Roman 15
15
Wanaihma isning lani yamtahkauna man ismang lani laih awaski
1Kasak kulnin yakat parasnimayang kidika, mayang madiki kapat yamni ki kidika muihni kasak kulnin binilah duduwa balna yudutnina kidika, mayang yamni talnin kidika manah walnin awaski. 2Mayang bitik laih mawanaihki dukih kalawa kidika yamnin, witing niningyakat yamni balna kidika yamnin, kaput laih biri biri baraknin kidika yamna mawarang. 3Kat Krais bik witing alas dukih kalawa kidika walwasdai bahang; nawatkauh laih, Ulna balna yakat yulwa kidika witing muihni yakat kaiwi kalahna: “Dutni mayuyulna balna kidika yang mikit yakat bukna.”#Sal 69:9. 4Muhnilau kau Ulna balna yakat yulna dai kidika, mayang akat maisumalnin ulna dai, kidika munah walaniānin duda kidika, tahanin kidika dudang. 5Papang kuduh naini tani tahanin dawak walaniānin yuwa kidika, manna yakat ilp manawarang, biri biri yamni yalahnin kidika, Jisas Krais yakat talwi sampla as. 6Kaput laih bitik asla, madikitsuru aslah, Papang ayangni nuhni yamtanauh, Dawan Jisas Krais Papangni kidika.
Yul wisamni kidika ju awas balna yakatsumalna
7Kapat bahang, biri biri yamni awanauh, Krais manna yakat manaduna kapat, Papang alasnina yaksihni kidika dini. 8Sipyang manayulnik, Krais kaina Ju balna dinina yamnin, kaput laih mamuihkibararak balna kau pramis yamna dai kidika kat yamna atnin, kaput laih manikingkanin Papang laih pranimis kat barangni yamwi. 9Kaput bik kaina Ju awas balna kidika bik Papang ayangni nuhni yamnin witing dalani lani duwa kidika munah, Ulna yakat yulwa kaput:
“Kidika bahang nisan balna pasyak ayangma nuhni yamki
dawak lawana unbauki ayangma yakat.”#2 Sam 22:50; Sal 18:49.
10Pa ūk kau bik Ulna yakat yulwi:
“¡Alasna awanauh, nisan balna,
Papang tawanni kidika karak!”#Dt 32:43.
11Dawak pa ūk yakat aput yulwi:
“Nisan balna dawak tawan balna bitik,
¡Dawan ayangni nuhni yamtanauh!”#Sal 117:1.
12Isaías bik ulna:
“Isaí rikni kaupak bik kalahwarang,
yaklauwarang nisan balna pasyakat kabamint kanin,
witingna balna laih, witing yakat tahanin kidika āwi duduwarang.”#Is 11:10.
13Papang yaklauwi tahanin diawa kidika, alasna dawak kulnin aslah kidika karak manabahngwang, witing yakat kasak kultamana kidika, dawak tahanin kidika nuhni palni manawang Spirit Holi munah.
14Wirah balna, yang yamni ising aitayang manna laih minikun kulnin kidika manabuhngki dawak sins lani balna bitik, dawak biri biri kalsumalta lanmana; 15kaunah adika wauhnitaya akat ban ulnayang yul as as ki, damatnakahnin awas yulni. Adika yamtayang, kat Papang minikun talnin kidika kau yana bahang, 16Krais Jisas dini yamnin, ju awas balna kidika yamnina. Sumalyang warkni yamtayang kidika laih Papang yulni kidika sumaltayang, kidika laih ju awas balna kidika witing muhni yakat duyawinik, minitdis kalanin walapni yamni as kapat, Spirit Holi yaklauwi holi yamna kidika.
17Rahmki dutayang Papang alasnina yaksihni kidika yamnik, Krais Jisas yakat, Papang warkni yamtayang kidik, 18yakat di as bik yultasyang, Krais witing yang akat yayamna kidika awaskat, ju awas balna kidika Papang yulni dakanin yakat duyawinik. Kaput laih yul kau bik dawak warkni bik yamna ki, 19sainni balna dawak taldas dini balna yamwa parasni kau, dawak Papang Spiritni parasni kau bik. Kaput laih Krais yulni wisamni yamni adika sumaltik yawanayang, Jerusalén kaupak Iliria sauni kat. 20Kaunah nining sumaltayang yul wisamni yamni kidika sumamalwas pāni yakat Krais yulni kidika yulbautayang, kaput laih rahni uhukna kidika minit yakat rahni ūk uknin awas yulni, 21kaunah nawatkauh laih Ulna yakat yulwa kaput:
“Tatalwarang, baisa wat as bik witing yulni baisa duduwas dai kidika;
amanglalawarang witing yulni yuyulwak dakakawas dai kidika.”#Is 52:15.
Pal Roma yakat kiunin kulwi
22Kidika yulni, sip yawik manatalasyang, wat wat lawanayang dai bik yawinik.#Rom 1:13. 23Kaunah waralaih warkki dahnyamnayang bahang adika sauni akat, dawak bik kurih balna bayakna yakat yawik manatalnik kidika ban kulnik yakat sakdai bahang, 24tahatayang España yakat yawaki mani yakat yawik manatalki. Manatalkih yawa kidika manatalki usnit kat, ma parahni karang bik, tahatayang manna ilp yatanama, takit yakat ban bayaktik yawinik, angkat yawayang kidika yakat. 25Kauna waralaih Jerusalén yakat yawayang, ilp dini duyawayang mawirahki balna yakat. 26Kat Macedonia dawak Acaya muihni balna kidika di walwi ududuhna, mawirahki miniknakunni Jerusalén kau bangkidika balna dinina.#1 Kor 16:1-4. 27Witingna sip kulninna lani yayamna, kaput kaunah, kidika laih witingna yamninna dini dai bahang, kat ju kasak kulyang muihni balna kidika bik witingna kaput yayamna dai bahang spirit lainni yakat ju awas balna yakat.#1 Kor 9:11. 28Kaput bahang yang adika dini dahn yamki kat, di ududuhna balna kidika witingna yakat diaki, kidika usnit kat alahwik yawaki España yakat, kidika bayakyawayang yakat, āwik manatalki. 29Yang yamni amanglatayang yang yawaki kat, Papang blinisin kidika manas duduwarang.
30Wirah balna, Madakiwan Jisaskrais dawak spirit yaklauwi dalani talnin mayawa kidika, manayultayang adika kalbaunin adik aslah kalpakdang, bahang yang yulki Papang yakat mamatna yultanauh. 31Papang yakat yultanauh, Judea kau kukulwas muihni balna kidika kaupak yalaihwi yakwang, dawak mawirahki balna Jerusalén kau yalalahwa balna dinina duyawayang adika yamni duduna karang, 32kaput laih, Papang dukih kat, yang alasna yawik manatalki, dawak wingkita bik puhki yawaki yakat. 33Papang kulnin aslah lani duwa kidika manna karak karang. Amén.
Currently Selected:
Roman 15: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
