Zacarías 7
7
Yuh wauhnin dauh as kidika
1Waiku tiaskauarungka laihwa pasyakat ma arungka yakat (ayangni laih Quisleu), Darío king kana kurih arungka laihwa yakat, Dawan yaklauwi yul as sihna prapit Zacarías yakat. 2Kidika mani, Betel tawanni kidika yaklauwi sihna dai Sarezer dawak Regem-melec, ahalni balna karak, Dawan kau ilp yulna atnin 3dawak prapit balna yakat yulwi dakana atnin, kaput bik Dawan parasni nuhni ūni kau sumalniyang balna yakat bik yulwi dakanin: “¿Yangna ban dikastas dawak kulnikna bukna kidika bik ban awanakiyah, kurih kaiwa balna bitik kau waiku singka kawa yakat, yangna yamtik aiwayangna kaput warmani kat?”
4Kaput laih Dawan parasni nuhni bitik duwa kidika yang akat kaina, dawi yayulna: 5Diyultah, adika sauni paskau tawan balna bitik yakat, dawak sumalyang balna yakat bik: ‘Manna di kastasmana dawak kulnamna bukna kidika bik kultamana kurih kawak kaupak waiku singka dawak tiaskaubu kidika yakat bik, bahang kidika yamnamana kaupak warmani kat kurih 70 duwi.#Jr 25:11; 29:10; Zac 1:12. Kaunah manna yamtasmana yang riskipik yanin yulni, 6kaunah manna kastamana ditamana kidika laih, manna alas yamni atnin kidika yamtamana.’ 7¿Sihm adika yulni awasyah Dawan yulna dai kidika sara mani pranipit balna munah, Jerusalén kidika kulnin lani aslah duwadai mani balna yakat, dawak muih balna bik mahni dai kidika mani, dawak yaihnitkau tawan balna bik sihm kaput dai kidika, dawak Néguev, kaput bik walang yakat?
Yulni dakawas kidika yulni pa ūk yakat laihwi dukiuna dai
8Dawan, witing prapit Zacarías yakat kiwi kalyulna: 9“Adika kuduh yang yamnin paktayang: Manna barangni awanauh la yamtamana yakat, minikun talnin kidika dutanauh biri biri. 10Tataihwinih tingmak balna warau balna, pa ūk muihni balna dawak muih miniknakunni yakat bik. Muih ūk balna dutni diyamnin kidika kukulwinih.”#Am 5:24; Mi 6:8. 11Kaunah tawan laih yulni kidika dakawas dana. Bitik laih dangnina wirlalana, dawak tapanina pukni kakalna. 12Isningna dadasni kakalna sihm kipala dahlwa tanit dadasni kapat, kidika laih Dawan parasni nuhni bitik duwa kidika, witing spiritni munah, dawak pranipit balna munah sumalwa kidik dakanin awas yulni.
Kidika bahang Dawan uba kulnin daukalna, 13dawak yulna: “Kaput witingna dakakih diawas dai kidika yang akat, yang lawik witingna yakat diyultingkat, sihm kaput bik laih yang didakas awaki yang akat yayuyulwak. 14Kidika bahang yang lawik diatingkat ruhwi kiuna sihm wing as purwi kaiwakapat, kaput laih nisan balna bitik pasyakat ruhna, witingna tatalwa balna dai yakat, dawak witingna dangnitna yakat saunina kidika laih bitik laih daukalna dai kauhmak wanilang as kapat, bahang kidika yakat muih as bik sip awas dai yalahna atnin. ¡Sau as nuhni yaksihni dai kidika witingna yaklauwi daukalpapamna!”
Currently Selected:
Zacarías 7: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
