3Yohanes 1
1
Gayus keyagi wakike wene
1Gayus nagarlak o. An nen Allah aʼburi inanggorlem dogowagaluk mendanggike mende kinewe etnogo nendainggen oba nen kebe eberogonat kaʼbuwa werek, yiluk, wene yi kolal mbalogo koba laʼbi wagi o. 2Nagarlak o. Kat kendainggen Allah oba panggot diluk dogolik pano werek eti kagat, koba u dek pano dogolik yi ake ndi ake pano kagako dogonok nen yiluk, sembayan kat kake yiligogo o. 3Kat nen ebe wene kasuk kologo pano kagarigogon eti paga, it Allah aʼburi nagarlagi nirugi amberek noba wagakasik, men yokneka,
“At nen ebe wene pago dogolik pano motogo kagarigogo,” yiluk kabok yoknekama nasuk kolkirik nen, nakla arlenggen mondok kiligogo o. 4Esigit diluk yisinem, an nen yi ake ndi ake nakla arlenggen ʼbugurlagat negen ambaligogo mendeat, kit kinebe an naʼburi nen ebe wene pago dogolik, pano motogo kagakonem nasuk kol diluk nen, nakla arlenggen mondok nggogat kiligogo o.
Gayus pogorakike wene
5-7Nagarlak kebe kaʼbuwa o. Kat kaʼit agidek Allah aʼburi ninagarlagi ninirugi inebe kilu mende konggodek mende taʼbokogonat yamagiyaligogon mende nen,
“At nen nit ninaʼbuwa kalok esigit diluk wokniseke,” yiluk Allah aʼburi yoma mende, yogisa wagakama nasuk kolki o. Esigit diluk kagaken eti kak, it eti nen Kristus ake akoni amberek wene inonggodek mende yogisa lagonem, it eti nen yi mende ndi mende omanggi wogisigidek mende, kat nen Allah akla ambaligogo kak yamagiyalok laʼbiyasi dogumo, pano o. 8It eti ebe wene Allah wene etnogo ake kagarigogi eti, nit ninom nenat kagasu kak kagako dogowak nen, yamagiyasi doguwogat o.
Diotrepes Demetrius imbisak inake yogokike wene
9An nen kit Allah aʼburi inake kolal ʼberorlagat mbalogo kinoba laʼbi wagagi mende, at Diotrepes akla nen,
“An Allah aʼburi inewe nggok kagat lasu warlok,” yiluk ambiligogo mende etiat, an nane kologo kagarigogo dek o. 10Esigit diluk kagarigogo eti, omanggi enggalat nit ninabok weyak yiligogo. Esigit diluk yisi dogolik, akla nen,
“An kagarigogo eti ʼbugurlagat. Nakla nen erlok dek. Yabunggane omanggi inomat kagasigin o,” yiluk ambasi dogolik, it Allah aʼburi amberek wagonem, at enggaerek nen woginakidek dogolik, it amberek nen woginabuwogoluk kagakonem mberisalok, inebe Allah aʼburi nandorligogoma nen mukogo wula ʼbiyaligogo eti paga, an nebe witluk at kagarigogo mende eti diduwagaluk enggarli wasigin o.
11Nagarlak o. Kebe kaʼbuwa o. Kat nen, it akoni inobabut weyak kagarigogi mende eti inobabut waganggup o. At te, it inobabut pano kagarigogi mende kalok, inobabut waganggo dogono o. Ta nen obabut pano dombok kagarigogo mende eti, ebe Allah aʼbut mendeat, ta nen obabut weyak dombok kagarigogo mende kalok, at nen Allah ebe ilenggen kigit dek onggodek o. 12Esigit diluk mende, at Demetrius akeat, akoni taʼbokogonat inom, at Allah eberogonat dombok yiligogo etnogo inom, an ninom,
“At pano kagarigogo,” yiluk abok pano yiligogi. At abok yiligogi eti, eberogonat pano yiligogi eti, kit kinilu o.
Wene ilugun oba arat keyagi warinakike wene
13An nen wene dogalegat koba laʼbi wisusak werek mende, disu ambusu paga kolal mbalogo koba laʼbi wisusak naʼit o. 14An nebe ibat-ibat koba witluk wenenggak ninom ninilka kunogo yugun o, yiluk ambaligogo o. 15At Allah obabut pano etnogo nen kendainggen kambugut dagasi dogowak o. Nagarlak. Nen, it ninagarlagi ninirugi yoma mende ninom kunik werek mende nen keyagi watkakaat o. Nen, nit ninagarlagi ninirugi ninom kunik mende o etoma werek mende,
“At nen keyagi watkinake,” yiluk inebe dombok inendaga ʼbikigik yogisano o. Nagarlak.
Currently Selected:
3Yohanes 1: DNA
Highlight
Copy
Compare
Share
Want to have your highlights saved across all your devices? Sign up or sign in