Roman 13
13
1Muih bitik lā muihni balna dinitna yakat atninki. Kat lā muihni as bik Papang kaupak kaiwas awaski, dawak yamnin balna yulwa kidika laih witing yaklauwi āna ki. 2Kaput bahang wais kat lā muihni niningkauh yaklauwa kidika laih, Papang yaklauwi yamnin -ana kidika niningkauh ki. Dawak niningkauh yaklauwa balna kidika laih wah diana karang, 3kat kabamint muihni balna kidika muih bilninalaunin bang-awaski, kaunah dutni yamyang balna niningna yakat laih. ¿Lā muihni balna yamaninadutas yalahkih mawih? Kaput kat yamni awah, lā muihni kidika matalwarang, 4kat Papang warkni yamwasak bahang man yamni atnam yulni. Kauna dutni yamma kat, kidika laih yamadunamki; kat lā muihni kidika dauh laih isparah kidika duwaski, kat Papang warkni yamwabahang, muih dutni yamwa kidika minit lauwi kalana atnin. 5Kaput bahang, lā muihni dinit yakat atnin, wah duwas atnin manah laih awaski, kauna kidika laih yamnin as ki makulnik yakat. 6Kidika yulni manna bik tunan minit kalatamana; kat lā muihni balna laih Papang dini yayamwa bahang, kidika yayamwi.
7Ampus duninna kidika kaput diatanauh. Kalanin dutamana kidika kalatanauh; dawak tunan minit launin dutamana kidika minit lautanauh; rispik kalanamna kidika risnipik kalatanauh, yamni kaltalnam kat, yamni kaltalah.#Mt 22:21; Mk 12:17; Lc 20:25.
8Muih as karak bik tras dunah, biri biri dalani kaltalnin trasni duda kidika laih ūk ki; bahang wais kat wanaihni yakat dalani kaltalwa kidika, uman yamna lā yulwa kaput. 9Lā balna yakat yulwi: “Marid lāni bahwinih,#Ex 20:14; Dt 5:18. muih iwinih,#Ex 20:13; Dt 5:17. di malwinih,#13.9 Tingkau ulna kidika laih minitkau lakwi: Alas yulta yaihmatkau muih balna yakat dutni diyamwinih.,#Ex 20:15; Dt 5:19. tumwinih”;#Ex 20:17; Dt 5:21. kauna adika, dawak lā ūk kidika bitik akat libitna ki: “Wanaihma kidika dalani talah man muihma kapat.”#Lv 19:18. 10Dalani lani duwa kidika wanaihni yakat dutni yamwaski; kaput bahang dalani lāni kidika lā yakat yamni kawi.
11Adika balna bitik ismangna aitanauh warmani balna mayalahda akat, dawak amanglatanauh waradika laih sahmuhnin mani. Kat mailaihwi yaknin kidika laih ulis palni ki, muhnilau adika yulni dakanamayang dai kidika karak dawakat. 12Pukta adika bayakwi kiwi, payahlanin manahki; kidika bahang pukta warkni kidika dadang; dawak yaringni kidika maparakki kapat dudang, kalbauyang muihni as kalbaunin prakni kāwa kapat. 13Lā kat atnin, madah kapat. Kasnin alasna dawak wasak daunin kidika balna yakat kiunin awaski, pini yayalni balna karak kalpaknin awas, pini dakwi kalahnin dawak tumnin bik awaski. 14Nawatkauh laih Dawan Jisaskrais kidika prakmana kapat dutanauh,#Ef 6:11-17. muihmana nuhni dutni balna dukih kidika kalalawinih.
Currently Selected:
Roman 13: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
