Roman 14
14
Wirahma yulni yulwi yamwinih
1Kasak kulnin lani yudutni duwa muihni kidika manna yamni dutanauh, witing karak kalbibilwinih. 2Yuldarangkat, muih as as kukulwi kasnin satni balna bitik kidika kasnin, ūk balna laih kasak kulnin lani yudutni duduwa kidika laih di minik balna manah kakaswi. 3Bahang yamni ki, di satni balna bitik kakaswa kidika yaklauwi, di minik satni balna manah kaswa kidika yakat dauh kalkulnin awaski; dawak biri bik sihm kaput kalkulnin awaski, kat Papang kaput yamni talwa bahang. 4¿Man kidika wais manh muih dini yamyang ūk yakat ais yamwa kidika yulnam? Yamni karangpa, dawak dutni karangpa, witing daniwan kidika yamwarang. Kaunah yamni kalahwarang ki, kat Papang laih parasni duwi kalawak yamni kalnin.
5Di ūk: Muih buas, ma as as kidika tanit nuhni kukulwi, ma ūk balna kidika karak dawakat, dawak ūk balna laih kukulwi ma balna bitik kidika laih kapapatki. Muih bitik ais kulwa kidika yamni amanglanin, ais yakat kulwa kidika. 6Ma as as yakwi duwa kidika, Dawan ayangni nuhni yamnin yulni, kidika kaput yakwi duwi.#14.6 Tingkau ulna kidika minitkau lakwi: apakwas kidika, Dawan ayangni nuhni yamnin kidika kulwas dawi. Dawak di bitik kaswa muihni kidika Dawan ayangni nuhni yamnin yulni, kidika laih witing kaswi, dawak Papang yakat tingkih kalawi; di as as kaswas kidika laih dawan ayangni nuhni yamnin yulni, kaswas dawi, dawak sihm kidika bik Dawan yakat tingkih kalawi.#Col 2:16.
7Muih as bik sip alas sangka awaski, dawak dauwa kidika bik silp dauwaski. 8Sangka mayang kat, Papang dini sangka mayang; dawak daudarang kat Dawan dini daudi. Kaput bahang sangka mayang, dawak daudarang bik Dawan dini mayang. 9Kidika yulni Krais dauna dawak watwi sangnika duna: kaput laih, sangka balna dawak dauna balna Daninawan
10¿Kaput kat ais yamta wanaihma yulni yultamahn? ¿Dawak man ais yamta dauh kalkultamahn? Mayang bitik laih Papang muhni yakat malawarang ki, witing malaki yamnin.#2 Kor 5:10. 11Ulna yakat yulwi:
“Yang sangkika yakat yaktik yultayang, Dawan kaput yulwi,
muih bitik yang muhki yakat limbabahwarang
dawak bitik Papang ayangni nuhni yayamwarang.”#Is 45:23.
12Kaput bahang, mayang bitik Papang yakat mayulki yuldarang ki.
Wirahma yakat kalyamtangbuknin awaski
13Kaput bahang, biri biri mayulki yulnin awaski. Nawatkauh laih, manna yamtanauh wanaihmana buknin awas dini kidika, kidika awasbik kasak kulwa kidika yamadangni yakat ānin awas. 14Yang amanglatayang maisihni awaski witing silp muihni yakat, Dawan Jisas yakat kulyang kapat, kidika laih yamni amanglatayang. Kaunah muih as kat dutni kulwarang kat di as niningyakat, kidika laih dutni karang ki witing niningyakat. 15Waralaih, man di kastaman kidika yulni wirahma dutni kulwakat, kidika kulnin lani laih dalani lani awaski. ¡Man kastaman kidika yulni kidika muihni disnin awaski, witing yulni Krais dauna kidika! 16Sans kalatanangkat dutni yulnin awaski, manna di yamni dutamana kidika.#14.16 Manna di yamni dutamana kidika: satuk wirlanin sipki: manna yamni talma kidika. 17Kat Papang king kāwa lani kidika laih di kasnin dini satni balna kapat awaski, kaunah lā kat yalahnin, kulnin aslah dawak alasna, Spirit Holi munah. 18Adika kaput Krais dini yamwa kidika, Papang yamni talwi, dawak ahal balna bik yamni tatalwi.
19Kaput bahang, kulnin aslah yakat dukiwa kidika waltanauh, biri biri laihwi dulauwi yamnin kidika. 20Papang warkni kidika datanang disnin awaski, kasnin dini kidika yulni. Rahm kidika laih, kasnin dini balna bitik kidika taski awaski, klin ki; dutni kidika laih di as kasdakat muih ūk kasak kulnin duwa kidika dispamwa kidik, dutni ki. 21Tanit yamni ki dimuihni kasnin awas, wain dinin awas, wanaihma kalni bauwak buknin awas dini kidika yamnin. 22Kasak kulnin lani dutaman kidika, man alas dunamki Papang muhni yakat. ¡Yamni palni ki, kidika muihni pri lani duwa kidika, kulnin yakat dutni as bik dis! 23Kauna wais kat, yamni palni kaldakawas kidika, kasnin awaski, kaunah kaswarang kat pāt kawi, kat kasak kulnin karak kaswas bahang, di bitik kasak kulnin karak yamwas kidika laih dutni ki.
Currently Selected:
Roman 14: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
