La’biyaske 12
12
Allah aʼburi yi aik ndi aik nggokogo kagarinako laguka wene
1Esigit diluk kagako laguka etinem, ap endaganggok Herodes nen Allah aʼburi mende amberek weyagarinabigiluk kagakike. 2Esigit diluk kagakikesik, at Yohanes ewe Yakobus wasuwagaluk agoromi yogisasikemo mbirok oba ebe mondok wakuka. 3Esigit diluk wakukama, at Herodes akla nen,
“An esigit diluk kagako lagi eti paga, it ap Yahudi mende inakla mondok arlenggen kega o,” yiluk, yabunggane Petrus inggi kerle wasuwagaluk agoromi yogisasikemo, pesta roti pikidek mende nasi nggorlek, at inggi kerle wakukaat. 4Esigit diluk wakukasik, o akoni ininggi kerle warogo ʼbiyiligogoma ʼbi laguka. ʼBi lagukasik nen, ap tentara inebe 16 dogolik, alebat inebe 4 nen anggorlem welagik, yabunggane inebe 4 nen anggorlem welagik, kagako dogowagaluk inayonggo ʼbisikesik nen, et Herodes akla nen men ambasike,
“Pesta endaga Paskah, nugun etnogo nalok, Petrus wolok akoni inil oba wene oba ʼbiluk wasuwok nen, inggi kerle waregat dogowak o,” yiluk akla ambasike. 5At Petrus inggi kerle warogo nggola ʼbiluk werek nggorlek, it Allah aʼburi nen sembayan at ake togot digidek kunik-kunigat inendainggen oba nenat mondok yisi laguka.
Allah nen Petrus inggi kerle piyalogo wula ʼbisike wene
6Sembayan esigit diluk yisi nggorlek, at Herodes nen kuben kak Petrus ebe waganogo akoni ininggi paga ʼbigiluk akla ambasikesik, awan werek nggorlek, o etinem kibanggo, ap tentara yomenogo, it inebe amberek su kambema anggorlem werek nggorlek, it inebe mbere Petrus inggi pelak pelak kerle warek noge yisi nggorlek, it abel pelak pelak dogolik kerle ilugun ininggi paga yirlelek welaguka. 7Esigit diluk werekma, malaikat ninewe Endaganggok nen yonggo wusa ʼbiya wirigogo mende yomenogo omanggi nggoma nen waga salek etoma melasi wusa wagonem, o ngganggok mbalekma etoma mondok liya agike. Esigit diluk liya agikemo, at malaikat etnogo nen, Petrus iluk asuwagaluk aborlogot kasi dogolik, men yogokike,
“Ibat kiluk asin o,” yiluk yogokikemo melagonem, mbisuwemanggen etnogo inggi paga nen abusagat pesokogo wusasike.
8Wusasinem, at malaikat etnogo nen, men yogokike, “Serlok yikik, kiyok agut yikik, kagasin o,” yiluk yogokike. Esigit diluk yogokikemo yikikemo, at malaikat etnogo nen,
“Su sikmangge mende yikogo nen, nomborlik eme o,” yiluk yogokikemo 9omborlik dukisike. Dukisi dogolik, at malaikat etnogo nen eberogonat kagakike mende, at Petrus obake mbalek dogolik,
“Naʼbingganggo kiligogo a,” yiluk akla ambasike. 10Ap tentara inebe akmangge anggorlem welaguka mende yomenogo werek nggorlek, ineragalilungge dukisukasik, amberek sikmangge negen inanggorlem welaguka yomenogo esigit dilugat ineragalilungge dukisukasik, su sikmangge o silimo dukiligogoma, dukuwogoluk kagakonem, su besi mende etnogo abusagat kuwalagikemo, dukisuka. Dukisukasik nen, kolagarlem lago dogolik, at malaikat etnogo Petrus togot diluk nggoma lagike salek nalagike.
11Nalagikemo, at Petrus akla ebediluk men ambasike,
“I. At Herodes obatne paga paknarek werekma, it akoni Yahudi mende taʼbokogonat nen,
Esigit diluk kagasugun, yiluk nabok mbalko nggorlegat, malaikat ninewe Endaganggok nen eberogonat yonggo wusa ʼbi wagama kerle piyal nake kigi,” yiluk didisike. 12Esigit diluk didisikesik nen, kwe Maria ap endaga Yohanes Markus eti agoya aguma etoma akoni inebe dogalegat nandokukasik nen, sembayan yisinem lagike. 13Lagikesik nen, su kambema su mbumbu kasinem, it yomenogo nen,
“Ta nen mbukiligogo,” yiluk korlak inanduwanengge mende endaga Rode eti ʼbika duki lagike. 14Ilenggen ʼbika duki lagikesik, Petrus ane enggagat didiluk, akla arlenggen nen, su kuwal kigidegat togot diyalok mbirirli unggisikesik nen,
“Petrus su kambema wagasi werek o,” yiluk yogisasike. 15Esigit diluk yogisasikemo, it nen,
“Iya. Korlak yi kunu-gunu agan kigi,” yiluk yogokukama, at nen,
“Dek o. Eberogonat o,” yiluk ane obatnerogo yisike. Ane obatnerogo yisikemo, it nen,
“Eti kalok, malaikat Allah nen yonggo wusa ʼbiya wirigogo mende yomenogo, omanggi Petrus ake wusa ʼbi waga mende a,” yiluk yisi nggorlek, 16at Petrus ebe su kambema dogolik, inggi nen su mbumbu kasi mondok welagike. Mbumbu kasi mondok welagikemo nen, it yomenogo nen su kuwalogo inilenggen wula kasuka mende, Petrus werekma kasukasik, pogorakuka. 17Pogorakonem, at nen,
“Kinane yugup o,” yiluk inggi liyaʼbisike. Inggi liyaʼbisikesik nen,
“Ninggi kerle warek werekma, ninewe Endaganggok nen piyalogo wula ʼbani wagama wagi o,” yiluk wene mbilelogo yogisasike. Esigit diluk yogisasikesik nen,
“Yakobus inom, nagarlagi nirugi Allah aʼburi amberek inom, wene yi yogisa lano,” yiluk yogisalok nen, at ebe o werlekmangge lagike.
18Esigit diluk dukisikemo, noge yiluk kubengge o wi disikemo nen, it ap tentara Petrus anggorlem welaguka mende yomenogo nen,
“Petrus etnogo ebe ngga laga,” yiluk inaneyak nggogat sagalkuka. 19Inaneyak sagalkukama, at nggok Herodes etnogo nen Petrus ebe kweyasuwagaluk ap amberek yogisasikemo kweyakuka mende, ebe degat nen, it ap tentara anggorlem welaguka mende yomenogo inendema wagandiluk nen, inebe mondok inasuwagaluk agoromi inayonggo ʼbisike. Inayonggo ʼbisikemo inebe inakukama, at Herodes ebe o Yudea nen, Kaisarea dagi wagikesik welagike.
At Herodes ebe watlagike wene
20O etoma dogolik, it akoni o Tirus inom, Sidon inom inoba at Herodes etnogo akla agaga nggogat dagasike. Akla agaga nggogat dagasikemo, it taʼbokogonat inebe dambukogo nen,
“O nit werekma yoma, kimbiri ap nggok Herodes werekma nen onggo mbalogo pano waganigogoma,” yiluk ap endaga Blastus, Herodes anduwanengge dogolik yi mende ndi mende at aguma mende inggi pago welagike mende eti oba lagukasik, it werekmangge asuwagaluk, at ndak akla nggagal kuka. At ndak akla nggagal kukasik nen, yabunggane Herodes inom dambuluwogoluk oba unggisukasik yogokuka. 21Yogokukama, at Herodes nen,
“Nininggi eti paga nen dambulugun,” yiluk inggi wenagogo wene yogisasike. Wene yogisasike paga ndak-ndak agikemo, at nen su ap nggokndek yirigogo mende yikikesik, wene inasuk wako dogolik o mberlagoma korek dogoligogoma korek lagikesik, inasuk wasigiluk wene erlo wula ʼbisike. 22-23Esigit diluk wula ʼbisikesik inasuk wakonem, it akoni dogalegat yomenogo nen,
“Ap yi, ane akoni inane kak yiligogi dek. At ane walsenak dogoligogo mende ane kak yiligogo,” yiluk pogorakuka. Esigit diluk pogorakukama eranogoat malaikat ninewe Endaganggok nen yonggo wusa ʼbiya wirigogo mende yomenogo omanggi wusa wagikesik,
“At Allah pogorakidek enggaerek pogorakasike,” yiluk Herodes ebe wanggo akla yukat disikemo ebe mondok watlagike.
24Esigit diluk kagat lagikemo, Allah wene wikakogo kagat lagikesik, nggok agike. 25Esigit diluk nggok ago nggorlek, it Barnabas Saulus imbisak nen, akoni Yerusalem mende arat yamagiyalok nen, iniyogoba wisuwogoluk, ap endaga Yohanes Markus etnogo wolok waguka.
Currently Selected:
La’biyaske 12: DNA
Highlight
Share
Compare
Copy
Want to have your highlights saved across all your devices? Sign up or sign in
