2Yohanes 1
1
Keyagi warinakike wene
1-2An nen, Allah aʼburi kinanggorlem dogowagaluk, at nen mendanggike mende kinewe etnogo nen, kit Allah aʼburi endak kinakike mende kinebe, kwe omanggiat mende ebe Allah nen mikike mende eyagi inom negen ma, wene yi keyagi warogo kolal mbalogo kinoba laʼbi wagi o. Kinebe eberogonat kinaʼbuwa o. An narligat nen kinebe kinaʼbuwa werek ʼbuk. It inebe taʼbokogonat ninom ebe wene yogondak ninakla dogoluk yabunggane mondok-mondogat dogogin mende etnogo waganggukasik inilu aguka mende nen kinaʼbuwa kegaat o. 3Eti paga, nagarlagi nirugi o. Nit ebe wene waganiluk, nit-nit naʼbuwa-kaʼbuwarogo werekma, ninombae Allah aʼbut Yesus Kristus imbisak inobabut pano etnogo nen pano mende woknisigik, ninaʼbuwa kigik, ninendainggen kambugut dinanggik, kagako dogowak o.
“Yesus nen wene erlo paga yanggul nisasike wene eti oba dukogo kagako mondok dogusak,” yiluk yogisasike wene
4Kit kinebe, kwe omanggiat mende eyagi inom negen dogolik, kinebe amberek ninombae Allah nen ebe wene ninasuk wakike etnogo ndak-ndagat kagarigogi mende kinaren mbalkirik, nakla arlenggen mondok kiligogo o. 5Eti paga, niru o. Wene ngget mende kolal mbalogo keyagi kinomat werekma kinoba laʼbi wagi ʼbuk. Dek o. Nit ebe wene eti didisugumo, at Allah nen nit-nit naʼbuwa-kaʼbuwarogo dogowagaluk erlo paga nenat ninasuk wakikemo ninilu mende kolal mbalogo kinoba laʼbi wagi o. 6Nit-nit naʼbuwa-kaʼbuwa dogusak eti ebe, wene Allah nen ninasuk wakike wene etnogo motogo kagako dogusak etiat o. Wene ninasuk wakike eti, ebe yi,
“Kit-kit naʼbuwa-kaʼbuwarogo kagako dogono o,” yiluk erlo paga nen ninasuk wakikemo kolkugu eti kagat kagako dogusak o. 7Esigit diluk kagako dogusak eti, it akoni inebe dogalegat nen,
“Yesus Kristus eti abat endak lasi wagidek,” yiluk, nuket diyiligogi mende inebe selekma agakasik agat oba yi ai ndi ai taʼbokogonat liligogi eti paga, naʼbuwa-kaʼbuwarogo kagako dogusak yigi o. It eti inebe, Kristus inom mondok weyak dogolik akoni nuket diyiligogi mende etnogoat o. 8Nen, nit nen kit kagat kinako lagagu etnogo ake, kit amberek onggo waganggidek nuk asunogo yiluk, taʼbokogonat waganubagik nen, kinobabut kwalogo dogono o. Dogolik Allah nen,
“Kit onggo wokisagin,” yiluk wene abok yoknisasike etnogo, kit amberek nuk agidek taʼbokogonat korlabagik nen, kinobatnerogo kagako dogono o. 9Ta nen wene Kristus nen yanggul nisasike wene eti paga dukogo kagakidek, ninat mende kagarigogo kalok, Allah ebe indewerek agidek werek o. Esigit diluk mende, ta nen wene Kristus nen yanggul nisasike wene eti paga dukogo kagako dogogin kalok, ninombae Allah inom, aʼbut Yesus inom, imbisak indewerek agasik werek o. 10-11Akoni amberek nen wene Kristus nen yanggul nisasike wene dek, ninat wene yanggul kisa wagonem, ta nen akoni inobabut esigirlik mende keyagi warogo aguma wolok unggisinem, at obabut weyak kagarigogo mende eti obabut korlaligogo eti paga, kit nen akoni inobabut esigirlik mende keyagi warogo kinaguma wogisek unggusak mondok dek o.
Wene ilugun oba arat keyagi warinakike wene
12Wene dogalegat kinoba laʼbi wisusak werek mende, disu ambusu paga kolal mbalusak, naʼit o. Ninakla arlenggen kasi lago mende eti arlenggen ebeluk kuwogoluk, omanggimo wenenggak ninom ninilka kunogo yuwogoluk, an nebe kinoba wisigin ambaligogo o.
13Kwe omanggi Allah nen mikike mende, eyagi nen inagoya agake ebe keyagi wasu kak, it Allah aʼburi yoma mende nen, kit keyagi watkinaka o.
Currently Selected:
2Yohanes 1: DNA
Highlight
Copy
Compare
Share
Want to have your highlights saved across all your devices? Sign up or sign in
