1Korintus 8
8
Ngganengge anggo warigogi wene
1Kit nen,
“Ngganengge anggo warigogi eti, wene erlo yigit diluk yiluk ninilu arlek o,” yiligogi eti, nit didogo. Mende, wene esigit diluk inilu dogolik, inenggaerek nen pogorakiligogi mende, akoni inebe inaʼbuwa dogolik kagarigogi kalok, inendainggen korlerinabigogi o. 2At omanggi akla nen ambasi dogolik,
“An wene arat nilu,” yiluk ambiligogo mende, at dikogo ilu asusak mende, awan onggodek dogolik yiligogo o. 3Esigit diluk mende, at omanggi nen, Allah ebe endainggen kunik kalok, Allah nen ap eti ebe ilu o. 4Ngganengge anggo warigogi eti, ngganengge agat oba mende yoma ebe dek mendeat, yiluk ninilu. Ninombae Allah ebe omanggiat. Omanggi mondok dek o. 5It akoni yoma nen yisi dogolik,
“Nit, ninombae oba ninendainggen panggot diluk werek ninausa mende yiat o,” yiluk mbogot oba mende ake inom, agat oba mende ake inom, yiligogi o. Esigit diluk yiligogi eti, inausa mende dogalegat werekma, endaga werek dogalegat werek o. 6Esigit diluk mende, nit ninombae Allah ebe omanggiat. Nin dek. Yi mende ndi mende taʼbokogonat at nen walkasikemo ninebe at akeat werek. Esigit dilugat, ninewe Endaganggok Yesus Kristus ebe omanggiat o. Yi mende ndi mende taʼbokogonat Allah nen walkasike eti, ebe at Yesus nen walkasikesik, ninebe at nenat ndil ninakikemo niniluk werek o. 7Mende, wene eti akoni taʼbokogonat inilu ʼbuk. It amberek alebat inendainggen ngganengge oba panggot diluk dogolik pogorako lagukasikmo nogo nen, yabunggane wam ngganengge anggo warek mende mbalek nonggo dogolik, oba eberigogi. Inendainggen anggut dogolik nasinem, inakla weyak arigogo. 8Yi mende ndi mende niligogo mende eti nen, Allah oba woknisek ligin dek o. Nit ninggidek togot dugun kalok, nuk asugun dek. Nen, nugun kalok, omanggi sabusagun degat. 9Kit yugunat nausagat mende, nasinem, it akoni amberek inendainggen anggut mende weyak asunogo yiluk, kinobabut kwalogo dogono. 10Kat omanggi nen, wene eti kilu dogolik o wam ngganengge anggo warigogoma unggiluk kebe korek latluk nigin kalok, at omanggi endainggen anggut mende nen ilenggen kiyalok akla nen,
“An omanggi niginat o,” yiluk akla nggagalasigin dek nogo? Akla nggagal atluk niginat o. 11Kat nen,
“An wene nilu o,” yiluk esigit diluk kagasigin eti paga, kagarlak omanggi endainggen awan mende ake Kristus watlagike mende, kat nen weyagat digin o. 12Kinagarlagi kinirugi inendainggen awan mende inil limagogo weyagarinakik, inakla nggagalkik kagarigogi eti, Kristus ebeat il limagogo kagarigogi o. 13Eti paga, niligogo mende eti paga, an nagarlak ebe weyagat dunogo yiluk, at ake an wam ngganengge anggo warek mende mbalek ninggidek mondok togot diyasi dogogin o.
Currently Selected:
1Korintus 8: DNA
Highlight
Share
Compare
Copy
Want to have your highlights saved across all your devices? Sign up or sign in
