagike wene eti yogisasi laguka. Yogisasi dogolik, Allah obabut pano nen woknisiligogo wene eti,
“Eberogonat,” yiluk diduwagaluk yogisasinem, it nen kagasusak dek mende elalinat kagarinako dogowagaluk, Allah nen inobatnet diyasi lagike. 4Esigit diluk kagako laguka mende, it akoni o kota etoma mende inebe dogalegat minggirlogo, it amberek Yahudi mende werekmangge wagik, it amberek it ap Yesus nen inayonggo ʼbiluk laʼbiyasike mende yomenogo werekmangge wagik, minggikuka. 5Esigit diluk inebe minggikukasik nen, it akoni sikmangge mende inom, Yahudi mende ineugi nggokndek inom, inom dambukogo nen,
“Paulus agarlagi inom yi aik ndi aik kagarinabiluk, inebe nggit oba mondok inasuwok,” yiluk inabok mbalkuka. 6Inabok mbalkukama, it inilu agukasik nen, lo sirlik-mbirlikogo, o agum Likaonia etoma o unggul Listra inom, Derbe inom, o eragalilungge etoma amberek inom, wusa laguka. 7Wusa lagukasik nen, wene pano wene yanggul isasi laguka.
Paulus Barnabas imbisak o Listra inom, Derbe inom dogolik kagakuka wene
8O Listra etoma ap omanggi agoya akla nen endak lago dogolik iyok ut warek endak lagikesik iyok obatne dek nen kolak lagidek korek mondogat welagike. 9Korek dogolik Paulus nen wene yogisasinem asuk kolek werekma, at Paulus nen ilenggen oba ndek-ndek ʼbirogo dogolik, akla nen,
“Ap eti endainggen nenat,
Eberogonat kagat nabigin, yiluk ambekesik werek kigi,” yiluk akla ambasike. 10Esigit diluk ambasikesik, ane nggokogonat yogoko dogolik,
“Kebe mendokogo melasin o,” yiluk yogokikemo, mendokogo melagikesik nen, kolak lagik, wagik, kagakike. 11At Paulus nen esigit diluk kagakikemo, it akoni dogalegat yomenogo inilenggen kasukasik nen, it akoni o Likaonia mende inane paga men yisuka,
“Ap yi inebe walsenak mende, inebe akoni kak kagat lagakasik nen, ninoba wusa wagaka yi,” yiluk inane amitmit luk-luk yisuka. 12Inane esigit diluk yisukasik nen, Barnabas endaga Zeus salkik, nen, wene Paulus nen yisi lagike eti paga, at endaga Hermes salkik, kagakuka. Esigit diluk salinakuka eti, it nen,
“Nit mende walsenak,” yiluk oba panggot diluk dogolik pogorako laguka mende inendaga salinakuka o. 13Esigit diluk salinakukasik nen, ap Zeus indewerek engganengge ago o kota etoma korlanggoma palek welagike mende nen, sapi nggulok mende inom, onggen elokonggen pano mende inom, wolok, o kota etoma unggiligogoma kolagambe mbalekma wagike. Wagikesik akoni dogalegat yomenogo inom nen, Paulus Barnabas imbisak warisawogoluk kagakuka. 14Warisawogoluk kagakonem, it Paulus Barnabas imbisak Yesus nen inayonggo ʼbiluk laʼbiyasike mende yomenogo inasuk kolkukasik nen, togot diyawagaluk, inenggaerek nen iniyom sikmangge mende liʼbik-laʼbakogo laʼbiyalok nen, akoni dogalegat nandorlek werekma inoba mbirirli laguka. Lagukasik nen, inane nggokogonat yogisasi dogolik,
15“Ap yirani. Kit ninggit diluk kagarigogi. Nagarlagi nirugi o. Nit ninebe kit kak akoni mendeat. Mende, kit nen yi mende ndi mende wirlikogo kagarigogi eti togot diyalok nen, kinobabut kwalatluk, kineloke Allah iluk mondok dogoligogo mende eti wogosubagik nen yiluk wene yokisa wago o. At Allah eti, mbogot inom, agat inom, i laut nggok yenggelek inom, yi mende ndi mende mbogot oba, agat oba, ima dogoligogo mende inom, walkasike mende o. 16Paganeat ninakombalak nen kurli ninombae lak inom endak larik wago laguka eta paga, Allah nen,
Yi akoni ndi akoni inunggulowak endaga dombok kagako laguka mende pasik,
Kagako dogonek o. Inoba dombok, yiluk togot diyasi lagike. (Laʼb. 17:24-31; Roma 1:28) 17Esigit diluk mende, it akoni nen, at ebe diduwagaluk, yi mende ndi mende omanggi walkalok dek obarlikmat disikemo dogoligogo mende ʼbuk. At pano dombok kagako dogolik, ninambiri ninelabut togo ninggik, ninakla arlenggen kigik, kagako dogowagaluk, at nen miyo mbogot oba nen wusa ʼbi wagik, niligogo mende eti nausak erlok agonem nggokogonat woknisigik, kagarigogo mende o,” yiluk inasuk wakike. 18Inasuk esigit diluk wakike mende, it akoni dogalegat yomenogo nen sapi arat warisawogoluk kagakukasikmo etnogo nen, inendainggen ninggit diluk sebeluʼbuk kagat lagike mende, wene Paulus agarlagi inom nen esigit diluk yisukama nen, warisau togot diyasuka.
19Esigit diluk kagakukama, it akoni Yahudi mende o Antiokia inom, Ikonium inom, lagukasik akoni dogalegat yomenogo wene eti togot diyalok it werekmangge asuwagaluk inakla nggagalkuka. Inakla nggagalkukama, it werekmangge agukasik, Paulus etnogo ebe nggit oba wakukasik nen, ebe mondogat wako salek, likalok o kota leget abel sikmangge wula ʼbisuka. 20Esigit diluk wula ʼbisukama, it akoni amberek Yesus wene waganggukasik welaguka mende wagukasik nen, eragalilu dagakogo melasi wagukama, ebe melatluk nen, o kota unggisike. Unggisikesik noge yiluk, kubengge Barnabas imbisak o Derbe wusa laguka.
Paulus Barnabas imbisak iniyogoba o Antiokia laguka wene
21O Derbe etoma pano wene yanggul isasi dogolik, akoni inebe dogalegat woginakukama Yesus wene wagangguka. Waganggukama ʼbiyalok, it Paulus Barnabas imbisak yabunggane iniyogoba o Listra inom, Ikonium inom etoma nen, mbiyokogo o agum Pisidia o kota Antiokia duki waguka. 22Alep unggi lago dogolik, akoni Yesus wene yanggul isalok unggi lagukama wagangguka mende yabunggane inobangge duki wago dogolik, inendainggen aik wat digik, inasuk wat digik, kagarik duki wago dogolik, men yogisasuka,
“Wene eberogonat yiluk kinendainggen Yesus oba panggot degep mende eti, kinobatnerogo panggot diluk dogoni o. Nit yabunggane Allah apma mondok doguwogoluk ninoba yi aik ndi aik kasi dogoluk nenat unggugun o,” yiluk yogisilik duki laguka. 23Esigit diluk yogisilik duki lago dogolik o yi ai ndi ai, Allah aʼburi nandoko laguka dombok, ineugi inanggorlem dogowagaluk mendiyalok nen, ininggi omanggi sembayan yuwogoluk kimbiri ninggidek werlegat dogolik sembayan men yisi laguka,
“Yesus ninewe. Kaʼburi inendainggen koba panggot diluk werek mende yi, pagisek dogonok nen yiluk kat kinggimo ʼbogo yi o,” yiluk sembayan yilik duki laguka. 24Duki lago dogolik, o Pisidia nen mbiyokogo, o propinsi Pamfilia wusasuka. 25Wusasukasik, o Pamfilia etoma o kota Perga wene yogisalok nen, o Atalia wusa laguka. 26O Atalia nen, iniyogoba imangge nggu warogo o Antiokia laguka. Etoma nen, esigit diluk kagarik noko dogowagaluk paganeat it Allah aʼburi nen laʼbiya lago dogolik,
“Allah obabut pano etnogo nen wokisek lowak o,” yiluk laʼbiya wagukama esigit diluk kagarik noko lagukasik nen, arat kagatluk iniyogoba yabunggane laguka. 27O Antiokia lalok, Allah aʼburi nandot diyasukasik nen, men yogisasuka,
“Nit Allah ninom nen yigit diluk kagako, ndigit diluk kagako,” yiluk wene mbilelogo yogisasi dogolik men yogisasuka,
“It akoni sikmangge mende wene eti eberogonat yiluk waganuwagaluk, Allah nen su kuwal dekemo erlok waganusak werek o,” yiluk yogisasuka. 28Esigit diluk yogisasukasik, akoni Yesus wene wagangguka mende yomenogo inom ininggi dogalegat welaguka.
Currently Selected:
La’biyaske 14: DNA
Highlight
Share
Compare
Copy
Want to have your highlights saved across all your devices? Sign up or sign in
