Zacarías 5
5
Wauhtaya tulna as ulna kat talna kidika amanakau kapat
1Amana kapat ūk talnayang. Talnayang wauhtaya as ulna kat,#Ez 2:9-10; Rib 5:1; 10:9-11. bahang kidika wauhnitaya laih tulna dai, dawak kidika wauhnitaya bik wing yakat awaihwalikdai. 2Insal yaklauwi yayulwi dakana: “¿Ais talamahn?” Yang lawik nangnitlanayang: “Talayang wauhtaya tulna as ulna kat wing yakat likkidika; naini laih metro tiaskauarungka duwi, dawak panuhni laih metro arungka minitkau papusbah ki.”
3Kaput laih yayulna: “Kidika yakat ulna ki blisin dutni adika sauni paskau bitik yakat laihwarang kidika. Muhni nabupak ulna kidika kaput yulwi, muih as di malwa kidika dawak alas yulwa kidika Papang ayangni kau yakwi wah duwas laih bayakwas karang. 4Dawan parasni nuhni bitik duwa kidika aput yulwi: ‘Blisin dutni adika yang lawik sihtayang di malwa ūni yakat kanin dawak, ayangki kau duwi alasyulwa ūni yakat bik.#Ex 20:7,15. Dawak blisin dutni kidika yakat ban karang ūni panan balna dawak kipala kidika dis dawarang kat.’ ”
Amana kapat talna naini kulwi talnin dawak yal
5Usnit kat insal yang karak yulbauwadai kidika kalahwi, aput yayulna: “¡Yamni talah waradika di kalahwa kidika!” 6Kalyultik dakanayang: “¿Kidi aisyah?” Witing yaklauwi nangkitlana: “Kidika laih kulwi talnin dini as ki. Kidika laih adika sauni akat muih balna bangkidika dutnina kulwi talnin dini.”
7Kulwi talnin dini putnin kidika laih lit kau yamna kat putna dai. Dawak putnin kidika dulauna, dawak kulwi talnin dini kidika pasyakat yal as yalahna sakdai. 8Dawak insal kidika yaklauwi yayulna: “Yal sakkidika kuduh dutni lani kidika.” Dawak kulwi talnin dini pasyakat tukwi āna, dawak putnin lit dai kidika kau putna.
9Dawak wattik talnayang, kaput laih yayal bu aiwi kalalahna. Lawanina duduwadai, dawak wing yaklauwi didulauwadai. Lawanina kidika laih yami nuhni lawani kapat dai, dawak kulwi talnin dini kidika wing yakat dulauwi duwi uina.
10Dawak kalyultik dakanayang insal yang karak yulbauwadai yakat: “¿Kulwi talnin dini kidika angkat duwi uiwih?” 11Dawak witing yaklauwi nangkitlana: “Babilon yakat makatyulnin ūni as yayamwarang ki. Makatyulnin ūni kidika yamwi dahn dawi, duwi uiwi rahni as ukna kidika minityakat ilsasakwarang ki.”
Currently Selected:
Zacarías 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
