Zacarías 6
6
Kalbaunin kārni arungka niningkana kidika amana kapat kau
1Amana kapat ūk talnayang. Kalbaunin kārni balna arungka aiwi kalalahwak talnayang, bras asangni bu walsah yakat. 2Kār tatuna kidika laih aras papauni kat sitna kat mumurwadai, dawak kidika kaupak kār bu kidika laih aras sani kat mumurwadai; 3dawak kidika kaupak kār bās yakat laih aras pipihni kat mumurwadai, dawak kār arungka yakat laih aniras balna kidika bulni sani pihni karak kat mumurwadai.#Zac 1:8; Rib 6:2-5.
4Insal yangkarak yulbauwa yakat kalyultik dakanayang: “Yang Dawanki, ¿adika ais tanka yah?” 5Insal yaklauwi nangkitlana: “Adika balna kuduh wing arungka#Rib 7:1. kidika, Dawan muhni kaupak kalalahwa kidika sau bitik yakat. 6Kār aras sani balna mumurwa kidika laih tingpal niningkauh sauni yakat uiwi; dawak aras pipihni sitna balna kidika laih ma kawa yakat uiwi; dawak aras bubulni pihni sani karak balna kidika laih wadah niningkau sauni yakat uiwi.”
7Dawak aras bulni pihni sani karak kidika kalahwi uina, sau bitik yakat awaihwi talkih dai. Insal kidika yaklauwi diyulna: “Sau kidika bitik awaihta talnauh.” Dawak witingna kaput yayamna dai.
8Kidika usnit kat, insal kidika parasni sarahwi yayulna: “¡Talah, tingpal niningyakat uina kidika laih, kidika sauni yakat Dawan kulnin daukalna kidika sanni yayamwarangki!”
9Dawak yaklauwi adika yulni balna yana: 10“Lalah uduhtah, Babilon yakat laihwi duwi uiwak nawatwi aina balna pasyakaupak: Heldai, Tobías dawak Jedaías. Usnit kat, sihm kidika mani, Sofonías walanibis Josías ūni yakat yawah. 11Lalah dawak gol bik uduhnaman kidika kau kraun yamtah, dawak Josadac bis sumalyang nuhni Josué tunan yakat paktah. 12Dawak kalyultah: ‘Dawan parasni nuhni bitik duwa kidika yulwi, al as ayangni sulani, kidika rikni kaupak ukuswi kalahwarang dawak Dawan ūni kidika watwi laihwi dulauwi yamwarang. 13Dawan ūni kidika watwi laihwi dulauwi yamwarang, dawak king risnipik kidika duwarang. Witing trunni yakat yalahwi kabamint kawarang, dawak trunni yaihnit yakat sumalyang kidika yalahwarang, dawak witingna albupak kulninna aslah kidika sakkarang. 14Dawak kraun balna kidika laih isningkatwa atnin dini as karang bahang makatyulnin ūni yakat wawatna karang, Heldai,#6.14 Heldai: sara kau ulna yakat kaput yulwi. Hibru kau laih yulwi Helom. Tobías, Jedaías dawak Josías,#6.14 Josías: sara kau ulna yakat kaput yulwi. Hibru kau laih yulwi Hen. Sofonías walanbis kidika balna risninapik kau.’ ”
15Pa naikaupak muih kaiwarang, Dawan ūni kidika tingnisut laihwi yamnin; dawak kaput laih manna amanglatanama Dawan parasni nuhni duwa kidika yaklauwi yasihna. Adika kaput kalahna karang manna Papangmana Dawan yakat kaldakanama, dawak yulni yakat bik yamtanama kat.
Currently Selected:
Zacarías 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
