1Yohanes 3
3
“Allah aʼburi inom, Iblis aʼburi inom, enggagat arigogi,” yiluk yogisasike wene
1At Allah nen,
“It yi an naʼburi,” yiluk endak ninakikemo eberogonat nit ninebe at aʼburi werek. Esigit diluk werek eti paga, ninebe at ninaʼbuwa mondok dogoligogo eti kani! Esigit diluk mende, it akoni agat oba mende inobabut inikok mende yomenogo nen Allah ebe inonggodek eti paga, nit ninebe inonggodegat o. 2Nagarlagi, nirugi, kinebe kinaʼbuwa o. Yogondak nit ninebe Allah aʼburi werek mende, yabunggane ninebe dogogun mende selekmat digidek awan limago werek o. Esigit diluk mende, nit ninilu, Yesus ebe yogondak werek mende ninilenggen dikogo kugun eti paga, at wisigin etinem ebe wagonem, nit ninebe at ebe werek eti kagat, kagat lasugun o. 3Nit ninakla nen,
“Esigit diluk kagat lasugun,” yiluk oba eberek dogoligogi mende ninebe dombok nen, at Kristus enggaerek ebe nggarelek dogoligogo eti kak, nit esigit dilugat nggarelasi dogusak o.
4Nen, akoni nen weyak kagarigogi eti, Allah weneat sagaligogi eti paga, ta nen weyak kagarigogo kalok, Allah weneat sagalogo kagarigogo. 5At Kristus enggaerek weyak kagakidek dogolik, nit weyak kagarigogi mende sagalogo deget diyagaluk ebe selekmaat wagike eti kinilu o. 6Eti paga, nit at ninom kunik mondok werek mende, ninebe dombok weyak kagako mondok dogoligogi dek. Mende, it akoni amberek weyak kagako mondok dogoligogi mende inebe dombok, at ebe inilenggen kigidek inonggodegat werek o.
7Naʼburi o. It akoni amberek nen nuket dinagunogo yiluk kinobabut kwalogo dogono o. Ta nen obabut motogo kagarigogo kalok, at Kristus obabut motogo kagarigogo eti kagat, kagako werek o. 8Nen, at omanggi nen obabut weyak kagako mondok dogoligogo kalok, at Iblis obabut erlo paga nenat weyak kagarigogoma nogo nen, at eti ebe Iblis aʼbut werek o. Mende, at Allah aʼbut selekmaat wagike eti, at Iblis obabut kagarigogo mende eti, mondok deget diyagaluk wagike o. 9Nen, akoni Allah nen endaginabigogo mende inebe dombok, at obabut waganiluk kagarigogi eti paga, weyak kagako mondok dogusak dek. Inebe Allah aʼburiat dogolik weyak kagako mondok dogoligogi dek o. 10Allah aʼburi inom, Iblis aʼburi inom, ninendainggen enggerlogo inobabut enggagat kagat larigogo yi. Ta nen obabut motogo kagakidegat, agarlagi irugi inaʼbuwa kigidegat, kagarigogo kalok, at eti ebe Allah aʼbut dek o.
“Kit-kit naʼbuwa-kaʼbuwarogo dogono o,” yiluk yogisasike wene
11Allah nen,
“Kit-kit naʼbuwa-kaʼbuwarogo dogono o,” yiluk yoknisasike mende, akoni amberek nen yokisasukama erlo paga nen kinasuk kolkigip etiat o. 12Nit nen, at Kain ebe Iblis obabut weyak mende eti, aʼbut agikesik enggaerek agot mende wakike eti kak, kagasusak dek o. At nen agot wakike eti, nenaluk wakike. At kagako lagike mende nggorlo mondok nen, agot kagako lagike mende mot mondok, eti paga wakike o.
13Eti paga, nagarlagi nirugi o. Akoni agat oba mende nen, kit inaʼit mondok kagat kinako kalok,
“Nayuk o,” yiluk kinendainggen pikup o.
14Allah nen ninebe watlarigogoma nen wokninabiluk iniluk dogoligogoma ʼbinanggemo werek yiluk, nit-nit ninagarlagi ninirugi ninom naʼbuwa-kaʼbuwarogo werek eti paga didiligogi o. Eti paga, ta nen akoni amberek inaʼbuwarogo dek, aʼit dogoligogo mende eti, ebe watlarigogoma etomaat werek o. 15Inagarlagi inirugi inaʼit mondok dogoligogi mende eti, it inebe dombok akoni inarigogi mendeat o. Nen, it akoni inarigogi mende eti inebe dombok naberlal-kaberlal indewerek agidek mondok werek o, yiluk ninilu o. 16At Kristus nen ndak nit ninaʼbuwa ambasikesik, ebe nit ninake eramenat watlagike eti paga, nit nen it akoni amberek inaʼbuwarinabigogi wene eti didiligogi. Didisi dogolik, at kagakike eti kagat, nit ninagarlagi ninirugi inebe inaʼbuwa nen, ninebe it inake watlasusak panoat o. 17Mende, ta nen at amende yi mende ndi mende agat oba mende ʼbiluk dogolik, agarlak iru omanggi yi mende ndi mende inggi dek werekma, ilenggen kalok, omanggi wogokidek endainggen aʼbet ago kalok, at eti obabut, Allah nen ninaʼbuwa kiligogo eti negen werek ambegep? Mondok dek o. 18Eti paga, naʼburi o. Nit nen akoni amberek inaʼbuwa kigit dek dogolik, ninambe pagaat,
“Inaʼbuwa ambasi doguwok o,” yiluk ninane paga yisi dogusak erlok dek o. At te, inebe inaʼbuwa ambalok nininggi paga nen eberogonat yamagiyasi doguwok o.
“Nit Allah ilka paga ninayuk dek dogusak,” yiluk yogisasike wene
19-20Nit nen ninobabut esigit diluk kagako dogolik, ninakla nen,
“Nit ninebe Allah ebe mende aʼburi werek,” yiluk didusak. Esigit diluk didisi dogolik, nit weyak kagako, yiluk ninakla anggin werek kalok, nit ninebe erlok dek mende, at Allah arligat, ebe nggok dogolik, yi wene ndi wene taʼbokogonat ilu dombok dogoligogo, yiluk, at ilka paga ninakla te ninayuk dekogonat dogusak o. 21Eti paga, nagarlagi nirugi, kinebe kinaʼbuwa o. Nit ninakla nen,
“An weyak omanggi kagaki,” yiluk wene munini ebekidek, ninakla te werek kalok, at elokoma ninayuk dekogo dogolik, 22at nen wene ninasuk wakike wene motogo kagakik, at ilka paga akla ambasi ndak-ndagat kagakik, kagarigogi eti paga, nit yi mende ndi mende nggino yogokonem, at nen woknisiligogo o. 23At nen wene ninasuk wakike eti ebe,
“Kit kinendainggen an naʼbut Yesus Kristus oba panggot diluk, at nen yokisasike eti kagat, kit-kit naʼbuwa-kaʼbuwarogo dogono o,” yiluk ninasuk wakike o. 24Nit Allah nen wene ninasuk wakike wene eti kologo motogo kagarigogi kalok, at Agurengge woknisasikemo ninakla werek, eti paga, nit at ninom kunik, nen, at nit ninom kunik werek, yiluk didiligogi o.
Currently Selected:
1Yohanes 3: DNA
Highlight
Copy
Compare
Share
Want to have your highlights saved across all your devices? Sign up or sign in
