La’biyaske 13
13
Barnabas Saulus imbisak inebe pulogo ʼbiyalok laʼbiyasuka wene
1Allah aʼburi o Antiokia nandoko laguka mende yomenogo, it amberek nen Allah wene yogisigik, it amberek nen yanggul isigik, kagako laguka mende inebe ap omanggi Barnabas inom, omanggi Simeon endaga Ebemirli yisi laguka mende inom, omanggi Lukius o Kirene mende inom, omanggi Menahem, Herodes nggok gubernur agarlak imbisak nggogorinakuka mende inom, omanggi Saulus inom, welaguka. 2Dogolik, ininggi omanggi paga Allah aʼburi inom ninewe Endaganggok apma unggiluk, sembayan yuwogoluk kimbiri ninggidek, at pogorako werekma, Allah Agurengge nen yogisasi dogolik,
“Kit nen, Barnabas Saulus imbisak nen an nake kagako dogowagaluk, inayonggo ʼbigima werek eti paga, it inebe pulogo an nake ʼbanino o,” yiluk yogisasike. 3Yogisasikemo nen, kimbiri ninggidek sembayan yisi lagukasik nen, ininggi it Barnabas Saulus imbisak inunggulowak sebelogo laʼbiya waguka.
Saulus Barnabas imbisak nen, it akoni o Siprus mende pano wene yogisa laguka wene
4It Barnabas Saulus imbisak Allah Agurengge nen laʼbiya wagikemo, o Seleukia wusa waguka. Wusa wagukasik nen, o Seleukia etoma nen, o Siprus i enggen mbalekma imangge nggu paga waguka. 5Wagukasik, o Salamis wagukasik nen, akoni Yahudi mende o sembayan yisi lagukama unggiluk, Allah wene yogisilik noko laguka. Yogisilik noko nggorlek, at ap endaga Yohanes Markus etnogo yamagiyasi lagike. 6O Siprus i enggen mbalekma etoma, o unggul dombok noko lagukasik nen, yabunggane o endaga Papos waguka. Wagukasik nen, ap Yahudi mende omanggi endaga Baryesus eti, ebe ubale dogolik, Allah wene salek at enggaerek ane mendeat yogisasi lagike mende werekma waguka. 7O Siprus i enggen mbalekma etoma, ap nggok gubernur endainggen nggagalek mende endaga Sergius Paulus welagikeat. At gurbernur eti, ap ubale eti agarlak. Dogolik, Sergius nen,
“An Allah wene nasuk kolusak warlok,” yiluk, Barnabas Saulus imbisagat inayonggo ʼbisike. 8Esigit diluk inayonggo ʼbisike mendeat, ap ubale Baryesus eti, it akoni Yunani mende inane paga endaga Elimas yisi laguka mende eti nen, ap nggok gubernur eti wene waganiluk endainggen Yesus oba panggot dunogo yiluk, Barnabas Saulus imbisak inane sagaligiluk kagakike. 9Esigit diluk sagaligiluk kagakonem, at Saulus, endaga omanggi Paulus etnogo nen, Allah Agurengge akla nggerlekogo dogolik ilenggen Baryesus oba ʼbirogo dogolik, 10men yogokike,
“Kat kebe Iblis aʼbut yi! Akoni dalinakik, nuket diyigik, kagako mondok dogolik, yi mende ndi mende mot kagasuwogoluk kagakonem, kat nen deget digiluk kagako mondok welagan yi! Ninewe Endaganggok nen, akoni ndil ninabigiluk kolak mot-mot yaʼbinanggike mende, kat nen puk agidegat nggorlot digiluk kagako mondok welagan eti nenaluk. 11Lakan! Esigit diluk kagako lagan eti paga, ninewe Endaganggok nen wene koba ʼbekemo werek o. Eti paga, kat kebe yogondak elalma ake ya kilenggen amum atluk nen, mo eti kilenggen lakigidek dogogin o,” yiluk yogoko nggorlek eranogoat, ilenggen mbuk agike. Mbuk agikesik nen,
“Ta nen ninggi pagogo woknarek ligin,” yiluk akoni inggi pakau kweyaginabik lagike. 12Esigit diluk kagat lagikemo, ap nggok etnogo ilenggen kasikesik nen,
“Wene ninewe Endaganggok ane eti nayuk a,” yiluk pogoratluk wene eti eberogonat yiluk waganggike.
It Paulus agarlagi inom o Pisidia kota Antiokia etoma waguka wene
13At Paulus agarlagi inom o Pafos etoma nen nggu paga o propinsi Pamfilia kota endaga Perga etoma waguka. Wagukasik ap endaga Yohanes Markus etnogo nen, it etoma togot diyalok yabunggane suguluk o Yerusalem lagike. 14Lagikemo, it yomenogo o Perga etoma nen, o Pisidia kota Antiokia unggul etoma dagi waguka. Dagi wagukasik nen, ininggi 7 paga Hari Sabat dogolik, o akoni Yahudi mende sembayan yisi lagukama unggisukasik korek laguka. 15Korek lagukasik werekma, it akoni etoma mende nen, wene Allah nen ninasuk wakike wene etnogo endaga salkik, wene it ap Allah wene yogisasi laguka mende nen kolal mbalkuka mende endaga salkik, yisukama nen, ineugi nggokndek nen Paulus agarlagi inom yogisasi dogolik,
“Nagarlagi o. Akoni yoma inendainggen korle asuwak nen, kit nen wene omanggi werek kalok, yoknisabagik nen yiluk kinayonggo ʼbogo o,” yiluk yisukama, 16at Paulus ebe melatluk nen, wene yogisagaluk inggi siksik yisike. Inggi siksik yisi dogolik,
“Kit akoni Israel mende inom, nen, kit sikmangge mende Allah wene kol diluk kagarigogi mende inom, nagarlagi nirugi o. Wene yigin yi kinasuk kolini o. 17Nit akoni Israel mende yoma ninombae Allah nen, ninakombalak inebe miginakikesik nen, inayonggo ʼbisike. Inayonggo ʼbisikemo, it o Mesir etoma inebe ap kuso negenat werekma, at nen inebe nggogorinakike. Nggogorinakikesik nen, at inggi obatne paga wogisek duki wagike. 18Wogisek duki wagikemo, it o limo akoni inebe dekma etoma mo dagagik wusigik kagako nggorlek, 40 tahun dogolik, at oba nggiluk taʼbokogonat kagako laguka mende, at ane degat obakanini pagisek welagike. 19Pagisek welagikesik nen, o Kanaan wogisek unggi wagikesik, akoni inunggulowak endaga 7 paga nen, inebe mondogat inakukasik nen, it ineyagat mende nit ninakombalak indewerek asuwagaluk wogisasike. 20Esigit diluk kagarinabik wago nggorlek, mo dagagik wusigik kagako nggorlek 450 tahun kak welagukasik nen wogisasike. Wogisasikesik nen, yabunggane at Allah nen ap amberek nen inendema waganggik, wene yogisigik, kagako dogowagaluk, mendiyalok wago lagikesik kurli, ap Samuel Allah wene yogisasi lagike mende etnogo kurliat mendisikemo welagike.
21Kurli eti kurli nen, it akoni yomenogo nen,
Ninewe endaganggok omanggi mendusak warlok, yiluk Allah nggino yogokukama, at nen, ap Kis aʼbut Saul unggulowak endaga Benyamin mende mendiluk wogisasike. Wogisasikemo, at ebe mo dagagik, wusigik, kagako nggorlek 40 tahun ebe ap endaganggok welagike. 22Werekma Allah nen at Saul wusa ʼbiluk nen, obalikmo at Daud endaganggok dogowagaluk, mendiluk wogisasike. Wogisasikesik nen, wene at abok yisi dogolik,
Isai aʼbut Daud yi, an nendainggen kunik mende, an nakla warlok ambiligogo mende kagasuwagaluk yogokonem, ndak-ndak kagako dogusak kigi eti paga wokisigi o, (2Sam. 13:14; Mzm. 89:20=TB 89:21)
yiluk yogisasike. 23Nen omanggi alebat at Allah nen,
Kit akoni Israel mende ndil kinabuwagaluk, at Daud nen endago mende omanggi wokisagin, yiluk abok yogisasike eti kagat, ebe Yesus mendiluk wogisasike. 24At Yesus ebe yabunggane witluk, yabu awan kagakidek werek nggorlek, elokoma Yohanes ndak wagikesik, akoni Israel mende men yogisasi lagike,
Kit weyak kagako lagap mende ʼbukalogo togot diyalok kinobabut kwalatni o. Kwalasumo, an nen ima wusa ʼbinagagin o, yiluk inebe taʼbokogonat yogisasi lagike. 25Yogisasi lagikesik, at nen kagasusak mende arat kagako lagikesik, ilugun oba kagasigiluk, men yogisasike,
Kit nen an ta ambaligogi. Kit nen anggorlem werek eti, ebe an dek o. Mende, kinakla eberek dogoni o. At ebe an nomborlik wisigin o. Wagonem, at ebe ap Nggok, arat o. An nebe elege kagatma, at iyok agut yiluk mende eti, an nen piyalusak erlok dek o, yiluk yogisasike.
26Kit akoni Abraham nen endago mende inom, sikmangge mende Allah wene koluwogoluk kagarigogi mende yoma kinom werek mende inom, nagarlagi nirugi o. Wene ndil ninabusak wene eti Allah nen nit ninoba laʼbi wagama yi. 27Wene laʼbi waga mende eti, it akoni o Yerusalem mende ineugi nggokndek inom nenat, Yesus ebe didigidek. Didigidek dogolik, paganeat it ap Allah wene yogisasi laguka mende yomenogo nen wene kolal mbalogo ʼbisuka mende mbalek werekma, sembayan kibitngge-yogongge yisi dogolik endaga wenakonem inasuk koligogi mende, wene ebe didigidek. Esigit diluk didigidek dogolik, wene Yesus oba ʼbiluk ebe wakuka eti paga, wene paganeat yisuka mende eti ebeat agike. 28It nen,
Wene ninggit diluk oba ʼbiluk wasuwok, yiluk kweyakuka mende, wene oba degat mende, at Pilatus nen wasuwagaluk wogokuka. 29At Yesus pasik,
Esigit diluk kagasugun, yiluk kolal mbalogo ʼbisuka mende eti ndak-ndagat taʼbokogonat kagakukasik, ebe warek o paga nen wusa ʼbi wagukasik nen, oila nggola ʼbisuka. 30Warek esigit diluk nggola ʼbisuka mende, yabunggane Allah nen ilugut disike. 31Ilugut disikemo, it Yesus inom o Galilea nen o Yerusalem wusasuka mende yomenogo inilenggen kowagaluk inelokoma inggi dogalegat melago lagike. Esigit diluk inelokoma melatluk werekma, inilenggen kasukasik, it nen,
Ebe eberogonat ninilenggen kogo, yiluk yogondak akoni Israel mende yogisiligogi. 32-33Yogisiligogi eti, yogondak nit nen wene pano wene eti, kit yokisa wago yi. Allah nen,
Esigit diluk wokisagin, yiluk ninakombalak abok yogisasike etnogo eti ebe, o yogondak nit it nen endago mende welago ya paga Yesus at woknisasikemo wakukama watlagikemo, Allah nen ilugut disike o. Esigit diluk kagasigiluk, endai Mazmur endai nomor 2 paga, Allah nen men yisike,
An Naʼbut, Karat o. Kebe yogondak endakaki o, (Mzm. 2:7)
yiluk yisikemo nen, kolal mbalogo ʼbisuka ndak-ndagat kagat laga o. 34Yesus ebe watlagikesik werekma, Allah nen ilugut disikemo, yabunggane watlatluk pirli asigin dek o, yiluk wene omanggi men yisike,
Esigit diluk kagat kabigin, yiluk, wene an nenggaerek nen yiluk nen, yabunggane asigin dek mende eberogonat Daud abok yogokigi mende eti Karat wokisigin o, (Yes. 55:3)
yiluk yogokike o. 35Nen, omanggi at Daud nen Allah men yogokike,
Kat kenggaerek Kaʼbut kane kologo kagarigogo mende eti, pirli atluk dek asuwagaluk togot digin dek o, (Mzm. 16:10)
yiluk yogokike. 36At Daud eti, agarlagi inom ndak-ndak endak laguka mende inom dogolik, Allah nen,
Esigit diluk kagasuwak, yiluk akla ambasike mende mot-mot kagako lagikesik nen, ebe watlagike. Watlagikemo nen, akombalak inom warek salinakukama ineragalilu sal disukama nen, pirli atluk, dek agike o. 37Esigit diluk mende, at Yesus ebe watlagikesikmo nen, Allah nen suguluk ilugut disike mende etiat, pirli atluk, dek atluk dek o.
38Nagarlagi nirugi o. Wene yi kinilurogo dogoni o. At Yesus Allah nen esigit diluk ilugut disike eti paga, kit weyak kagako lagap mende eti, at nen sagalogo deget duwagaluk yokisaligogo o. 39Yi weyak ndi weyak kagakonem, wene Allah nen Musa ayonggo ʼbiluk inasuk wakike wene etnogo paga, nggorogo ʼbusak erlok dek mende, ninebe dombok ninendainggen Yesus oba panggot dumo, erlok nggorogo ʼbusak o. 40-41Mende, it ap Allah wene yogisasi laguka mende yomenogo nen, men yisuka,
Kit o yogondak werek ya paga, an nen yi mende ndi mende kagakonem, at omanggi nen mot-mot yanggul kisasinem, kit nen eberogonat yiluk didigidek dogolik kinakla kai diligogi mende yi lakani! An nen esigit diluk kagakonem kinilenggen kalok pogorako dogolik, kinebe watlakagun! (Hab. 1:5)
yiluk Allah nen yisikemo kolal mbalogo ʼbisuka eti kak, kit kinoba asunogo yiluk, wene kinasuk panorogo kolko dogoni o,” yiluk yogisasike.
42Wene esigit diluk yogisalok dukisinem, it akoni yomenogo nen,
“Sembayan yabunggane yugun eti paga, wene eti omanggi inom dagakogo yoknisausak o,” yiluk Paulus Barnabas imbisak yogisasuka. 43Yogisasukama, it sembayan yisi lagukama nen dukiluk lagonem, it akoni Yahudi mende inom, sikmangge mende Allah wene waganggukasik Yahudi mende salek welaguka mende inom, inebe dogalegat inomborlik laguka. Lagukama, it Paulus Barnabas imbisak nen men yogisasuka,
“Allah obabut pano nen kagat ninabigogo mende eti, kinendainggen kunik dogolik kagako dogoni o,” yiluk inasuk wakuka.
44Esigit diluk kagakukama, akoni inasuk kol diluk nen, ininggi 7 paga Hari Sabat Allah ake werlegat dogolik sembayan yabunggane yisinem, akoni o unggul etoma welaguka mende inebe omanggindegat puk ago nggorlek, inebe taʼbokogonat ninewe Endaganggok wene inasuk koluwogoluk nandokuka. 45Nandokukama, it ap Yahudi mende yomenogo akoni dogalegat inilenggen iyasukasik uwa mbalogo nen,
“Wene Paulus nen yiligogo eti kinasuk kolusak dek o,” yiluk wene mbalkik, Paulus agarlagi inom inane wene mukogo mberisigik, kagakuka. 46-47Esigit diluk kagakuka mende, it Paulus Barnabas imbisagat inayuk dekogonat dogolik, men yisuka,
“Allah wene eti kit ndak yokisausak obaat yokisa wago mende, kit kinaʼit nen togot diyegesip, kinenggaerek nen,
Nit naberlal-kaberlal kagat ninabusak erlok dek o, yiluk yu kagat, yiligogi eti paga, nit ninewe Endaganggok nen ninayonggo ʼbisi dogolik yoknisasike kagat, kagasugun. At nen,
An nen akoni sikmangge mende liyarinakik, o ilugun oba werek mende ndil inakik, kagasigiluk, isagal yibarlek kak, kit kinebe ʼbinagagi o, (Yes. 42:6; 49:6)
yiluk yoknisasike ndak-ndagat, it akoni sikmangge mende yogisa lugun o,” yiluk yogisasuka. 48Esigit diluk yogisasinem, it akoni sikmangge mende inasuk kolkukasik nen,
“Ninewe Endaganggok nen wene eti pano mondok yisikemo kigi,” yiluk pogorakukasik inakla arlenggen kasuka. Inakla arlenggen kalok nen, Allah nen it naberlal-kaberlal kagarinabigiluk pulinakike mende nen,
“Wene eti eberogonat,” yiluk didisukasik wagangguka. 49Esigit diluk waganggukama nen, o etoma ninewe Endaganggok wene eti wika larik dukisike.
50Esigit diluk wika larik dukisinem, it akoni Yahudi mende nen, kumi ap sikmangge mende inagugi nggokndek Allah wene wagangguka mende inom, it ap o unggul nggokma etoma inendaga werek nggokndek welaguka mende inom, inom nen Paulus Barnabas imbisak mugiyawagaluk inakla nggagalkuka. Esigit diluk inakla nggagalkukama, it nen,
“Kit nit ninaguma yoma dogusak dek o,” yiluk mukogo wula ʼbiyasuka. 51Wula ʼbiyasinem, it Paulus Barnabas imbisak nen, inakla eberek dogowagaluk,
“Kinoba dombok,” yiluk iniyok kola korogo laʼbiyalok nen, o Ikonium unggi laguka. 52Unggi lagukama, akoni o Antiokia etoma mende Yesus wene wagangguka mende Allah Agurengge inakla nggerlekogo unggisikemo inakla arlenggen nggogat kasuka.
Currently Selected:
La’biyaske 13: DNA
Highlight
Share
Compare
Copy
Want to have your highlights saved across all your devices? Sign up or sign in
