Zacarías 4
4
Awas ilnin pāni dawak olib niningkana kidika amanakau kapat
1Kaput laih insal yangkarak yulbauwasakdai kidika nawatwi kaina, dawak yasahmuhna, muih as kamasakkat uswi sahmuhwa kapat. Dawak yayulwi dakana: 2“¿Ais talamahn?” Dawak nangnitlanayang: “Talayang awas ilnin pāni as gol kau yamna kat, dawak minit yakat awas wasni punin as ilnasakkat. makau yakat awas tiaskaubu duwi, bahang kidika balna yakat wasni kidika kiwi tubo tiaskaubu kidika balna munah. 3Awas ilnin pāni yakat olib bu rauki,#Rib 11:4. as laih tingnipal yakat dawak ūk kidika laih wadahni yakat.”
4Insal yangkarak yulbauwa kidika yakat kalyultik dakanayang: “Yang Dawanki, ¿ais tanka yah adika?” 5Insal yaklauwi nangkitlana: “¿Ais tanka kidika amanglatasmahn?” Yang kalyulnayang: “Dikah Dakiwan.”
6Dawak witing baisa yulna: “Adika yulni laih Dawak yulwi Zorobabel#Esd 5:2. yakat: ‘Kalbauyang muihni balna kaupak bik awaski, dawak parasni kau bik awaski, kaunah yang Spiritki munah ki, Dawan kaput yulwi parasni nuhni bitik duwa kidika.#Os 1:7. 7¿Man kidika waismahn, asang nuhni? ¡Zorobabel muhni yakat sau langni kalma! Witing yaklauwi kipala tatuna kidika yakwarang, muih balna kidika sarahwi aput yulwabangkat: ¡Ampat nuhni yaksihnyah! ¡Ampat nuhni yaksihnyah!’ ”
8Kidika usnitkat Papang yaklauwi yul ūk yana: 9“Zorobabel yaklauwi makatyulnin ūni rahni kidika ukna ki, bahang witing yaklauwi yamwarangki dahn kat.” Kaput laih manna amanglatanama yang adika Dawan parasni nuhni bitik duwa kidika yaklauwi yasihna kidika. 10“Kidika balna rahm kukulwasdai kidika tatuna binin as bahwa kidika, waradika laih witing alasna duduwarang, Zorobabel yaklauwi adika warkni bitik witni kat yamwak.”#Rib 5:6.
Kidika usnit kat, insal kidika yaklauwi baisa minit yakat lakwi yulna: “Adika awasni tiaskaubu adika laih Dawan minikpa, kidika balna kau sau bitik yakat talwi.”
11Yang lawik kalyultik dakanayang: “¿Ais balnayah olib bu#Rib 11:4. adika, awas pāni tingnipal kau as dawak wadahni kau as kidika?” 12Adika bik kalyultik dakanayang: “¿Ais tanka yah olib tingni rahni bu gol tunibo yaihnit kau kidika, kidik tunibo munah awas wasni kiwa kidika dahlwa sakyakat?” 13Insal yaklauwi nangkitlana: “¿Amanglatamahn ais tanka yah?” Kalyulnayang: “Dikah yang Dawanki.”
14Dawak witing yaklauwi nangkitlana: “Adika balna bu kidika yaklauwi Papang dini yakna, Dawan dini yamna atnin sau bitik yakat.”
Currently Selected:
Zacarías 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
