1Korintus 9
9
Allah nen akoni inayonggo ʼbisike mende dombok kagako dogusak wene
1An nasokneat werek dek nogo? At Allah nen nayonggo ʼbiluk laʼbani wagike dek nogo? Ninewe Endaganggok Yesus ebe an nilenggen kigidek nogo? Ninewe Endaganggok nimbisak kunik dogolik eyabu kagaki mende, kinebe werek eti dek nogo? 2It akoni amberek nen an nabok yisi dogolik,
“At Paulus Kristus nen ayonggo ʼbigidek o,” yiluk yisi kalok, kit nen, esigit diluk yusak dek. An nayonggo ʼbiluk laʼbani wagikemo wagagi yiluk, kit kinebe ninewe Endaganggok kinom kunik werek eti paga enggagat didanusak o. 3Akoni nen nabok weyak yisi nggorlek, an nen onggo yigit diluk yogisaligogo,
4“An Allah eyabu kagarigogo eti pasik, ninggi onggo kimbiri woknikik, i woknikik kagakonem, korlausak dek nogo? Korlausagat o. 5Nen, it ap amberek Allah nen inayonggo ʼbiluk laʼbiya wagike mende inom, ninewe Endaganggok agoromi omborlik mende inom, at Kepas inom, inagugi wogisek liligogi eti kak, an narligat, nage Allah aʼbut mende wolok noko dogusak dek nogo? 6At te, it eti yabu waganggidek werlegat werek nggorlek, an Barnabas nimbisak ninarligat nen yi mende ndi mende nininggi paga nen set walogo togot diyausak ambegep? 7Ap tentara mende ineugi nggokndek nen inagoromi wim abuwogoluk inayonggo ʼbisinem, it inenggaerek nen ininggi onggo kweyagogo abigogi nogo? Dek o. Nen, it amberek nen anggur ai yaʼbiluk nen, enggen yikonem amberek inenggaerek niligogi dek nogo? At te, it amberek inanggo domba dogalegat pagisek dogolik irlak ambusu amberek inenggaerek niligogi dek nogo? Niligogiat o,” yiluk yokisiligogo. 8An wene yigi eti, nit akoni nen kagarigogi mende oba lisogo yigi mende, ebe Allah nen wene ninasuk wakike mende etnogo paga eti imbisak ndak-ndagat yigidek nogo? Yisikemo nenat yigi o. 9Wene Allah ne ninasuk wakike wene etnogo paga, at Musa nen yogisasi dogolik, men yisike,
“Gandum enggen mende sapi nggulok iyok nen olin warogo enggen yibiluwagaluk ʼbiluk nen, enggen amberek at nowak nen ambe kerle ndetnokogo wakup o,” (Ul. 25:4)
yiluk yisike eti, at Allah nen sapi eti endainggen kunik nen yisike nogo? Dek o. 10Nit akoni nen yabu waganggik, enggen mbalkik, kagako dogolik,
“An omanggi nigin o,” yiluk ninakla arlenggen kasi dogolik yabu waganggik, enggen mbalkik, kagarigogi eti paga, wene eti nit ninakeat yisikemo kolal mbalek werek o. 11Ai yarigogi kak, wene kinendainggenma yakugu o. Nen, ebe endasu kak, kit nen yi mende ndi mende agat oba mende woknisamo, eti dogalegat nogo? Dek o. Erlogat woknisausak mendeat o. 12Kit nen, it amberek mende esigit diluk wogisausak erlogat kalok, nit ebe indewerek mende amberek woknisausak dek nogo? Woknisausak erlogat o,” yiluk yogisaligogo.
Esigit diluk mende, nit amberek woknisawagaluk yiligogo dek. Pano wene Kristus kagakike wene eti, nit nen yogisilik lagonem agolak mbalunogo yiluk, yi mende ndi mende amberek woknisausak yiluk yigidek ninobakanini togot diligogi. 13It ap Allah ago palek indewerek dogolik yabu etoma kagako dogolik, inambiri Allah aguma mende niligogi yiluk, kinonggodek nogo? Nen, Allah anggo wat diluk kali kunigogoma kunggo dogolik esigit dilugat ilugun mbalogo it niligogi yiluk, kinonggodek nogo? 14Eti kagat, at ninewe Endaganggok nen ninasuk wako dogolik,
“It akoni nen pano wene yogisilik lagonem, it amberek nen pano wene eti alisikogo inambiri melagisausagat o,” yiluk yisike o. 15Esigit diluk yisike mende, an nen pano wene alisikogo esigit diluk waganggidek dogoligogo mende. An nake esigit diluk woknisuwagaluk wene yi kolal mbalogo laʼbi wagi ʼbuk. An esigit diluk woknisuwagaluk kagakidek welagi yiluk pogorakaligogo mende yi, at omanggi nen nane deget dusak, naʼit. An nebe watlasumo, pano. 16Pano wene yogisilik liligogo eti, yogisausak mendeat yogisilik liligogo eti paga pogorakausak mondok dek o. Yogisigidek togot dumo, iya. An nebe weyak kagat nabusakma. 17An esigit diluk yogisilik liligogo eti, an nakla nen nggagalogo yogisilik noko dogolepma, ninggi onggo woknokonem, waganggo dogolep o. Mende, an nakla nen nggagalkidek werekma, Allah nen nayonggo ʼbiluk indewerek ʼbanggike eti paga onggo dek yogisilik liligogo o. 18Eti paga, an ninggi onggo nena mende woknisusak? Eti ebe yi. Onggo woknisu kak, pano wene eti onggo dek werlegat yokisilik noko dogolik, nakla pano werek o. Esigit diluk yogisasinem, onggo woknisusak ndak-ndak mende, esigit diluk amberek woknokonem waganggidek dogoligogo eti pano.
19An akoni inanduwanengge werek ʼbuk. Nasokneat werek mende, akoni inebe dogalegat Kristus ake woginabigiluk, akoni taʼbokogonat inanduwanengge atluk liligogo o. 20Akoni Yahudi mende Kristus ake woginabigiluk an nobabut Yahudi mende inobabut waganogo kagarigogo. Nen, akoni wene Allah nen ninasuk wakike wene at Musa nen yogisasike mende etnogo, an nen kolek dogusak dek mende, it amberek kolek dogoligogo mende Kristus ake woginabigiluk, an nobabut wene eti nasuk kolek dogoligogo mende salek kagarigogo o. 21Nen, it amberek wene Allah nen ninasuk wakike wene at Musa nen yogisasike mende eti, inasuk koligogi dek mende amberek Kristus ake woginabigiluk, an nobabut wene eti kolkidek salek werek o. Eti an wene Kristus nen ninasuk wakike wene eti kolek mondok dogolik, wene Allah nen ninasuk wakike wene eti an kolkidek dogoligogo ʼbuk. Kolek dogoligogoat o. 22It akoni inendainggen awan mende Kristus ake woginabigiluk an nobabut nendainggen awan mende salek werek. It akoni taʼbokogonat inobabut kagarigogi dombok kagarigogo eti, it mende amberek ndil inabigiluk esigit diluk kagarigogo o. 23An it akoni taʼbokogonat inobabut esigit diluk waganogo kagarigogo eti, it ninom pano mende indewerek asuwogoluk pano wene eti pasigat kagarigogo o.
24Ta ae aʼbusuk werek ta ae aʼbusuk werek luwogoluk, inebe lugun mende eti inebe taʼbokogonat liligogi mende, omanggi arligat lalokma onggo pano mende wogorigogi yiluk kinonggodek nogo? Eti kagat, onggo pano mende wokisawagaluk, mbirirli kinobatnerogo lago dogono o. 25Inae dek asunogo yiluk yi mende ndi mende togot diyalok inenggaerek nen inebe nggareliligogi o. It nen, nggare-nggare ibat weyak asigin mendeat wogisawagaluk nggareliligogi o. Mende, nit nen weyak asigin dek mende woknisawagaluk yi mende ndi mende pasik nggareligogi o. 26Eti paga, an liligogo eti, nggoma ligin yiluk, yugunat liligogo ʼbuk. Nelokonggen morat kurli pagaat liligogo o. Eti kagat, akoni ininggi dinggilogo at omanggi nen omanggi wakik, omanggi nen omanggi wakik, kagako dogolik elamarogo werlekma inarigogi dek eti kak, an we yugunat kagarigogo ʼbuk. 27It akoni amberek pano asuwagaluk pano wene yogisilik lago lagi mende, nenggaerek togot danumo nuk asunogo yiluk, nenggaerek nen nebe warau kak, nendainggen nobatnerogo sebeligik, akoni inapma dogolik inane kolek dogoligogi kak, an nebe nane apma dogigiluk nasuk warigik, kagarigogo o.
Currently Selected:
1Korintus 9: DNA
Highlight
Share
Compare
Copy
Want to have your highlights saved across all your devices? Sign up or sign in
